Od spačke, od pomirenja i od moči vere. Mi smo nehasnoviti sluge. Zvračenje deset gubaveh. Kraljestvo Božje je znutra vu nas. Od drugoga došestka Gosponovoga.
- I reče svojem vučenikom: „Ni moguče da ne bivaju spačke, jaj pako onomu po kojem bivaju! Mat 18,7; Mark 9,41.
- „Njemu bi hasnoviteše bilo da bi se na njegov vrat obesil melinski kamen ter se hitil vu morje nego da spači jednoga zmed oveh malehneh.
- Pazete se! Ako zagreši suproti tebi tvoj brat, pokaraj ga i ako se bude kajal, otpusti mu. 3Moj 19,17; Eccli 19,13; Mat 18,15.
- I ako na dan sedemkrat suproti tebi zagreši i na dan se sedemkrat k tebi obrne govoreči: ʻŽal mi jeʼ, otpusti mu.“
- I rekli su apoštoli Gosponu: „Povekšaj nam veru!“
- Reče pako Gospon: „Ako budete imali veru kakti muštardovo zrno, tak morete ovomu murvovomu drevu reči: ʻIskoreni se i presadi se vu morjeʼ, i posluhne vas. Mat 17,19.
- Gdo pako zmed vas koj ima slugu koj orje ali pase bude njemu, kad se iz polja povrne, rekel: ʻHodi taki i sedi se k stoluʼ?
- Je li dapače ne reče njemu: ʻPripravi kaj budem večerjal i opaši se ter mi dvori dok se najem i napijem i potlam budeš ti jel i pilʼ?
- Je li se zahvaljuje onomu slugi da je včinil kaj mu je zapovedal?
- Ja ne štimam. Ravno tak i vi! Kada včinete vsa koja su vam zapovedana, recete: ʻMi smo nehasnoviti sluge, mi smo lestor včinili kaj smo bili dužni včiniti.ʼ“
- I včinjeno je kad bi išel vu Jeruzalem, prehađal je oposred Samarije i Galileje.
- I kad bi vlezuval vu nekoje gradišče, dojde pred njega deset gubaveh ljudih koji su postali izdalka.
- I podignuli su glas govoreči: „Ježuš, Navučitel, smiluj se nam!“
- Koje kak je zagledal, reče: „Hote, pokažite se aldovnikom.“ I dogodilo se je kad bi išli, da su očiščeni postali. 3Moj 14,2.
- Jeden pako zmed njih, kak je videl da je očiščen, je se povrnul i z velikem glasom dičil Boga
- i opal je na lice pred njegve noge i zahvalil se njemu, i ov je bil Samaritanec.
- Odgovori pako Ježuš i reče: „Ne li ih deset očiščeneh? A gde ih je devet?
- Nijeden ne se znašel koj bi se bil povrnul i dal diku Bogu, nego sam ov tuđina.“
- I reče njemu: „Stani se i hodi, tvoja vera je tebe zdravoga včinila.“
- Opitan pako od farizejušev kada dojde Kraljestvo Božje, odgovoril je njim i rekel: „Kraljestvo Božje ne dojde očitno
- niti ne budu govorili: ʻNut, ovde jeʼ, ali: ʻNut, ondeʼ. Ar, nut, Kraljestvo Božje je znutra vu vas.“
- I reče svojem vučenikom: „Dojdeju dnevi kada budete želeli videti jeden dan Sina Človečjega i ne budete ga videli.
- I rečeju vam: ʻNut, ovde je!ʼ i: ʻNut, onde!ʼ Najte iti niti je najte nasleduvati! Mat 24,23.
- Ar kak blisk koj se zablisikne vsa rasvečuje koja su pod nebom, ovak takaj bude Sin Človečji vu svojem dnevu.
- Prvlje pako mora on vnoga trpeti i zavrči se od ovoga pokolenja.
- I kak je bivalo vu dnevih Noema, ravno tak bude i vu dnevih Sina Človečjega.
- Jeli su i pili, ženili su se i za muža su se vdavale tja do dneva vu kojem je Noe vleznul vu barku i došel je potop i vse je pogubil. 1Moj 7,7; Mat 24,37.
- Spodobno kak je bivalo vu dnevih Lota: jeli su i pili, kupuvali su i prodavali, sadili su i zidali. 1Moj 19,25.
- Vu kojem pako danu je Lot izišel iz Sodome, dežđil je ogenj i žveplo iz neba i vse je pogubil.
- Ravno tak bude vu onem dnevu vu kojem se Sin Človečji bude očituval.
- Ob onoj vuri koj bude na krovu, a njegvo posudje vu hiži, naj nejde dole da bi je vzel, koj pako bude na polju, ravno tak naj se ne povrača nazad.
- Spomenete se iz Lotove žene.
- Koj se goder bude trsil svoju dušu obdržati, zgubi ju, a koj goder ju zgubi, on ju ožive.“ Mark 8,35; zgora 9,24; Jan 12,25.
- Velim vam: vu onoj noči budeju dva na jedni postelji ležali, jeden se vzeme, a drugi ostavi. Mat 24,40.
- Dve budu zajedno mlele: jedna se vzeme, a druga ostavi; dva budeju na polju: jeden se vzeme, a drugi ostavi.“
- Oni su odgovorili i rekli njemu: „Gde, Gospone?“
- On pako reče njim: „Gde goder bude mrtvo truplo, onde se takaj skup spraviju orli.“
