Svetoga Judaša Tadejuša apoštola opčinski list

Opomina da vu jedenkrat predanoj veri budeju stalni suprot onem nepobožnem i nasladnem koji se podižeju. Zatem pridaje način muk koj bude primeren onem z kojemi jesu bili pohođeni Židovi i Sodomitanci pokehdob se niti oni, kak niti ovi, nikoga ne bojiju, nego se razvuzdano puščaju vu vsaku tela nasladnost i nje k razlučnem stvarjam prispodablja ter nje spomenuje i Enoka i apoštolov proročanstvih koja od njih jesu nazveščali.

Judaš, Ježuša Krištuša sluga, brat pako Jakopov, na one koji jesu od Boga Oca ljubljeni i po Krištušu Ježušu obdržani i pozvani.^*
Naj vam bude milosrdnost i mir i ljubav vu obilnosti!
Preljubljeni, pokehdob ja pun skrbih jesem vam od vašega opčinskoga zveličenja pisati, tak jesem držal za potrebno vas pismeno opomenuti da vojujete za veru koja jednoč je predana svecom.
Ar se nuter jesu vrinuli nekoji ljudi koji za ov sud vre zdavna jesu bili naprvo odlučeni,^* nepobožni koji milošču našega Boga preobračaju na vtišenje svojeh poželenj^* i jedinoga Zapovednika, našega Gospona Ježuša Krištuša, tajiju.^*
Ja pako hoču vas, akoprem vre vsa znate, na to spomenuti da je doisto Zveličitel svojega puka iz egiptonske zemlje oslobodil, potlam pako neverne pogubil. 4Moj 14,37.
Takaj angele, koji svoje poglavarstvo nesu obdržali, nego svoj stan jesu zapuščali, je na Dan velikoga suda z vekivečnemi sponami vu tmici obdržal. 2Petr 2,4.
Ravno tak Sodoma i Gomora i pokrajni varaši, koji z spodobnem načinom jesu praznuvali ter se vu nenaravsku nasladnost povdali, jesu postavljeni na peldu pokehdob kaštigu vekivečnoga ognja podnašaju. 2Petr 2,6.
Spodobno bude se događalo onem koji oskrunuju meso,^* zamečeju poglavarstvo i blazniju veličanstvo.^*
Pokehdob vendar isti Mihalj arkangel, kada bi se z vragom bil pregovarjal i za Mojžeševo telo bil svadil, ne se podstupil sud blaznosti izreči, nego je rekel: „Gospon naj zapove tebi!“^*
Ovi pako zmir blazniju kaj ne razmeju, ono pako kaj oni od narave kakti nema živina znaju, biva na njihovo skvarjenje.
Jaj njim, ar oni hodiju po Kajnovem putu^* ter se jesu predali Balaamovi bludnosti i pohlepnosti dobička i pogibljeju vu Koreovi punti.^*
Ovi jesu gnjusnost vu svojeh goščenjih, ožiraju se prez srama, sami sebe pitaju, jesu oblaki prez vode koji se od vetrov okolo goniju, jesensko drevje,^* neplodno, dvakrat mrtvo,^* iskorenjeno,^*
slapi zburkanoga morja koji van peniju svoje sramote,^* zvezde bludeče^* kojem mrak vekivečneh tmic je obdržan.
Od oveh pako je takaj prodekuval Enok, sedmi od Adama,^* pokehdob je rekel: „Nut, ide Gospon z svojemi jezermi svecov
sud držat zvrhu vseh i kaštigat vse nepobožne zbog vseh njihoveh nepobožnosti del koja jesu zvršili i zbog vseh blaznostih koje nepobožni grešniki jesu zgovorili suprot Bogu.“
Oni jesu morgujuči, zmir pritužujuči se, poleg svojeh poželenj živuči ljudi. Njihova vusta govoriju oholne reči i oni se prilizavaju ljudem zaradi dobička.
Vi pako, preljubljeni, spomenete se iz rečih koje jesu bile naprvo povedane od apoštolov našega Gospona Ježuša Krištuša
koji vam jesu predali da vu poslednjeh časih budeju došli pšanljivci koji poleg svojeh nepobožneh poželenj živeju. 2Petr 3,3; 1Tim 4,1.
Ovo jesu oni koji sami sebe odružuju,^* telovni jesu niti nemaju duha.^*
Vi pako, preljubljeni, ne dozidavajte se čvrsto na vašoj najsveteši veri, molete vu Svetem Duhu!^*
Zdržavajte se vu Božjoj ljubavi i čakajte na milosrdnost našega Gospona Ježuša Krištuša na vekivečni žitek!
I ove kaštigujte^* poklamkam nje jeste presudili,
one pako oslobodete pokehdob nje iz ognja strgavate.^* Drugem pako smilujte se vu strahu^* ter takaj onu od mesa oskrunjenu halju odurjavajte.^*
Onomu pako koj vas od greha opčuvati i pred lice svoje dike neoskrunjene ter z veseljem je moguč postaviti pri došestku našega Gospona Ježuša Krištuša,
njemu, jedinomu Bogu, našemu Zveličitelu po Ježušu Krištušu, našem Gosponu, naj bude dika i veličanstvo, zmožnost i oblast pred vsakem vekom i sada i na vse veke vekov. Amen.

