Bičuvanje i korunenje. Pilatuš trsi se Ježuša osloboditi, ništarmanje vendar opsuđuje njega iz človečanskoga straha. Vanspelavanje i raspinanje. Januš i Marija pod križom. Žeđa Ježuševa, njegva smrt. Otpiraju se njegva prsa. Jožef i Nikodemuš skrbiju se za njegvo pokapanje.
- Onda prime Pilatuš Ježuša i da njega bičuvati. Mat 27,27; Mark 15,16.
- I vojniki jesu spleli korunu iz trnja i nju postavili na njegvu glavu i odeli su ga z škrlatnum haljum
- i k njemu su pristupluvali ter govorili: „Zdravo, kralj židovski!“ I davali su njemu pljuske.
- Onda ipak izide van Pilatuš i reče njim: „Nut, ovo vam njega van peljam da spoznate da ja vu njem nikakve krivnje ne nahađam.“
- (Ježuš anda izide van noseči trnovu korunu i škrlatnu opravu.) I on veli njim: „Nut, ovo človeka!“
- Kad bi pako njega aldovnički poglavari i hahari bili zagledali, skriknuli su govoreči: „Raspni ga, raspni!“ Reče njim Pilatuš: „Vzemete si ga vi pak ga raspnite ar ja vu njem nikakve krivnje ne nahađam!“
- Odgovoriju njemu Židovi: „Mi imamo pravdu i poleg pravde mora on vumreti ar se je on za Božjega Sina načinil!“
- Kad bi pako Pilatuš to govorenje bil čul, jošče se je bolje zbojal.
- I on ipak odide vu večnicu i reče Ježušu: „Otkud si ti?“ Ježuš pako ni mu dal odgovora.
- Onda reče njemu Pilatuš: „Z menum ne govoriš? Je li ne znaš da ja imam oblast tebe raspeti i imam oblast tebe spustiti?“
- Ježuš odgovori: „Ti nikakve oblasti ne bi imal zvrhu mene da ti odzgor ne bi bila dana zato on koj je mene predal tebi, ima vekši greh.“
- I odsada je iskal Pilatuš njega spustiti. Židovi pako jesu kričali i govorili: „Ako ti ovoga spustiš, tak nesi cesarov prijatel ar vsaki koj se kraljom načinja, suprotstavlja se cesaru.“
- Kad bi pako Pilatuš bil čul ove reči, je van ispeljal Ježuša i sel si je na sudbeni stolec, na mesto koje se zove Litoštroton, po židovski pako Gabata.
- Bil je pako dan pripravlanja k Vuzmu, okolo šeste vure, i reče Židovom: „Nut, vašega kralja!“
- Oni pako jesu kričali: „Proč z njim! Proč! Raspni ga!“ Reče njim Pilatuš; „Kaj budem vašega kralja raspel?“ Aldovnički poglavari odgovoriju: „Mi nemamo kralja nego cesara.“
- Onda je njega njim predal da se raspne. Oni pako primeju Ježuša i njega van otpeljaju.
- I on noseč svoj križ izide van na mesto koje se zove Mesto lubanj ili mrtvečkeh glav, po židovski Golgota. Mat 27,33; Mark 15,22; Luk 23,33.
- Ovde su njega raspeli i z njim druge dva iz obodveh stran, Ježuša pako v sredini.
- Pilatuš pako je napisal natpisek i na križ postavil. Bilo je pako pisano: „Ježuš Nazarenski, kralj židovski.“
- Ov anda natpisek jesu vnogi zmed Židovov čteli ar mesto gde je bil Ježuš raspet je bilo blizu varaša. I bilo je pisano po židovski, grčki i dijački.
- Rekli su anda aldovnički poglavari Židovov Pilatušu: „Ne piši ‛kralj židovski’, nego da je on rekel: ‛Ja jesem kralj židovski’.“
- Pilatuš odgovori: „Kaj sem pisal, pisal sem.“
- Vojniki anda, kad bi Ježuša bili raspeli, vzeli su njegvu opravu (i načinili su iz nje četiri dele, za vsakoga vojnika jeden del) i halju. Halja pako je bila nezašita, odzgor povduš zetkana. Mat 27,35; Mark 15,24; Luk 23,34.
- Rekli su anda med sobum: „Ne razrežimo nje, nego hitajmo kocke za nju čija bude!“ Da bi se ispunilo Pismo koje veli: „Razdeljili su si moju opravu i zvrhu mojega ruha hitali su kocke.“ Ter vojniki jesu istom ova včinili.
- Stale su pako poleg Ježuševoga križa njegva majka i sestranjegve majke, Marija, žena Kleofaševa, i Marija Magdalena.
- Kad bi anda Ježuš bil videl svoju majku i vučenika kojega je on ljubil onde stati, reče svojoj majki: „Žena, nut, ovo tvojega sina!“
- Onda reče vučeniku: „Nut, ovo tvoje majke!“ I od one vure je nju vučenik k sebi vzel.
- Zatem, pokehdob da je znal Ježuš da su vsa dovršena da bi se spunilo Pismo, reče: „Ja žeđam.“
- Bila je pako onde posuda postavljena puna octa. I oni napuniju gubu z octom, natekneju nju na hisop i podeneju nju k njegvem vustam.
- Kad bi anda Ježuš bil vzel octa, reče: „Dovršeno je.“ I nagne svoju glavu ter spusti dušu.
- Židovi pako, da čez sobotu ne ostaneju tela na križu kajti je dan pripravlanja bil (ar on sobotni dan je bil veliki svetek), prosili su Pilatuša da bi se njihove kosti potrle ter dole sneli.
- Dojdu anda vojniki ter prvomu zadnjič potreju kosti i drugomu koj je bil z njim raspet,
- kad bi pako do Ježuša bili došli i videli da je vre vumrl, nesu potrli njegve kosti,
- nego jeden zmed vojnikov otpre z sulicum njegvo rebro i sproti je potekla krv i voda.
- I on koj je to videl, daje svedočanstvo od toga i njegvo svedočanstvo je istinito. I on zna da istinska poveda da takaj vi verujete.
- Ar ova jesu včinjena da bi se spunilo Pismo: „Vi vu njem ni jedne kosti ne potrite.“
- A ipak drugo Pismo govori: „Oni budu videli koga su preboli.“
- Zatem pako je Jožef od Arimateje, koj je bil Ježušev vučenik, ali otajen zbog straha Židovov, prosil Pilatuša da bi Ježuševo telo dole znel. I Pilatuš je dopustil. Dojde anda i zneme Ježuševo telo. Mat 27,57; Mark 15,43; Luk 23,50.
- Dodje pako i Nikodemuš, koj je prvič v noči k Ježušu bil došel, i donese mirče z aloje zmešane, do sto funtov. Gore 3,2.
40.Vzemeju anda Ježuševo telo i obviju nje vu vilahne skupa z dišučemi mastmi, kak je Židovom običajno zakapati.
- Bil je pako vrt na onem mestu gde je bil on raspet i na vrtu novo pokopališče vu koje nigdo jošče ni bil položen. Mat 27,60.
- Onde anda jesu Ježuša položili zaradi dana pripravlanja Židovov ar je pokopališče blizu bilo.
