Podvuča Rimljane da od sveta čalarnosti odvrnjeni zevsema se naj Bogu povdaju, za prijete dare naj sebe ne alduju ali međe njihove prekoračuju, nego na spodobu kotrigov jednoga tela vsa na hasen bližnjega naj ravnaju ter istem takaj neprijatelom naj dobro čine.
- Prosim vas anda, bratja, za volju božanske milosrdnosti da vi vaša tela za živi, sveti i Bogu dopadni aldov iskažete da tak vaša služba bude razumna.
- I najte se prilagoditi ovomu svetu, nego se premenete po ponovljenju vašega skušenja da iskusite koja je dobra, dopadna i zvršena volja božanska.
- Ar velim vsem koji su med vami, po milošči koja je meni dana, naj nigdo od sebe ne misli više nego se pristoji, dapače naj z razlogom od sebe misli primerom vere koju je Bog v Zakonu podeljil.
- Ar kak goder mi vu jednem telu imamo vnogo kotrigov, vsi kotrigi pako nemaju jednoisto opravlanje.
- Ovak smo vnogi jedno telo vu Krištušu, vsaki poseb pako jesmo jeden drugoga kotrigi.
- Mi imajmo pako primerom milošče koja je nam dana razlučne dare: ak je (dar) prorokuvanja, (tak se naj) zvršava poleg razloga vere.
- Ima gdo cirkvenu službu, naj ostane pri svojoj službi, koj vuči, naj ostane pri podvučanju.
8.Koj opomina, naj ostane pri opominanju, koj delji, naj delji vu prostoči, je gdo pretpostavljen, naj bude z skrbljivostjum, koj zvršava milosrdnost, naj ju iskaže z veseljem.
- Ljubav naj bude prez skazlivosti. Odurjavajte zlo, a držete se dobra. Amos 5,15.
- Ljubete se med sobum z bratinskum ljubavjum, z poštenjem jeden drugoga pretekajte.
- Vu skrbljivosti ne budete leni, v duhu budite goruči, služete Gosponu.
- Vu ufanju budite veseli, vu nevolji budite trpljivi, vu molitvi stalni,
- svetem dohađajte na pomoč, vu njihoveh potrebočah na stan radi prijemljite.
- Blagoslavljajte koji vas preganjaju, blagoslavljajte i najte preklinjati. Mat 5,44.
- Veselete se z veselemi, plačete se z plačučemi,
- budete jedne misli med sobum, ne držete se navisoko, nego privoljujte poniznem. Ne držete sami sebe za mudre,
- ne povračajte nikomu zla za zlo, skrbeči se za dobro ne samo pred Bogom, nego takaj pred vsemi ljudmi.
- Ako je moguče, nakuliko pri vas stoji, imajte mir z vsemi ljudmi.
- Preljubljeni, ne fantete se sami, nego dajte srditosti Božji prostora ar pisano je: „ʻMoje je fančenje, ja hoču odvrnutiʼ, veli Gospon.“ 5Moj 32,35.
- Pače, ako je tvoj neprijatel gladen, tak ga nahrani, ako je žeđen, tak ga napoj ar ako to činiš, tak buš živo vuglenje na njegovu glavu skup zgrinjal.
- Ne daj se od zla obladati, nego obladaj z dobrem.
