Opomina da poglavarom pokorni budeju podložniki takaj zbog dušne vesti premdar svetsko lestor obnašaju večničtvo ter da duge vsem povrneju; od ljubavi bližnjega vu kojoj se ves Zakon zadržava i od vremena milošče da, dokončivši zakona tmice, ostavivši zloče, poprimeju kreposti Krištuševe.
- Vsaka duša naj bude podložna višešoj oblasti ar ni oblasti nego od Boga, koje pako (oblasti) jesu, od Boga jesu određene.
- Koj se anda suprostavlja oblasti, suprotstavlja se božanskomu određenju. Oni pak koji se (njemu) suprotstavljaju, sami navaljuju na se opsuđenje.
- Ar poglavari nesu na strah dobroga dela, nego zločestoga. Hočeš se pako ne bojati oblasti? Čini dobro i imel budeš od nje hvalu
- ar je Božji sluga tebi na dobro. Ako pako zlo včiniš, boj se ar ne nosi prez zroka meča. Ar Božji sluga je fantitel vu srditosti onomu koj zlo čini.
- Zato potrebno je da podložni budete ne lestor zbog srditosti, nego takaj zbog dušne vesti.
- Ar zato i daču davate ar slugi božanski jesu vu tem istem vsigdar služeči.
- Dajte anda vsem kaj ste dužni: komu daču – daču, komu maltu – maltu, komu strah – strah, komu poštenje – poštenje.
- Nikomu nikaj ne budete dužni, nego da se med vami ljubite ar koj ljubi bližnjega, Zakon je spunil.
- Ar „Ne praznuj!“, „Ne vmori!“, „Ne kradi!“, „Ne govori krivo svedočanstvo!“, „Ne poželi!“ i ako koja je druga zapoved, vu ovoj reči zadržava se: „Ljubi bližnjega tvojega kakti samoga tebe!“
- Ljubav bližnjega nikaj zloga ne čini, spunenje anda zapovedi je ljubav.
- I ovo znajuči vreme da vura je vre došla od sna stati se. Ar sada bližneše je zveličenje naše kak smo kada veruvali.
- Noč je preminula, dan se je pako približal. Othitemo anda dela tmice ter oblečemo oružja svetlosti.
- Kakti po dnevu pošteno hodemo, ne vu požiranjih i pijanščinah, ne vu spalnicah i nesramnostih, ne vu svađenju i jalnosti,
- nego oblecete Gospona Ježuša Krištuša i ne strežete telu poleg poželenjih njegoveh.
