Preporuča apoštol nekoje pri Rimljanih koje zbog nekojeh izvišenostih po imenu pozdravlja, nekojem se pako vugibati svetuje i od drugeh veli da pozdravljaju Rimljane.
- Preporučam pako vam Febeju, sestru našu, koja je vu službi Cirkve koja je vu Cenkris,
- da ju primete vu Gosponu kak se dostoji svecev i da joj pomažete vu kakovem goder delu bude vas potrebuvala ar je i ona pomagala vnogem, i meni samomu.
- Pozdravete Prišku i Akvila, pomočnike moje vu Krištušu Ježušu,
- (koji su za živlenje moje svoje vrate podvrgli, kojem ne samo ja hvalim, nego i vse cirkve poganinske)
- i domaču Cirkvu njihovu. Pozdravete Epeneta, ljubljenoga mojega, koj je najprvi iz Azije k Krištušu preobrnjen.
- Pozdravete Mariju koja vnogo delala je pri vas.
- Pozdravete Andronika i Junija, rođake i skupvlovlenike moje, koji su glasoviteši med apoštoli i koji su jošče pred menum bili vu Krištušu.
- Pozdravete Amplijatuša, najljubljenešega vu Gosponu.
- Pozdravete Verbana, pomočnika našega vu Krištušu Ježušu, i Štakina, ljubljenoga mojega.
- Pozdravete Apelena, skušanoga vu Krištušu.
11.Pozdravete one koji su iz Aristoboluševe hiže. Pozdravete Herodijona, rođaka mojega. Pozdravete one koji su iz Narcisuševe hiže koji su vu Krištušu.
- Pozdravete Trifenu i Trifozu koje delaju vu Gosponu. Pozdravete Perzidu najljubljenešu koja je vnogo delala vu Gosponu.
- Pozdravete Rufuša, odebranoga vu Gosponu, i mater njegovu ter moju.
- Pozdravete Azinkrituša, Flegonteša, Hermamuša, Patrobaša, Hermenuša i koji z njim jesu brate.
- Pozdravete Filologuša i Juliju, Nerejuša i sestru njegovu i Olimpijadu i vse svete koji z njimi jesu.
- Pozdravete se med sobum vu svetem kušuvanju. Pozdravljaju vas vse cirkve Krištuševe.
- Prosim vas pako, bratja, da pazete na one koji nesloge i spačke činiju proti navuku kojega ste se navčili i ogibljete se njih.
- Ar takovi Krištušu, Gosponu našemu, ne služiju, nego trbuhu svojemu i po slatkeh govorenjih i blagoslovih zapeljivaju srca nedužneh.
- Ar pokornost vaša po vseh mestah je razglašena. Radujemo se anda nad vami. Nego hoču da vi mudri budete vu dobru, a prosti vu zlu.
- Bog pako mira naj potere Šatana pod nogami vašemi hitro. Milošča Gospona našega Ježuša Krištuša z vami.
- Pozdravlja vas Timotejuš, pomočnik moj, i Lucijuš i Jazon i Zozipater, rođaki moji.
- Pozdravljam vas ja, Tercijuš, koj sem pisal lista, vu Gosponu.
- Pozdravlja vas Kajuš, gospodar moj, i cela Cirkva. Pozdravlja vas Eraštuš, dačoprijemnik varaški, i Kvartuš, brat.
- Milošča Gospona našega Ježuša Krištuša z vsemi vami. Amen.
- Onomu pako koj mogučen je vas potvrditi poleg Evangelijuma mojega i nazveščanja Ježuša Krištuša, poleg raskrivene skrovnosti od vremen vekivečneh skrite,
- (koja sada očituvana je po pismih prorokov poleg zapovedi vekivečnoga Boga, na pokornost vere) med vsemi poganini spoznane,
- samomu mudromu Bogu po Ježušu Krištušu kojemu čast i dika na veke vekov. Amen.
List ov na Rimljane je poslan od Korintuša po tebi, službenici Cirkve cenkrejske.
