Svetoga Petra apoštola list drugi — Del II.

Med ljudstvom^* pako jesu bili takaj krivi proroki, kak takaj med vami budeju lažljivi navučiteli koji budeju vpeljavali navuke pogublenja ter onoga koj je nje otkupil, Gospona, budeju tajili^* i na se naglo pogublenje navlekli.
I vnogi budeju nasleduvali njihove praznosti^* po kojeh se put istine bude blaznil^*
i vu skuposti budeju z vami z mišljenemi rečmi tržili, kojeh opsuđenje vre zdavna se ne mudi i njihovo pogublenje ne spi.
Ar ako Bog ni miluval angele koji jesu zagrešili,^* nego je nje z peklenskemi lanci^* dole vu strašnu pekla prepast potegnul i predal na muke da se za Sud zadržiju,^* Judaš 6,
i prvi svet^* ni miluval, nego je samo, osmoga,^* Noema, nazvestitela pravice, opčuval gda je potop na svet nepobožneh puščal dojti, 1Moj 7,1,
i varaše Sodomitancev i Gomorejancov je na pepel obrnul i na skončanje opsudil ter tak je nje za peldu postavil onem koji budeju zlo činili, 1Moj 19,25,
a pravičnog Lota, koj po krivičnosti nepobožneh i njihovem nečistem živlenju je bil optršen, je oslobodil
ar poleg vsega kaj je videl i čul, je ostal pravičen akoprem je prebival med onemi koji njegvu pravičnu dušu od dneva do dneva jesu trapili z krivičnemi deli,^*
Gospon zna pobožne osloboditi od skušavanja,^* krivične pako za dan Suda obdržati k traplenjam,
navlastito pako one koji vu nečisteh poželenjih za telom hodiju,^* gospodstvo zametavaju i vu svojoj prevzetnosti i sameh sebi dopadanju ne bojiju se vpeljavati krive navuke i blazniti.^*
Pokehdob vendar angeli, akoprem vu jakosti i moči jesu vekši, ne dopitavaju jeden zvrhu drugoga prokletstva sud.^*
Ovi pako^* jesu kakti nerazumna živina koja od narave jesu odlučena vlovljena i skončana biti blazniju, koja ne razmeju^* i vu svojoj pokvarjenosti budeju poginuli.
Oni budeju prijeli plaču krivičnosti pokehdob nasladnost jednoga dana preštimavaju za blaženost, jesu sramota i vu nasladnosti vtopljeni gnjusi i ožiraju se z svojemi goščenji med vami,
oni imaju oči pune lotruvanja^* i neprestajučeh grehov, oni vabiju k sebi nestalne duše, njihovo srce je zvučeno vu skupnosti, oni jesu deca prokletstva,
oni jesu zapustili pravi put i bludiju, oni se jesu povdali na put Balaama, Bozorovoga sina koj je ljubil plaču krivice,
ali je prijel kaštigu za svoju bedastoču:^* k jarmu privčeno nemo živinče je govorilo z človečjem glasom ter je zdržavalo nespametnost proroka.^*
Ovi jesu zdenci prez vode i megle od vihra okolo grane, kojem mrak (vekivečne) tmice je obdržan^*
ar z oholnostjum govoriju nečemurne stvari i vabiju po telovneh poželenjah k nasladnosti one koji se komaj jesu vugnuli onem koji živeju vu bludnosti,
oni njim obečaju sloboščinu pokehdob vendar sami jesu sužnji skvarjenja ar od koga se gdo oblada, onoga je on suženj.^*
Ar^* ako oni koji se po spoznavanju našega Gospona i Zveličitela Ježuša Krištuša jesu vugnuli nasladnostjam od oveh ipak zapleteni obladaju se, tak njim poslednja bivaju gorša od prvešeh, Mat 12,45; Žid 10,25 i sl.,
pokehdob za nje bi bolje bilo da put pravice ne bi nigdar bili spoznali, kak da mi, poklamkam njega jesu spoznali, odvračaju se od one svete zapovedi koja njim je dana.
Ali se njim događa poleg onoga istinskoga prirečja: „Pes se povrača k onomu kaj je zbluval.“ i „Okupljena prasica kalja se ipak vu kaluži blata.“^*

