Ježuš na vrtu, vloviju ga i vodiju pred Anaša. Peter sledi njega. Ježuš pred Kajfašem. Peter zataji njega. Ježuš pred Pilatušem. Barabaša pretpostavljaju njemu.
- Ova kad bi Ježuš bil izvustil, izide z svojemi vučeniki prek potoka Cedron gde je bil vrt vu kojega je on i njegvi vučeniki nuter zašel. 2Kralj 15,23; Mat 26,36; Mark 14,32; Luk 22,39.
- Znal je pako i Judaš, koj je njega izdaval, za mesto ar Ježuš je više puti tam zahađal z svojemi vučeniki.
- Kad bi anda Judaš četu i hahare aldovničkeh poglavarov i farizejušev bil vzel, dojde tam z svetnicami, baklami i oružjem. Mat 26,47; Mark 14,43; Luk 22,47.
- Ježuš pako, koj je vsa znal koja su zvrhu njega imala nadojti, izide pred nje i reče njim: „Koga iščete?“
- Oni odgovoriju njemu: „Ježuša Nazarenskoga.“ Ježuš reče njim: „Ja jesem.“ Stal je pako takaj Judaš koj je njega izdaval.
- Kad bi pako on njim bil rekel: „Ja jesem“, odstupili su nazad i na zemlju popadali.
- Onda nje on ipak pita: „Koga iščete?“ Oni pako jesu rekli: „Ježuša Nazarenskoga.“
- Ježuš odgovori: „Ja sem vam rekel da ja jesem. Ako anda mene iščete, tak pustete ove oditi.“
- Da bi se spunila reč koju je rekel: „Koja ti meni jesi dal, nijednoga zmed njih nesem pogubil.“ Gore 17,12.
- Šimun Peter pako istegne meč kojega je imal, vudri slugu aldovničkoga poglavara i odseče njemu desno vuho. Slugi pako je bilo ime Malkuš.
- Onda Ježuš reče Petru: „Postavi tvoj meč vu nožnicu! Je li ne budem pil kelih kojega je meni Otec dal?“ Mat 20,22.
- Šereg pako i stotnik i hahari židovski pograbiju Ježuša i zvežeju njega.
- I najprvič otpeljaju ga k Anašu ar on je bil tast Kajfašev koj je bil ovoga leta aldovnički poglavar. Luk 3,2; Mat 26,3.
- Kajfaš pako je bil on isti koj je bil dal Židovom tolnač: „Hasnovito je ako jeden človek vumre za ljudstvo.“ Gore 11,49.
- Šimun Peter pako i nekoj drugi vučenik jesu nasleduvali Ježuša. On pako vučenik je bil znan aldovničkom poglavaru i prešel je z Ježušem nuter vu dvor aldovničkoga poglavara.
- Peter pako je vani pred vratmi stal. Onda on drugi vučenik, koj je bil aldovničkomu poglavaru znan, izide van, govori z vrataricum i zapelja Petra nuter.
- Službenica pako, vratarica, reče Petru: „Je li i ti si takaj zmed vučenikov ovoga človeka?“ On reče: „Nesem“.
- Slugi pako i hahari stali su pri žerjavki ter su se greli ar je bila zima, stane pako i Peter k njim ter se je grel.
- Aldovnički pako poglavar pita Ježuša za njegve vučenike i njegov navuk.
- Ježuš odgovori njemu: „Ja sem očivesto pred svetom govoril! Ja sem vsigdar vučil vu sinagogi i vu Cirkvi kam se vsi Židovi shađaju i na otajnom nesem nikaj govoril.
- Kaj me pitaš? Pitaj one koji su čuli kaj sem njim govoril, nut, ovi znaju kaj sem govoril.“
- Kad bi pako on ova bil rekel, jeden zmed haharov, koji su onde stali, da Ježušu pljusku i reče: „Tak li odgovarjaš aldovničkomu poglavaru?“
- Ježuš odgovori njemu: „Ako sem zlo govoril, tak mi daj svedočanstvo od zla. Ak’ sem pako prav govoril, zakaj me biješ?“
- I Anaš pošlje njega zvezanoga k Kajfašu, aldovničkomu poglavaru. Mat 26,57; Mark 14,53; Luk 22,54.
- Šimun Peter pako je stal ter se grel. Onda rečeju njemu: „Ne li i ti si jeden zmed njegveh vučenikov?“ A on je tajil i rekel: „Nesem.“
- Jeden zmed službenikov aldovničkoga poglavara, rođak onoga kojemu je Peter odsekel vuho, reče njemu: „Je li te ja nesem z njim na vrtu videl?“
- Peter je anda ipak tajil, i taki je pevec zapopeval.
- Onda dopeljaju Ježuša od Kajfaša na večnicu. Bilo je pako rano, oni pako nesu išli nuter vu večnicu da se ne bi oskrunili, nego da bi jeli vuzmenoga janjca.
- Izide anda Pilatuš k njim van i reče: „Kakvu tužbu naprvo donašate suprot ovomu človeku?“
- Oni odgovoriju i rečeju njemu: „Da ov ne bi bil hudodelnik, tak ga ne bi bili tebi predali.“
- Onda reče njim Pilatuš: „Vzemite si ga vi i sudete ga poleg vaše zapovedi!“ Židovi pako rečeju njemu: „Nam nikoga ni slobodno vmoriti.“
- Da bi se spunila Ježuša reč koju je rekel namenujuči z kakvum smrtjum on bi imal vumreti.
- Onda odide Pilatuš nazad vu večnicu, zove Ježuša i reče njemu: „Ti si kralj židovski?“ Mat 27,11; Mark 15,2.
- Ježuš odgovori: „Je li ti to od samoga sebe govoriš ali jesu li ti to drugi od mene povedali?“
- Pilatuš odgovori: „Je li sem ja Židov? Tvoj narod i aldovnički poglavari jesu tebe meni predali. Kaj si včinil?“
- Ježuš odgovori: „Moje kraljestvo ni od ovoga sveta. Da bi moje kraljestvo od ovoga sveta bilo, tak bi zaisto moji službeniki harcuvali da se ne bi Židovom predal. Sada pako ni moje kraljestvo odovud.“
- Onda reče njemu Pilatuš: „Anda si ti kralj?“ Ježuš odgovori: „Ti veliš, ja jesem kralj. Ja se na to jesem rodil i na to jesem došel na svet da svedočanstvo dajem od istine. Vsaki koj je iz istine, on posluša moju reč.“
- Veli njemu Pilatuš: „Kaj je istina?“ I kad bi on to bil povedal, izide ipak van k Židovom i reče njim: „Ja vu njem nikakve krivnje ne nahađam.
- Pri vas pako je ov običaj da vam k Vuzmu jednoga spustim. Hočete li anda da vam židovskoga kralja spuščam?“ Mat 27,15; Mark 15,6; Luk 23,17.
- Na to su ipak vsi zaviknuli i rekli: „Ne ovoga, nego Barabaša!“ Barabaš pako je bil tolvaj.