Objašnjenje

*
Na one koje Otec po poslanju svojega Sina je ljubil, Ježuš Krištuš po svojem Evangelijumu pozval i po svojoj milošči vu veri i ljubavi je obdržal. ↩︎
*
Nakuliko je Bog njihovu svojvoljnu nepokornost previdel. ↩︎
*
Vu božansku milosrdnost grešiju. ↩︎
*
Po svojem zločestem živlenju. ↩︎
*
Svoje telo po nasladnosti. ↩︎
*
Navlastito duhovno poglavarstvo. V. 2Petr 2,10. ↩︎
*
Bog kaštiguj tebe! Angel je na Božju zapoved Mojžeševo truplo zakopal vu nekojoj dolici zemlje Moab da njegvo pokopališče nigdo ne bi mogel najti (3Moj 34). To pako je Bog zato tak odredil da jednoč ne bi morebiti Izraelci zabludili ter ovomu velikomu zapovedniku božansko poštuvanje iskažuvali. Ovo božansko odlučenje je bilo vragu suprotivno, on anda je hotel z silum imati ovo truplo da Izraelce napelja vu bolvanomolstvo. Mihalj arkangel je se njemu suprotstavil, tak vendar da proti njemu ni nikakvu izvustil blaznost, nego to je prepuščal Bogu. Ov sveti apoštol je hotel potom to reči: „Ako angelski poglavar Mihalj niti vraga, koj vendar je ista hmanjica, ni hotel opsuditi, nego sud i kaštigu je izručil Bogu, kulike anda kaštige moraju vredni biti oni krivi navučiteli koji se podstupljuju poglavarstvo od Boga određeno blazniti.“ ↩︎
*
Koj svojega brata Abela je vmoril iz jala. ↩︎
*
Kakti puntari spodobno Koreu. V. 4Moj 16,1,31 i sl. ↩︎
*
To je prez sada. ↩︎
*
Jednoč kajti sada ne doprinašaju, drugoč kajti sama vu sebi gineju. ↩︎
*
Kajti stalni temelj i tlo, svetu Cirkvu zapuščaju. ↩︎
*
Kak goder morski slapi van ishitavaju svoje pene, ravno tak bludni navučiteli na svetlo postavljaju svoje zločeste navuke. ↩︎
*
Koje vu bludnost napeljavaju one, koji nje nasleduju. ↩︎
*
Sedmi vu redu patrijarka. ↩︎
*
Nove nasledbe započimlju, sebe od Cirkve odlučuju. ↩︎
*
Samo svoja človečanska namišlenja, namenenja, ne pako navuke i Krištuševoga Duha nasleduju. ↩︎
*
Molete marljivo z poniznostjum i zaufanostjum. ↩︎
*
Ove bludne navučitele. ↩︎
*
Verno verujuče iz skvarjenja pogibeli. ↩︎
*
Onem, koji jesu prepali vu bludnost, smilujte se iz straha, da ne bi sami vu bludnost prepali. ↩︎
*
Odurjavajte vsaku telovnu nasladnost kak zamazanu halju. ↩︎