- Hvalna pesem samomu Davidu
CXLIV.
Izvišaval budem tebe, Bog moj kralj, i ime tvoje vsigdar i na veke vekov hvalil!
- Vsaki dan budem tebe hvalil i ime tvoje vsigdar i na veke vekov častil.
- Velik je Gospon i nezmerne hvale vreden i velikoča njegova je nedokončna.
- Vsa pokolenja budu dela tvoja hvalila i vsamogučnost tvoju nazveščala.
- Od veličanstva dike svetosti tvoje budu govorili i čuda tvoja povedali.
- I krepost strahoviteh del tvojeh budu pripovedali i velikoču tvojuobznanuvali.
- Spomenek tvoje obilne dobrote budu na puna vusta govorili ter se zaradi pravice tvoje veselili.
- Milostiven i milosrden je Gospon, strpljiv i velikoga smiluvanja.
- