Stalneši moraju slabeše podnašati i pripomagati vu nezvršenostjah, ne za svoju, nego bližnjeh hasen ter med sobum mir načinjajuči; Krištuš poleg včinjeneh ocem obečanj prodekuval je Židovom, poganinom pako iz milosrdnosti apoštoli, prez naprvo idučeh obečanj. Spričava se Pavel da srčeneše je Rimljanom pisal kakti narodov apoštol pokazuči kak je čast ovu obnašal govoreči da i k njim došel bude kada dano od Macedoncev almuštvo razdeljil bude cirkvi jeruzalemski proseči da bi medtemtoga za njega molili.
- Dužni smo pako mi stalneši krhkoče slabeh podnašati i ne samem nam dopadati se.
- Vsaki slednji zmed vas naj se bližnjemu svojemu dopade vu dobru, na napreduvanje.
- Ar se Krištuš ni sam sebi dopal, nego kak pisano je: „Opšanenja opšanujučeh tebe opala jesu na me.“
- Ar koja goder su pisana, na naše podvučenje jesu pisana da bi po trpljivnosti i obatrivenju Pisem ufanje imali.
- Bog pako trpljivnosti i obatrivenja naj vam podelji da budete med sobum jednoiste misli, Ježušu Krištušu primerno,
- da složnem srcem i zjedinjenemi vusti dičite Boga i Oca, našega Gospona Ježuša Krištuša.
- Zato se med sobum prijemljete kak je vas takaj Krištuš prijel na diku Božju.
- Ar ja velim da je bil Krištuš Ježuš službenik obrezavanja zaradi istine božanske da se potvrdi obečanje ocev.
- Poganini pako dičiju Boga zarad milosrdnosti kak je pisano: „Zato budem tebe, Gospone, med poganini dičil i tvojemu imenu hvalu speval.“
- A ipak veli (Pismo): „Radujte se, poganini, skupa z njegovem ljudstvom.“
- A ipak: „Hvalete Gospona, vsi poganini, ter izvišavajte njega, vsi narodi.“
- A ipak veli Izajijaš: „Iz korena Jese podigne se on [koj] bude gospoduval zvrhu poganinov, poganini budu se vu njega ufali.“
- Bog pako ufanja naj vas napuni zevsem veseljem i mirom po veri da obiljujete vu ufanju, po kreposti Duha Svetoga!
- Seguren pako jesem, bratja moja, i ja sam od vas da i vi sami puni jeste ljubavi, napunjeni z vsakem znanjem tak da morete jeden drugoga opominati.
- Srčeneše pako pisal jesem vam, bratja, iz jedne strani kakti vas spomenuti hoteči zbog milošče koja dana je meni od Boga
- da budem službenik Krištuša Ježuša med poganini, posvečujuči Evangelijum Božji da postane aldov poganinov prijeten i posvečen vu Duhu Svetem.
- Imam anda hvalu vu Ježušu Krištušu pri Bogu.
- Ar ne podstupim se kaj govoriti zmed oneh koja Krištuš po meni ne dela na pokornost poganinov z rečjum i činmi,
- po kreposti znamenj i čud, po kreposti Duha Svetoga, tak da od Jeruzalema naokol tja do Ilirijuma napunil jesem z Evangelijumom Krištuševem.
- Tak sem pako nazveščal Evangelijum ov ne gde imenuvan je Krištuš da ne bi zvrhu ljudskoga temelja zidal, nego kak pisano je:
- „Kojem ni bilo nazveščeno od njega, videli budu i koji nesu čuli, razmeli budu.“
- Zbog česa bil sem takaj najviše preprečen k vam dojti i zadržavam se tja do sada.
- Sada pako nadalje mesta neimajuči vu oveh državah, želju pako imajuči dojti k vam od vnogeh prešesneh let,
- kada se vu Španjolsku na put povdal budem, ufam se da mimo iduči videl budem vas i od vas sprevodim se tam ako se predi jedno malo vas vžil budem.
- Sada anda idem v Jeruzalem služit svetem.
- Ar se je dopalo Macedoncem i Akajancem da bi kakov nabor načinili za siromake sveteh koji su v Jeruzalemu.
- Ar se je dopalo njim i dužniki jesu njihovi. Ar ako duhovneh njihoveh delniki postali jesu poganini, dužni su njim služiti i oni vu telovneh.
- Ovo anda kada dokančam ter izručim njim sada ovoga, prek vas putuval budem vu Španjolsku.
- Znam pako da, dojduči k vam, vu obilnosti blagoslova Evangelijuma Krištuševoga dojdem.
- Prosim vas anda, bratja, po Gosponu našem Ježušu Krištušu i po ljubavi Duha Svetoga da me pomažete vu molitvah vašeh za mene k Bogu
- da se oslobodim od neverneh koji su vu Judeji ter da službe moje aldov prijetno postane vu Jeruzalemu svetem,
- da dojdem k vam vu veselju po volji božanski i da se z vami okrepim.
- Bog pako mira naj bude z vsemi vami. Amen.
