Jeden del

Januš piše Gajušu, želji njemu dobrogođenje i veseli se zbog njegvoga krščanskoga živlenja kak takaj zbog ljubavi proti vere nazvestitelom. Dijotrefeša kudi zbog njegve nevljudnosti, od Demetrijuša daje dobro svedočanstvo. Pozdravlenje.

1. Stareši preljubljenomu Gajušu^*V. Čin Apošt 19,29. kojega ja vu istini ljubim.
2. Preljubljeni, ja molim da se naj tebi vu vsem dobro godi ter zdrav budeš kak se takaj tvojoj duši dobro godi.
3. Ja se kruto jesem raduval kada jesu došli brati i tvojoj istini svedočanstvo davali kak ti vu istini hodiš.^*Poleg pravoga navuka.
4. Vekše od oveh nemam veselje kak kada čujem da moja deca vu istini hodiju.
5. Preljubljeni, ti verno baračeš vu tom kaj činiš nad bratmi i to nad putniki
6. koji jesu davali svedočanstvo od tvoje ljubavi pred skupčinum, ti dobro činiš gda nje od sebe tak sprevađaš kak se dostoji pred Bogom^*V. Čin Apošt 15,3; Rim 15,24.
7. ar oni jesu za volju njegvoga imena izišli^*Zbog nazveščanja krščanstva kakti vere nazvestniki. i nikaj nesu dobili od poganinov.^*Kojem jesu prodekuvali.
8. Anda se mi moramo za ovakve vzimati da budemo skupdelavci istine.
9. Ja bi morebiti takaj na skupčinu bil pisal, ali Dijotrefeš, koj hoče med njimi biti prvi, ne prijemlje nas.^*Oholni Dijotrefeš koj štima da vu svojem preštimanju kaj zgubiva kada vere nazvestiteli dohađaju, on nas ne prijemlje i skupčinu odvrača da nas ne bi prijela.
10. Zbog toga hoču ja njemu, kada dojdem, njegva dela, koja on čini, spočitati pokehdob nas on po zleh rečih oteplje, ali ni z tem jošče ni zadovoljen, nego niti on sam ne prijemlje brate i onem koji nje prijemljeju, brani i nje iz skupčine ishitava.
11. Preljubljeni, ne nasleduj zlo, nego dobro! Koj čini dobro, je iz Boga,^*Božje dete. koj čini zlo, on ni Boga spoznal. 1Jan 3,6,10.
12. Od Demetrijuša jesu vsi i istom istina dobro svedočili, ali i mi takaj od njega svedočimo, a ti znaš da je naše svedočanstvo istinsko.
13. Ja bi jošče vnoga imal tebi pisati, medtemtoga po črnilu i paperu nesem hotel tebi pisati.
14. Ufam se pako da tebe naskorom budem videl i budemo z oči v oči govorili.
15. Mir budi z tobum! Pozdravljaju tebe prijateli! Pozdravi prijatele od imena do imena!

Objašnjenje

• *
  V. Čin Apošt 19,29. ↩︎
• *
  Poleg pravoga navuka. ↩︎
• *
  V. Čin Apošt 15,3; Rim 15,24. ↩︎
• *
  Zbog nazveščanja krščanstva kakti vere nazvestniki. ↩︎
• *
  Kojem jesu prodekuvali. ↩︎
• *
  Oholni Dijotrefeš koj štima da vu svojem preštimanju kaj zgubiva kada vere nazvestiteli dohađaju, on nas ne prijemlje i skupčinu odvrača da nas ne bi prijela. ↩︎
• *
  Božje dete. ↩︎