Vu veri stalneši moraju one koji jošče slabi jesu jačiti, a ne zametavati ter niti ovi niti oni suditi koga goder zbog jestvin ali dnevov razluke znajuči da vsi jednoistoga imamo Gospona komu i živemo i vumremo, komu takaj računa vsaki za se daval bude i premda več nijedna jestvina ni nečista, nigdo vendar nikaj jesti ne sme kaj bi bratu na spačku, ali proti njegovoj dušnoj vesti bilo.
- Slaboga pako vu veri primete, ne vu pregovarjanju mišljenj.
- Ar nekoj štima da sme vse jesti, koj pako slab je, naj zelenje jé.
- Onaj koj jé, nejedučega naj ne zameče i koj ne jé, jedučega naj ne sudi ar Bog je njega prijel.
- Gdo si ti koj sudiš ljudskoga slugu? Gosponu svojemu stoji ali opadne, stal pako bude ar mogučen je Gospon njega na noge postaviti.
- Ar nekoj razluček čini med dnevom i dnevom, drugomu pako jesu vsi dnevi jednaki: vsaki naj vu čudi svojoj obiluje.
- Koj mudruje nad danom, zaradi Gospona mudruje i koj jé, zbog Gospona jé ar Bogu hvalu daje. A koj ne jé, zbog Gospona ne jé i hvalu daje Bogu.
- Ar nigdo zmed nas sebi ne žive i nigdo sebi ne vumre.
- Ar ali živemo, Gosponu živemo ali vumremo, Gosponu vumremo. Ali anda živemo ali vumremo, Gosponovi jesmo.
- Ar zato je Krištuš vumrl i gore stal da i nad mrtvemi i nad živemi gospoduje.
- Ti pako kaj sudiš brata tvojega? Ali zakaj ti zamečeš brata tvojega? Ar vsi stali budemo pred sudbenum stolicum Krištuševum.
- Ar pisano je: „ʻŽivem jaʼ, veli Gospon, ʻar se meni prigibalo bude vsako koleno i vsaki jezik valuval Boga.ʼ“
- Zato vsaki slednji zmed nas, za se račun daval bude Bogu.
- Več anda jeden drugoga ne sudemo, nego rajši to sudete da ne davate popiknjenje bratu ali spačku.
- Znam i zanašam se na Gospona Ježuša da samo na sebi nikaj ni gnjusnoga kak onomu koj štima da kaj nečistoga je, ono mu je nečisto.
- Ar ako se zbog jestvine tvoj brat žalosti, več ne hodiš poleg ljubavi. Ne pogubi z jestvinum tvojum onoga za kojega vumrl je Krištuš.
- Naj se anda ne blazni dobro naše.
- Ar Kraljestvo Božje ni jestvina i pitvina, nego pravica i mir i veselje vu Duhu Svetem.
- Ar koj vu tom služi Krištušu, dopada se Bogu i prijeten je ljudem.
- Anda šetujmo za onemi koja na mir služe i čuvajmo med sobum koja za napreduvanje jesu.
- Naj zbog jestvine zatirati delo Božje. Vsa zadnjič jesu čista, ali zlo je človeku koj na spačku jé.
- Dobro je ne jesti meso i ne piti vino niti po čem se brat tvoj popikne ali spači ali oslabi.
- Ti veru imaš? Poleg tebe samoga imaj ju pred Bogom: blaženi koj samoga sebe ne sudi vu onem kaj za dobro drži.
- Koj pako razluček čini, ako jel bude, opsuđen je ar ne čini poleg vere. Vse pako kaj ni po veri, je greh.
