Svetoga Jakopa apoštola opčinski list

Bogatušem koji optršuju siromake nagraža se z oštrem fančenjem, siromake pako nagovarja na trpljivnost; odvrača od prisege. Betežniki naj se mažeju z oljem od redovnikov i grehe naj valuje jeden drugomu; kak jaka je molitva pravičnoga; bludeči naj se k istini nazad dopeljaju.

Nut, sada, vi bogatuši,^* plačite se i narekujte nad vašemi nevoljami koje zvrhu vas budeju nadošle!
Vaše bogatstvo je zegnjilo i vaše oprave jesu včinjene molov jestvine.
Vaše zlato i srebro bude pohrđavelo i njihova hrđa bude proti vam na svedočanstvo i vaše meso bude kakti ogenj požrlo. Vi jeste sebi kinč srditosti naspravili za poslednje dane!^*
Nut, plača delavcev koji vaše kotare jesu poželi, koju vi jeste vtrgnuli, kriči i njihov^* krič je došel do vuh Gospona šeregov.
Vi se jeste na Zemlji ožirali i vaša srca gojili za dan klanja.^*
Vi jeste pravičnoga opsudili i vmorili i on se vam ni suprotstavil.^*
Budite anda, bratja, trpljivni tja do Gosponovoga došestka! Nut, poljodelavec čaka na dragi zemlje sad ter se trpljivno nadeja doklam on rani i pozni dežđ prime.^*
Tak anda takaj vi budite trpljivni i objačete vaša srca ar se pribljižava Gosponov došestek!
Najte, bratja, jeden proti drugomu zdihavati da ne budete suđeni! Nut, sudec stoji pred vratmi!
Za peldu trpljivnosti vu trplenju i opšanljive smrti vzemite sebi, bratja, proroke koji jesu govorili vu Gosponovem imenu.
Nut, mi blažene ozivamo one koji jesu opstali!^* Od Jobove trpljivnosti jeste čuli i konec, kojega Gospon je dal, jeste videli^* ar Gospon je milosrden i milostiven.
Pred vsem pako, moja bratja, najte prisigati niti na Nebo niti na Zemlju niti z kakvum goder drugum prisegum. Nego vaše govorenje naj bude: „Je, je, ni, ni!“, da vu sud ne prepadnete.^*
Je gdo med vami žalosten, naj moli, je gdo dobre volje, naj popeva!
Je gdo med vami betežen, naj k sebi pozove redovnike Cirkve i ovi naj nad njim moliju^* i naj mažeju njega z oljem vu Gosponovem imenu.
I molitva vere^* bude betežniku na zveličenje^* i Gospon zlehkoti njega^* i ako je vu grehih, otpustiju se njemu.^*
Valujte anda jeden drugomu vaše grehe i molete jeden za drugoga da se zveličite ar stalna molitva pravičnoga vnogo premore.
Elijaš je bil človek trplenju podvržen, kak i mi, i on je molil molitvu da ne bi dežđilo na zemlju i ni dežđilo tri leta i šest mesecov.
I on je ipak molil i nebo je dalo dežđa i zemlja je doprinesla svoj sad.
Moja bratja, ako gdo zmed vas zabludi od istine^* i njega gdo obrne,
takov neka zna da koj grešnika obrne od njegvoga bludnoga puta, oslobodi njegvu dušu od smrti i pokrije vnožinu grehov.

Objašnjenje

*
Apoštol podiže se jošče jedenput na pokaranje krivičneh bogatušev. Po oveh razmevaju se takvi koji imaju vnogo imetka ter se njega ne vživaju dobro kakti Božji špani, nego si z njim samo na vgađanje svojeh poželenj služiju ali pak drugač vse svoje ufanje vu njega postavljaju. ↩︎
*
Vse vaše bogatstvo je niščetno i preminljivo niti vam nikaj ne more pomoči (Mat 6,19), vi vaše zlato i srebro jeste iz skuposti zahman puščali ležati i ova hrđa, najmre nepotrebuvanje vašega imetka, bude proti samem vam svedočanstvo vaše skuposti i bude vas kakti trapeči ogenj žrla kada jednoč budete svoju opačnost zevsema spoznali ar vi sebi jeste naspravili kinče na Sudnji dan na koj vas bude stignulo sudbeno dopitanje. ↩︎
*
Žnjačev, delavcov. ↩︎
*
Vi se jeste istom pitali da na Sudnji dan morete biti zaklani. ↩︎
*
Kakti trpljivna Krištuševa ovca vsa aldujuč da može dušu opčuvati. ↩︎
*
To je: on se trpljivno nadeja od setve do žetve, anda se takaj vi vaše celo živlenja vreme nadejajte. Vu Palestini rani dežđ pada po setvi vu listopadu, kesni dežđ kratek čas pred žetvum na koncu sušca. ↩︎
*
Pravične koji svoj tečaj vre jesu dovršili ter se sada nahađaju vu Nebesih; opstojte onda i vi takaj da njim primerno blaženi postanete. ↩︎
*
Vi jeste videli zmožen ishodek Joboveh nevolj, koj po pretrpljeneh mukah je postal mnogo srečneši nego je predi bil. ↩︎
*
Jakop ovde ne prepoveda vu opčinskom vsako slednje prisiganje, nego samo nepremišljeno vu navadnem živlenju. Da on potom ni prepovedal prisegu pred sudom, vre otud biva očivesto kajti govori od prisegih na Nebo itd., kakve prisege vu navadnem živlenju, ne pako pri sudih, naprvo dohađaju. ↩︎
*
Apoštol veli: „Nad njim“, kajti dok se nad njim moli, drži se zvrhu njega ruka. ↩︎
*
Molitva milošče, molitva po kojoj se podeljuje milošča. Reč „vere“ stoji ovde kak Rim 12,3, za miloščih dar pokehdob vera je zviranjek vseh milošč. ↩︎
*
Na njegvo vekivečno duše zveličenje i višeputi na zdravje tela ako je to Božja volja. ↩︎
*
Da njemu jakost na trpljivno podnašanje muk i pomoč vu smrtni stiski. ↩︎
*
Apoštol veli: „Ako on nad sobum jošče koj greh ima“, ako li bi se događalo da se njega jošče grehi držiju. Apoštol vendar to drži vre kakti včinjeno da betežnik načine na očiščavanje grehov od Cirkve prepisane je vre predi potrebuval nego prijemlje svetu krizmu, onda se njemu po svetem krizmanju otpuščaju neznani mali i skupa veliki grehi. Ako se pako betežnik ne bi mogao spovedati, tak je zadosta zvršeno požaluvanje zvrhu včinjeneh grehov. ↩︎
*
Od pravoga navuka ali od pravoga (kreposnoga) živlenja. ↩︎