Krištuš prispodablja Kraljestvo nebesko sejaču, goručoj svetnici, muštardovomu zrnu. On vtišuje morje.
- I on je ipak počel vučiti kraj morja i zebrala se je k njemu velika vnožina natuliko da je on vu ladjicu stupil i sedel na morju, vse pako ljudstvo je bilo vuz morje na zemlji.
- I vučil je nje vu prilikah vnoga i govoril je njim vu svojem navuku:
- „Poslušajte! Nut, nekoj sejač izišel je van sejat.
- I kad bi sejal, opalo je nekoje kraj puta i došle su nebeske ptice ter su nje pozobale.
- Nekoje pako je opalo na kamenita gde ni imalo vnogo zemlje i je sproti niknulo zato kajti ni imalo gliboke zemlje.
- I kad je Sunce izišlo, je se potparilo i kajti ni imalo korenja, je vsehnulo.
- A nekoje je opalo med trnje i trnje je odraslo i nje zadušilo ter ni dalo sada.
- Nekoje pako je opalo v dobru zemlju i dalo je sada koj je izišel i rasel i doprineslo je jedno trideset i jedno šezdeset i jedno stokrat tuliko.“
- I on je rekel: „Koj ima vuha na poslušanje, naj posluša!“
- I kad je on sam bil, pitali su njega za priliku oni dvanajst koji su z njim bili.
- I on reče njim: „Vam je dano znati skrovnosti Kraljestva Božjega, onem pako koji su vani, vsa se vu prilikah naprvo stavljaju
- da oni gledajuči gledaju i ne vidiju i poslušajuči poslušaju i ne razmeju, da se gda ne obrneju i otpustiju se njim grehi.“
- I on reče njim: „Ne razmete ovu priliku? A kak bute vse prilike razmeli?
- Sejač je on koj reč seje.
- Oni pako kraj puta, jesu oni koji, kad se reč seje i kad ju poslušaju, mahom dojde Šatan i odnaša reč koja je vu njihovem srcu posejana.
- Ravno tak su takaj oni na kamenitem posejani koji, kad su čuli reč, sproti ju z veseljem prijemlju
- i nemaju korenja vu sebi, nego su vremeniti. Zatem, kad nastane traplenje ali preganjanje zaradi reči, sproti se spačiju.
- I drugi jesu koji su vu trnje posejani: ovi jesu koji reč poslušaju,
- ali skrbi ovoga sveta i vkanljivost bogatstva i poželenja proti drugem stvarjam zavlečeju se nuter i zaduše reč i ona ostane neplodna.
- Koji su pako vu dobru zemlju posejani, jesu oni koji poslušaju reč i prijemlju i sad doprinašaju, nekoja trideset i nekoja šezdeset i nekoja stokrat tuliko.“
- I on reče njim: „Je li se zato vužiže sveča da se pod drevenku dene? Ali pak pod postelju? Je li ne zato da se na svečnjak postavi?
- Ar nikakve ni skrovnosti koja se ne bi očituvala niti se nikaj ne včini skritoga kaj ne bi na svetlo došlo.
- Koj ima vuha na poslušanje, naj posluša!“
- I on reče njim: „Zapametete si kaj čujete: z kakvum merum budete merili, z takvum se vam bude nazad merilo, dapače se vam privrže.
- Ar koj ima, da se njemu, a koj nema, i ono kaj ima, vzeme se od njega.“
- I on reče: „Tak je Kraljestvo Božje kak da bi človek seme vu zemlju vrgel
- i on makar spal ali se gore stal po noči i po dnevu, seme nikne i odraste gda on ne zna.
- Ar zemlja sama ob sebi plodi, prvič travu, zatem lat, potlam ispunjen žitek vu lati.
- I kad je naprvo donesla sad, onda on sproti pusti vu njega srp ar je žetva nastala.“
- I on reče: „K čemu budemo prispodobili Kraljestvo Božje? Ali vu kakvoj priliki budemo nje naprvo stavili?“
- Ono je kakti muštardovo zrno koje, kad se v zemlju poseje, med vsem semenjem je najmenjše na zemlji.
- I kad je posejano, nikne i od vsakoga povrtelja vekše postane i spusti velike veje natuliko da se pod njegvum sencum moreju nebeske ptice gnjezditi.“
- I vnogeh takveh prilikah je njim govoril reč kak bi ga mogli poslušati.
- Prez prilik pako ni njim govoril, posebno pako je svojem vučenikom vsa tolnačil.
- I on isti dan, kad je bil večer nastal, reče njim: „Hodmo prek na drugu stran!“
- I kad bi oni bili ljudstvo otpustili, vzeli su ga, tak kak je bil, vu ladju. Bile su takaj druge ladje z njim.
- I podignul se je silni viher i hital je slape vu ladju natuliko da se je vre napunjavala ladja.
- On pako je bil na krmi i spal na vanjkušu. I zbudili su njega i rekli njemu: „Mešter, kaj to na te ne spada da mi pogibljemo?“
- I on se gore stane, zagrozi se vetru i reče morju: „Muči! Zanejmi!“ I vtišil se je veter i nastala je velika tišina.
- I on reče njim: „Kaj se bojite? Kaj jošče nemate vere?“ I oni se jesu kruto jako bojali i rekli su jeden proti drugomu: „Gdo, štimaš, je to pokehdob su njemu veter i morje pokorni?“
