Slavna molitva Ježuša Krištuša za se, za svoje vučenike i vse buduče verne.
- Ova je Ježuš govoril, onda podigne svoje oči vu nebo i reče: „Otec, došla je vura, odiči tvojega Sina da tvoj Sin odiči tebe,
- tak kak ti njemu jesi dal oblast zvrhu vsakoga tela da on vsem koje ti njemu jesi dal podelji vekivečni žitek. Mat 28,18.
- Ovo je pako vekivečni žitek da oni tebe, jedino pravoga Boga, spoznaju i kojega ti jesi poslal, Ježuša Krištuša.
- Ja jesem tebe na Zemlji odičil, ja jesem dokončal delo koje ti meni jesi dal da je činim.
- I sada, Otec, odiči mene pri tebi samem z onum odičenostjum koju ja pri tebi jesem imal predi nego bi bil svet.
- Ja jesem tvoje ime očituval ljudem koje ti meni od sveta jesi dal. Oni su bili tvoji i ti nje jesi meni dal i oni su tvoje reči obdržali.
- Vezda oni znaju da vsa koja ti meni jesi dal, jesu od tebe. Gore 5,19.
- Ar reči, koje ti meni jesi dal, jesem ja njim dal i oni su nje prijeli i istinski spoznali da ja jesem od tebe izišel i jesu veruvali da ti mene jesi poslal. Gore 12,49.
- Ja za nje prosim. Ja ne prosim za svet, nego za one koje ti jesi meni dal ar oni jesu tvoji.
- I vsa koja su moja, jesu tvoja i koja su tvoja, jesu moja i ja jesem vu njih odičen.
- Ja več nesem na svetu, ovi pako jesu na svetu i ja idem k tebi. Sveti Otec, obdrži nje vu tvojem imenu koje jesi meni dal da oni budu jedno kak i mi jesmo.
- Dok sem ja pri njih bil, jesem ja nje vu tvojem imenu obdržal. Koje ti meni jesi dal, jesem opčuval i nijeden zmed njih ni poginul, zvun sina pogublenja da se ispuni Pismo. Gore 13,18. Šolt 108,10.
- Vezda pako ja k tebi othađam i ova govorim na svetu da oni moje veselje zvršeno vu sebi imaju.
- Ja jesem njim tvoje reči dal i svet nje odurjava kajti oni nesu od sveta kak niti ja nesem od sveta. Gore 13,18.19.
- Ja ne prosim da ti nje vzemeš od sveta, nego da nje od zla zdržiš.
- Oni nesu od sveta kak niti ja nesem od sveta.
- Posveti nje vu istini. Tvoja reč je istina.
- Kak ti mene na svet jesi poslal, tak i ja nje pošiljam na svet
- i ja samoga sebe posvečujem za nje da i oni budu vu istini posvečeni.
- Ali ja ne prosim samo za nje, nego takaj i za one koji budu po njihovoj reči vu me veruvali
- da vsi budeju jedno kak ti, Otec, vu meni i ja vu tebi,da i oni vu nas budu jedno da svet veruje da ti mene jesi poslal.
- I ja jesem odičenost, koju ti meni jesi dal, takaj njim dal da oni budu jedno kak i mi jesmo jedno.
- Ja vu njih, a ti vu meni da oni zvršeno budeju jedno i da svet spozna da ti mene jesi poslal i nje ljubiš kak ti mene takaj ljubiš.
- Otec, ja hoču da gde ja jesem takaj ovi pri meni jesu koje ti jesi meni dal ar ti jesi mene pred postankom sveta ljubil.
- Pravični Otec, svet ni tebe spoznal, ja pako jesem tebe spoznal i ovi jesu spoznali da ti mene jesi poslal.
- I ja jesem njim tvoje ime znano včinil i ja budem nje znano činil da ljubav z kojum ti mene jesi ljubil bude vu njih i ja vu njih.“
