Ispeljava da vu Krištušu po krstu zasađeni od vsakoga skvarjenja oslobođeni jesu, koji ne sledeju telo, nego Duha kojega prijeli jesu, Duha, rekoh, posinovenja koj sine Božje i buduče dike z Krištušem skupodvetnike načini, na koje dike očituvanje, ne lestor vsako šetuje stvorjenje čalarnosti zasada podvržena, nego i oni koji duha prijeli su prvinu, nju z segurnem ufanjem čakaju po Duhu koj nje objačuje i za kaj se moliti mora, podvuča. Očituje tak neprispodobljivu Boga proti svojem iskazanu ljubav vu Krištušu, segurno povedajuči da nje nikaj ne more odružiti od ljubavi Božje koja je vu Ježušu Krištušu.
- Nikaj anda sada skvarjenja ni vu oneh koji su vu Krištušu Ježušu, koji ne hodiju poleg tela.
- Ar zakon Duha, koj vu Krištušu Ježušu oživlja, oslobodil je mene od zakona greha i smrti.
- Ar kaj je nemoguče bilo Zakonu pokehdob oslabljen je bil po telu, to je Bog, poslavši Sina svojega vu spodobi tela grešnoga, činil i po aldovu za greh opsudil je greh vu telu
- da bi se opravičenje ispunilo nad nami ki ne hodimo poleg tela, nego poleg Duha.
- Ar ki su poleg tela, koja su tela, razmeju. Ki su pako poleg Duha, koja su Duha, čutiju.
- Ar razumnost tela je smrt, razumnost pako Duha je žitek i mir.
- Pokehdob razumnost tela neprijatelica je Božja ar zakonu Božjem ni podložna, ar niti ne more.
- Koji su pako vu telu, Bogu se dopasti ne moreju.
- Vi pako neste vu telu, nego vu Duhu ako vendar Duh Božji stanuje vu vami. Ako pako gdo Duha Krištuševoga nema, taj ni njegov.
- Ako pako je Krištuš vu vami, telo zadnjič vumrlo je zbog greha, Duh pako žive zbog opravičenja.
- Ako pako Duh onoga koj obudil je Ježuša od mrtveh stanuje vu vami, koj obudil je Ježuša Krištuša od mrtveh, ožive i vaša vmrtelna tela zbog prebivajučega Duha njegovoga vu vami.
- Anda, bratja, mi nesmo dužniki tela da mi poleg tela živemo.
- Ar ako budete poleg tela živeli, vumrete, ako pako budete z Duhom telovne čine vmarjali, budete živeli.
- Ar oni koji se goder od Duha Božjega vodiju, jesu sini Božji.
- Ar vi neste ipak prijeli duha sužanstva da bi se bojali, nego ste dobili duha sinovčine vu kojem kričimo: „Abba (otec)!“ Tim 4,7; Gal 4,5.
- Ar ov isti Duh daje svedočanstvo našemu duhu da smo sini Božji.
- Ako smo pako sini, tak smo i odvetki, najmre odvetki Božji, skupodvetniki pako Krištuševi; ako mi neg z njim skupa trpimo da se i z njim odičimo.
- Ar ja sudim da traplenja ovoga vremena nesu spodobljiva k budučoj diki koja se nami bude očituvala.
- Ar čakanje stvorjenja je čakanje na očituvanje sinov Božjeh.
- Ar stvorjenje je čalarnosti podvrženo ne iz svoje volje, nego za volju onoga koj je nje podvrgel vu ufanju
- kajti se takaj isto stvorjenje od sužanstva skvarjenja oslobodi na sloboščinu dike sinov Božjeh.
- Ar mi znamo da vsako stvorjenje zdihava ter se v porodneh trudih zmir jošče nahađa.
- I ne samo ono, nego i mi sami koji prvinu Duha imamo, i mi sami vu sebi zdihavamo i čakamo na posinovlenje Božje na otkuplenje našega tela.
- Ar po [ufanju] jesmo zveličeni. Ufanje pako koje se vidi ni ufanje ar ki kaj vidi, zakaj bi se toga ufal?
- Ako pako kaj ne vidimo, ufamo se, po trpljivnosti čekamo.
- Prispodobno pako i Duh pripomaže slaboču našu ar zakaj prosimo kak je potrebno, ne znamo, nego isti Duh prosi za nas z nezgovorljivemi zdihavanji.
- Koj pako zveđa srca, zna kaj želi Duh pokehdob poleg Boga prosi za svete.
- Znamo pako da ljubečem Boga vsa služiju na dobro, onem koji su poleg naprvovzetja k svetlosti pozvani.
- A koje je naprvo spoznal i preodebral da bi prispodobni postali k obrazu Sina njegovoga, da bude ov isti prvorođeni med vnogemi brati.
- Koje pako preodebral je, ove je i pozval i koje je pozval, ove je i opravičil, koje pako je opravičil, one je i odičil.
- Kaj anda rečemo na ova? Ako je Bog za nas, gdo more biti proti nam?
- Koj takaj lastovitomu Sinu svojemu ni otprostil, nego za vse nas predal njega, kak bi nam ne bil takaj z njim vsa daruval?
- Gdo bude tužil izebrane Božje? Bog koj opravičuje.
- Gdo je koj bi je opsudil? Krištuš Ježuš koj je vumrl, dapače, koj se je gore stal, koj je na desnici Božjoj, koj takaj prosi za nas.
- Gdo nas anda odruži od ljubavi Krištuševe? Traplenje? Je li stiska? Je li glad? Je li golota? Je li pogibel? Je li meč?
- (Kak pisano je: „Da se zbog tebe krotimo celi dan, mi se držimo kakti ovce koje se imaju zaklati.“)
- Ali vu vseh oveh obladujemo zbog onoga koj ljubil je nas.
- Ar sem seguren da niti smrt niti živlenje niti angeli niti poglavarstvo niti zmožnosti niti sadašnja niti buduča niti jakost
- niti višina niti glublina niti stvorjenje drugo bude nas moglo odružiti od ljubavi božanske koja je vu Krištušu Ježušu, Gosponu našemu.
