Jeden del

Elektu i njejine sine potvrđava vu veri i ljubavi da se od krivovernikov ne zapeljuju i to nakratkom, ostala zadržeči doklam k njim dojde.

1. Stareši^*Ovak se imenuje Januš z stranum kajti je bil zvrhu drugeh biškupov, z stranum pako kajti je vre veliku starost bil stignul. V. 1Petr 5,1. izebrani gospi i njejinoj deci^*Ov list je bil pisan na stanovitu gospu imenom Elekta (‘Izebrana’) da nju vu krščanski istini i ljubavi vtvrdi i na bljudne navučitele pazljivu včini. koju ja vu istini ljubim, i ne samo ja, nego i vsi koji jesu spoznali istinu,
2. za volju istine koja vu nas ostaje i z nami bude naveke.^*To je: koju mi ljubimo zbog istine i krščanstva koje zapoveda bratinsku ljubav.
3. Z vami naj bude milošča, milosrdnost, mir od Boga, Oca, i od Krištuša Ježuša, Sina Očevoga, vu istini i ljubavi.^*Za volju istine i ljubavi, vere i ljubavi, poslene vere. Ova nas čini prikladne vsevdilj više milošče i milosrdnosti i ravno zato takaj više mira od Boga zadobiti. Svetoga Duha ne biva spomenek kajti se pod Ocom i Sinom skupa razmeva pokehdob je Duh Oca i Sina.
4. Jako se jesem raduval da ja med tvojum decum jesem našel nekoju^*Koja njega prez dvojmbe jesu bila pohodila. koja hodiju vu istini^*Poleg pravoga navuka. kak zapoved jesmo dobili od Oca.
5. I sada ja prosim tebe, gospa, ne kak da bi ja tebi novu zapoved pisal, nego kaj mi od početka^*Iz početka krščanskoga navučanja. jesmo imeli: da jeden drugoga ljubemo. Jan 13,34; 15,12.
6. I ovo je ljubav:^*Vu tom se opčinski iskažuje ljubav. da hodemo poleg njegveh zapovedih. Ar ovo je zapoved da, kak od početka jeste čuli, vu njoj hodite, 1Jan 2,7; 5,3,
7. ar^*Zvrhu skupsveska čtej zavjetek delu pretpostavljeni. vnogi zapeljiteli jesu izišli na svet koji ne valuju da Ježuš Krištuš je došel vu telu – takov je zapeljitel i Antikrst. 1Jan 4,2,3.
8. Glejte sami na se da ne pogubite kaj jeste opravili,^*Da po odstuplenju od vere ne pogubite blaženstvo, vekivečno zveličenje na koje po prijetju vere jeste dobili pravicu. nego da primete obilnu plaču.
9. Vsaki koj odstupljuje i ne opstaje vu Krištuševem navuku, nema Boga,^*Za Oca i prijatela. koj opstaje vu navuku,^*Vu grčkem: opstaje vu Krištuševem navuku. taj ima Oca i Sina.
10. Ako gdo k vam dojde, pak z sobum ne donese ov navuk, tak njega najte prijeti vu hižu niti ne pozdravlajte njega.^*Habajte se vsega opčenja z njim.
11. Ar koj njega pozdravlja, čini se delnika njegveh zleh delih.^*Vu pozdravlanju je se zadržavalo očituvanje da je gdo z onem kojega pozdravlja jednakoga namenenja ter njega kakti prijatela poštuje, a jošče više je se očituvalo po gostoljubnem prijemanju zbog toga je moral apoštol prepovedati obodvoje proti bljudnem navučitelom zvršavati.
12. Ja bi vam jošče vnoga imal pisati, ali nesem hotel po paperu i črnilu ar se ja ufam da k vam dojdem ter z vami z oči v oči budem govoril da vaše veselje bude obilno.
13. Pozdravljaju tebe deca tvoje izebrane sestre.^*Nekoje preštimane krščenice.

Objašnjenje

• *
  Ovak se imenuje Januš z stranum kajti je bil zvrhu drugeh biškupov, z stranum pako kajti je vre veliku starost bil stignul. V. 1Petr 5,1. ↩︎
• *
  Ov list je bil pisan na stanovitu gospu imenom Elekta (‘Izebrana’) da nju vu krščanski istini i ljubavi vtvrdi i na bljudne navučitele pazljivu včini. ↩︎
• *
  To je: koju mi ljubimo zbog istine i krščanstva koje zapoveda bratinsku ljubav. ↩︎
• *
  Za volju istine i ljubavi, vere i ljubavi, poslene vere. Ova nas čini prikladne vsevdilj više milošče i milosrdnosti i ravno zato takaj više mira od Boga zadobiti. Svetoga Duha ne biva spomenek kajti se pod Ocom i Sinom skupa razmeva pokehdob je Duh Oca i Sina. ↩︎
• *
  Koja njega prez dvojmbe jesu bila pohodila. ↩︎
• *
  Poleg pravoga navuka. ↩︎
• *
  Iz početka krščanskoga navučanja. ↩︎
• *
  Vu tom se opčinski iskažuje ljubav. ↩︎
• *
  Zvrhu skupsveska čtej zavjetek delu pretpostavljeni. ↩︎
• *
  Da po odstuplenju od vere ne pogubite blaženstvo, vekivečno zveličenje na koje po prijetju vere jeste dobili pravicu. ↩︎
• *
  Za Oca i prijatela. ↩︎
• *
  Vu grčkem: opstaje vu Krištuševem navuku. ↩︎
• *
  Habajte se vsega opčenja z njim. ↩︎
• *
  Vu pozdravlanju je se zadržavalo očituvanje da je gdo z onem kojega pozdravlja jednakoga namenenja ter njega kakti prijatela poštuje, a jošče više je se očituvalo po gostoljubnem prijemanju zbog toga je moral apoštol prepovedati obodvoje proti bljudnem navučitelom zvršavati. ↩︎
• *
  Nekoje preštimane krščenice. ↩︎