Objašnjenje

*
V. 3Kralj 22,6; Ezek 13,2; 22,25.28. ↩︎
*
Po lebudnem navuku i ravno takvem živlenju. ↩︎
*
Duhovne i telovne praznosti. ↩︎
*
Prave navuke i pravo živlenje budeju po svojem otpadanju blaznili kakti lažljive i vu bludnost pelajuče. ↩︎
*
Započetno svete angele koji ipako potlam jesu po gizdosti zagrešili ar početek vsakoga greha je gizdost. Redovn 10, 15. ↩︎
*
Z lanci z kojemi nje pekel drži zvezane niti nje več nigdar od sebe ne bude pustil, z vekivečnemi lanci. Vu grčkem: z lanci mraka (nesreče). ↩︎
*
Reči „i na muke predal“ ne nahađaju se vu grčkem, ništar manje od samoga sebe razmevaju se. Vragi držiju se za opčinski sud kajti se njihova krivnja po zapelavanju ljudih vsevdilj povekšava i zato takaj budeju suđeni. ↩︎
*
Pred potopom. ↩︎
*
Noe je bil osmi ar Bog je zvun njega pomiluval njegvu ženu, njegve tri sine i njihove tri žene. ↩︎
*
Vu grčkem: ar pokehdob je on, pravični, med njimi stanuval, je bila njegva pravična duša od dneva do dneva trapljena po njihoveh hudobneh delih koje on je moral gledati i poslušati. ↩︎
*
Ar pobožni pripomažeju njegvem miloščam. ↩︎
*
Koji telovnem poželenjam vgajaju. ↩︎
*
Na odelenje od svetske i duhovne oblasti, od poglavarstva napeljavaju i nje (poglavarstvo) blazniju kakti takvo kojemu se ni morati podlagati. Vu grčkem: ne bojiju se poštuvanja vredno (gospodstvo) blazniti. ↩︎
*
Pokehdob vendar angeli, najmre dobri, koji akoprem jesu mogučneši nego oni puntarski, vendar sud prokletstva ne zgovarjaju zvrhu angelov, to je zvrhu puntarskeh. V. Judaš r. 9. Ako anda dobri angeli istom niti vrage nesu hoteli vu svojem imenu blazniti, kuliko kaštige vredneši jesu oni odmetniki koji blazniju poglavarstvo. Vu grčkem čteje se: pokehdob vendar angeli, akoprem vu jakosti i moči jesu vekši, ne smeju pred Gosponom zvrhu njih (poglavarov, ako se oni svojem dužnostjam jesu zneverili) izgovoriti prokletstva sud. Primerom ovoga reda preteže se sveti Peter na one angele koji jesu nadstojniki, angeli čuvari celeh orsagov i pukov (v. Dan 10). Ovi isti angeli čuvari ne blazniju pred Gosponom poglavare njim izručeneh držav akoprem oni zapuščaju svoje dužnosti kakti takve kojem se ne bi bilo morati podložiti, od kojeh bi morati odstupiti. ↩︎
*
Ovi nepokorni, za nasladnostjami hlepeči ljudi (krivi navučiteli i njihovi nasledniki). ↩︎
*
Kojeh nespamentost je zevsema kaštige vredna kajti oni po svojeh poželenjih prečke postavljaju svojem boljšem spoznavanjam. ↩︎
*
Poželjive, nasladne oči. ↩︎
*
Vu grčkem: za svoje prekršenje. ↩︎
*
Balaam je se dal po darih moabitskoga kralja Balaka podmititi da Izraelce napelja na nečistoču i bolvanomolstvo. V. Moj 22,25; 24,14; 31,16. V. onde takaj od govoreče oslice. ↩︎
*
Ovi ljudi jako vkanjuju vu nadejanju koje si človek od njih kakti krščenikov i navučitelov načinja, ali oni budeju z vekivečnum nesrečum kaštigani. V. Tob 4, paska 3. ↩︎
*
Oni obečaju sloboščinu i blaženstvo pokehdob vendar oni i njihovi nasledniki jesu sužnji greha i vekivečnomu skvarjenju podvrženi ar se oni od svojeh poželenj obladaju ter jesu njihovi sužnji, njihova sloboščina je razvuzdanost koja je vsigdar z najognjušljivešem sužanstvom složena. V. Jan 8,34; Rim 6,16.20. ↩︎
*
Preteže se na „sužnji skvarjenja“. Oni prepadaju vu skvarjenje, vu vekivečno prokletstvo ar itd. ↩︎
*
Ovak se povračaju oni koji se znovič vu grehe povdavaju, vu svoju starinsku nečistoču niti njim to nikaj ne hasni da se od nje za gdekoj čas jesu opčuvali, dapače potom vnogo bolje pokažuju vse svoje nepoboljšljivo, vu čutenja vtopljeno namenenje. Prveše prirečje nahađa se vu Knjigi prirečjih 26,11, a zadnješe više puti naprvo dohađa vu pismih starinskeh piscov. ↩︎