Apoštol moli za Židove koje zažganost za Boga i Zakon imeti potvrđava ne poleg znanosti ar Krištuša, koj cilj Zakona je, neznajuči iz Zakona del pravicu iščeju; od razlučnosti pravice koja se nahađa med deli Zakona od oneh koja jesu iz vere, koja tak Židovu kak grku vu Krištuša verujučemu opčinska je; povsuda pako po vsem svetu nazveščena je vera koju, poklamkak bi bili zahitili Židovi, prijeli jesu poganini.
- Bratja, hotenje zadnjič srca mojega i molenje k Bogu biva za nje na zveličenje.
- Ar svedočanstvo dajem njim da zažganost za Boga imaju, ali ne poleg pravoga spoznanja.
- Ar neznajuči pravicu božansku i svoju iščuči vtvrditi, pravici Božjoj nesu podvrženi.
- Ar konec Zakona, Krištuš, na pravicu vsakomu verujučemu.
- Ar Mojžeš pisal je da človek koj včini pravicu koja je iz Zakona živel bude vu njoj.
- Koja pako iz vere je pravica, tak veli: „Ne reči vu srcu tvojem: ʻGdo bude v Nebo gore išel?ʼ, to je Krištuša dole peljati,
- ali: ʻGdo bude dole išel vu prepast? ʼ, to je Krištuša od mrtveh nazad pozvati.“
- Nego kaj veli Pismo? „Blizu je reč vu vustah tvojeh i vu srcu tvojem.“ To je reč vere koju nazveščamo
- kajti ako valuješ vu vustah tvojeh Gospona Ježuša, a vu srcu tvojem veruval budeš da Bog obudil je njega od mrtveh, zveličen budeš.
- Ar se z srcem veruje na pravicu, z vustmi pako biva valuvanje na zveličenje.
- Ar veli Pismo: „Vsaki koj veruje vu njega, ne bude osramočen.“
- Ar ni razluka med Židovom i grkom ar vseh je jeden isti Gospon koj je bogat za vse koji ga zazavaju.
- Ar vsaki koj goder bude zazaval ime Gosponovo, bude zveličen.
- Kak pako budu zazavali onoga vu kojega nesu veruvali? Ali kak budu veruvali onomu kojega nesu čuli? Kak pako budu čuli prez nazvestitela?
- Kak pako budu nazveščali ako se ne pošljeju? Kak je pisano: „Kak lepe jesu noge oneh koji nazveščaju mir, koji nazveščaju dobra!“
- Ali nesu vsi pokorni Evangelijumu ar veli Izajijaš: „Gospone, gdo je veruval onomu kaj je od nas čul?“
- Anda vera dohađa iz poslušanja, poslušanje pako po reči Krištuševi.
- Ali ja velim: „Je li nesu čuli?“ I, dapače, ar se je „njihov glas po vsoj Zemlji razišel i njihove reči na kraje sveta“.
- Nego velim: „Je li ni spoznal Izrael?“ Prvi Mojžeš veli: „Ja vas k razdraženju zapeljam čez narod koj ni moj narod, čez narod nespametni budem vas k srditosti poslal.“
- Izajijaš se pako podstupi i veli: „Najđen jesem od oneh koji me iskali nesu, očivesto iskazal sem se onem koji me nesu spitavali.“
- Izraelu pako veli: „Celi dan pružal sem ruke moje k puku neverujučemu i suprot govorečemu.“
