Del IV.

Poželenjam ni treba služiti, nego vragu je se morati suprotstaviti, Bogu pako približavati ter med sobum ljubav zdržavati, nestanovite stvari naj se izruče previdnosti božanski.

1. Otkud jesu med vami boji i pravde? Otkud drugud nego iz vašeh poželenj koja vojuju vu vašeh kotrigih.
2. Vi poželjujete i ne dobite, vi vmarjate i jeste nenavidni i ne morete stignuti, vi se pravdate i vojujete i ne dobite zato kajti ne prosite.
3. Vi prosite i ne dobite kajti vi vu ovem zlem namenenju prosite da se vmiriju vaša poželenja.^*Vi poleg vsega vašega truda ne dobivate ono kaj poželjujete, iz strane kajti ne prosite za nje Boga, iz strane pako kajti samo zato prosite da morete vaša poželenja vtažiti, anda Bog naj bi vašem poželenjam bil na službu.
4. Vi lotriši, je li ne znate da prijatelstvo ovoga sveta je neprijalelstvo Božje? Koj goder anda bude hotel biti prijatel ovoga sveta, postane neprijatel Božji.
5. Ali štimate vi da Pismo zahman veli: „Ima duh koj vu vas stanuje, nagib k nenavidnosti.“?
6. Dapače, on podeljuje vekšu dobrohotnost zato veli ono: „Bog se suprotstavlja gizdavem, poniznem pako podeljuje milošču.“
7. Podložite se anda Bogu!^*Apoštol opomina neljubeče ljudi da se naj obrneju k Bogu. Suprotstavljajte se pako vragu^*Suprotstavljajte se skušavanjam vražjem. i on odbeži od vas!
8. Približavajte se k Bogu^*Po istinski i skrušeni pokori. i on se bude k vam približal! Očistete ruke, vi grešniki! I osnažete srca, vi dvojvrsneh mislih!^*Dvojvrsnoga srca jesu oni koji hočeju biti krščeniki, ali skupa svet neredno ljubiju ter tak svoje srce med Bogom i svetom deljiju.
9. Pokorete se,^*Rim 8,13; Gal 5,24. tugujte i plačite se! Vaš smeh naj se obrne na plač, a vaše veselje na žalost!
10. Ponizete se pred Gosponom i on vas bude izvisil.
11. Ne ogovarjajte jeden drugoga,^*Kak to ob tom gušče biva med krščeniki i, o, žalost, med istemi takaj navučiteli koji se med sobum pomenjšavaju. bratja! Koj ogovarja svojega brata, on ogovarja Zakon i sudi Zakon.^*Koj svojega brata, koj prav čini, ogovarja ali prevzetno sudi, on ogovarja i sudi zakon Božji poleg kojega on ravna svoje čine. V. Rim 2,1. Ako pako sudiš Zakon, tak nesi činitel, nego sudec Zakona.
12. Jeden je zapovednik i sudec koj more pogubiti i osloboditi.
13. Ti pako, gdo jesi koj sudiš bližnjega? Nut, sada vi koji velite: ,,Denes ali zutra pojdemo vu on varaš i tam se budemo zadržavali jedno leto i trguvali i dobiček činili.“
14. Vi koji ne znate kaj bude zutra.
15. Ar kaj je vaše živlenje? Je sumpor koj se za mal čas vidi i onda znikne. Namesto da bi rekli: „Ako Gospon bude hotel i mi budemo živeli, budemo ovo ali ono včinili.“
16. Sada se pako oholno znašate vu vašeh gizdostjah.^*Sada pako mislite i baračete tak oholno kak da od Boga zevsema nikaj ne bi viseli. Vsako takvo znašanje je hudobno.
17. Koj anda zna dobro činiti, pak ne čini, njemu je greh.

Objašnjenje

• *
  Vi poleg vsega vašega truda ne dobivate ono kaj poželjujete, iz strane kajti ne prosite za nje Boga, iz strane pako kajti samo zato prosite da morete vaša poželenja vtažiti, anda Bog naj bi vašem poželenjam bil na službu. ↩︎
• *
  Apoštol opomina neljubeče ljudi da se naj obrneju k Bogu. ↩︎
• *
  Suprotstavljajte se skušavanjam vražjem. ↩︎
• *
  Po istinski i skrušeni pokori. ↩︎
• *
  Dvojvrsnoga srca jesu oni koji hočeju biti krščeniki, ali skupa svet neredno ljubiju ter tak svoje srce med Bogom i svetom deljiju. ↩︎
• *
  Rim 8,13; Gal 5,24. ↩︎
• *
  Kak to ob tom gušče biva med krščeniki i, o, žalost, med istemi takaj navučiteli koji se med sobum pomenjšavaju. ↩︎
• *
  Koj svojega brata, koj prav čini, ogovarja ali prevzetno sudi, on ogovarja i sudi zakon Božji poleg kojega on ravna svoje čine. V. Rim 2,1. ↩︎
• *
  Sada pako mislite i baračete tak oholno kak da od Boga zevsema nikaj ne bi viseli. ↩︎