Zarad završenja Židovov, zvrhu kojega se kruto žaluje, pokažuje da obečanja ne zmenjkaju Izraelcem včinjena od Boga sinom Abrahamovem, najmre, pokehdob ona ne spadaju na vse telovne sine Abrahamove, nego lestor na one koji se zmed Židovov i pog[an]inov po nezasluženem izebranju božanskem za sine Abrahamove po veri odlučuju, Bog pako komu se hoče, smiluje se i koga hoče, otvrdi, Židovi pako, kajti nesu iz vere Krištuševe, kojega su othitili, nego iz Zakona delih pravičnost iskali, ostavljeni jesu vu krivičnosti svojoj, poganini pako po veri Krištuševi opravičeni.
- Istinu govorim vu Krištušu, ne lažem pokehdob mi svedočanstvo daje dušna vest moja vu Duhu Svetem
- da imam veliku žalost i da me vsevdilj srce boli!
- Ar bi ja sam želel zavržen biti od Krištuša za brate moje koji su rođaki moji poleg tela,
- koji su Izraelci kojeh je prijemanje za sine i dika i zavez i zakonstvo i služba Božja i obečanja,
- kojeh oci jesu i iz kojeh je Krištuš poleg tela, koj je zvrhu vsega Bog blagoslovljeni naveke. Amen.
- Ne velim pako kak da bi reč Božja ispala. Ar nesu vsi oni Izraelci koji iz Izraela jesu
- niti su vsi sini koji su iz semena Abrahamova, nego vu Izaku imenuvano bude tebi seme,
- to je: ne koji su sini tela, ovi jesu sini Božji, nego koji su sini obečanja, računaju se med seme.
- Ar obečanja reč je ova: „Poleg ovoga vremena dojdem i bude Sara imela sina.“
- Ne pako ona sama, nego takaj Rebeka iz jednoga skuplega imajuča z Izakom, ocem našem,
- ar pokehdob se jošče ne bi bili porodili niti kaj dobra ali zla činili (da bi poleg izebranja naprevzetje opstalo),
- je njoj ne zbog del, nego zbog zovečega rečeno
- da vekši bude služil menšemu kak pisano je: „Jakopa sem ljubil, Ezava pako jesem odurjaval.“
- Kaj anda rečemo? Je li krivica pri Bogu? Zevsema ne.
- Ar Mojžešu veli: „Smiluval se budem komu se smilujem i milosrdnost iskažem kojem se smiluval budem.“
- Anda ne stoji niti pri onem koj hoče niti pri onem koj beži, nego pri Bogu koj se smiluje.
- Ar veli Pismo faraonu: „Kajti zbog toga jesem tebe obudil da pokažem nad tobum moč moju i da se nazvesti ime moje po vsem svetu.“
- Anda komu se hoče, smiluje se i koga hoče, vtvrdi.
- Rečeš anda meni: „Zakaj se anda tuži ar volji njegovi gdo se more suprotstaviti?“
- O, človek, gdo si ti koj se pregovarjaš z Bogom? Je li veli lonec onomu koj ga je naredil: „Zakaj si me tak načinil?“
- Je li nema oblast lončar nad blatom da bi z jedne grude delal jednu zadnjič posudu na poštenje, drugu pako na opšanost?
- Ako je anda Bog, hoteči pokazati srditost i znanu činiti mogučnost svoju, podnašal je z velikum trpljivostjum posude srditosti prikladne na skvarjenje
- da bi pokazal bogatstva dike svoje nad posudum milosrdnosti koju pripravil je na diku.
- Koje je i pozval, najmre nas, ne lestor zmed Židovov, nego takaj zmed poganinov,
- kak on po Ozejašu veli: „Zval budem puka koj ni moj puk za moj puk i neljubljenoga za ljubljenoga i koj ni milosrdnost stignul, za onoga koj je milosrdnost stignul.“
- I bude na mestu gde rečeno je njim: „Vi neste puk moj, tam se zvali budu sini Boga živoga.“
- Izajijaš prokriči za Izrael: „Ako bude broj sinov izraelskeh kak morskoga peska, ostanki zveličeni postaneju.
- Ar reč skanjajuča i prikačujuča vu pravednosti veli da prikračenu reč činil bude Gospon na Zemlji.“
- I kak je prenazvestil Izajijaš: „Da ne bi bil Gospon Šeregov stavil nam semena, kakti Sodoma bi bili včinjeni i kakti Gomora bi bili spodobni.“
- Kaj anda rečemo? Da poganini koji nesu sledeli pravicu stignuli jesu pravicu, pravicu pako koja iz vere je.
- Izrael pako sledeč Zakon pravice, k Zakonu pravice ni dospel.
- Zakaj? Kajti ju nesu iz vere, nego kakti iz del iskali jesu ar se popiknuli jesu na kamen popiknenja,
- kak pisano je: „Nut, postavljan vu Sijonu kamen popiknenja i pečinu spačke i vsaki koj veruje vu njega, ne osramoti se.“
