Prilika od suca, farizejuša i publikanuša. Ježuš deteči prijatel. Tolnač k zvršenosti. Kak teško vlezuju bogatuši vu Kraljestvo Božje. Plača oneh koji za volju Krištuša vsa ostavljaju. Ježuš prenazvešča svoje muke. Zvračenje nekojega slepoga.
- Povedal im je pako takaj priliku da je potrebno vsevdilj moliti i nigdar ne prestati, Cirk 18,22; Tes 5,17,
- govoreči: „Bil je nekoj sudec v stanovitem varašu koj se ni bojal Boga niti nikakvoga človeka plašil.
- Bila je pako nekoja vdovica vu onem varašu i dohađala je k njemu govoreča: ʻBrani me suproti mojemu protivniku.ʼ
- I on ni hotel dugo vremena. Zatem je pako rekel vu sebi: ʻAkoprem se ne bojim Boga niti nikakvoga človeka ne plašim,
- vendar hoču ovu vdovicu, pokehdob mi je neprilična, braniti da zadnjič dojduča ne opšani mene.ʼ“
- Reče pako Gospon: „Čujte, kaj nepravični sudec veli!
- Je li pako Bog ne bude fantil svoje izebrane koji dan i noč k njemu kričiju i je li bude trpel da se optršuju?
- Velim vam da nje bude hitro fantil. Ništermanje kada Sin Človečji dojde, je li najde veru na Zemlji?“
- Reče pako takaj nekojem koji su se vu se ufali kak da bi bili pravični i druge su zametali ovu priliku:
- Išli su dva človeki gore vu Cirkvu molit, jeden je bil farizejuš, a drugi publikanuš.
- Farizejuš stane i ovak je vu sebi molil: ʻBože, hvalu dajem tebi da nesem kak drugi ljudi, kak razbojniki, krivičnjaki, prazniki ali kak i ov publikanuš.
- Ja postim dvakrat v tjednu i dajem desetinu od vsega kaj imam.ʼ
- A publikanuš je izdaleka stajal i ni hotel niti oči vu nebo podignuti, nego je tukel svoja prsa govoreči: ʻBože, budi milostiven meni grešniku!ʼ
- Velim vam: ov je odišel opravičen domom, a on ne ar vsaki koj samoga sebe izvišava, bude se ponizil, a koj samoga sebe ponizuje, bude se izvisil.“ Mat 23,12; gore 14,11.
- Donašali su pako k njemu i decu da bi se ih doteknul. Kaj kad bi bili videli vučeniki, karali su nje. Mat 19,13; Mark 10,13.
- Ježuš pako skup zezvavši nje reče: „Puščajte decu k meni dohađati i najte njim prečiti ar takveh je Božje kraljestvo.
- Stanovito velim vam: koj Božje kraljestvo ne bude prijel kakti dete, ne bude vu nje vleznul.“ Mark 10,15.
- I opita ga nekoj poglavnik govoreči: „Dobri mešter, kaj imam včiniti da zadobim vekivečni žitek?“ Mat 16,19; Mark 10,17.
- Reče pako njemu Ježuš: „Zakaj me imenuješ dobroga? Nigdo ni dober, nego jedini Bog.
- Ti znaš zapovedi: ne vmarjaj, ne praznuj, ne kradi, ne govori krivoga svedočanstva, poštuj tvojega oca i mater.“ Ishod 20,13.
- On reče: „Vsa ova jesam obdržaval od moje mladosti.“
- Kaj kad bi bil čul Ježuš, reče njemu: „Jošče ti jedno menjka: prodaj vsa koja goder imaš i daj siromakom i budeš imal kinča vu Nebu, pak dojdi i nasleduj mene.“
- Kaj kad bi on bil čul, je se ražalostil ar je bil kruto bogat.
- Kad bi pako bil videl Ježuš da je žalosten postal, reče: „Kak teško oni koji imaju penez vlezneju vu Božje kraljestvo!
- Ar je lekše da gamila čez vuho igle prejde kak da bogatuš vlezne vu Božje kraljestvo.“
- Rekli su pako koji su ga poslušali: „Anda gdo se more zveličiti?“
- Reče njim: „Koja su nemoguča pri ljudih, jesu moguča pri Bogu.“
- Reče pako Peter: „Nut, mi smo vsa ostavili ter smo tebe nasleduvali.“
- A on reče njim: „Stanovito velim vam: nikoga ni koj bi bil zapuščal hižu ali roditele ali bratju ali ženu ali decu zaradi Božjega kraljestva,
- pak ne bi bil prijel vu ovem vremenu vnogo više, a vu budučem svetu vekivečni žitek.“
- Vzel je pako Ježuš dvanajst i rekel njim: „Nut, mi idemo gore vu Jeruzalem i vsa se spuniju koja su po prorokih pisana od Sina Človečjega.
- Ar bude izdan poganinom i opsuvan i bičuvan i populjuvan
- i kad ga zbičuju, budu ga vmorili i tretji dan se gore stane.“
- A oni od vsega toga nikaj nesu razmeli i bile su njim zakrite ove reči i nesu razmeli kaj se je govorilo.
- Dogodilo se je pako kad bi se približaval k varašu Jeriko da je nekoj slepec sedel poleg puta i prosil almuštvo.
- I kad bi čul vnožinu ljudstva mimo prehađati, pital je kaj bi to bilo.
- A oni rekli su njemu da Ježuš Nazarenski mimo prehađa.
- I kričal je govoreči: „Ježuš, sin Davidov, smiluj se meni!“
- I koji su napred išli, karali su njega da bi mučal. On pako je vnogo jakše kričal: „Sin Davidov, smiluj se meni!“
- Postal je pako Ježuš i njega k sebi dopeljati zapovedal. I kad bi se bil približaval, pital je njega
- govoreči: „Kaj hočeš da ti včinim?“ A on reče: „Gospone, da vidim.“
- I reče njemu Ježuš: „Preglej! Tvoja vera je tebe zdravoga včinila!“
- I sproti je pregledal i nasleduval njega velikodičeči Boga. I vse ljudstvo, kad je to videlo, je Bogu hvalu davalo.
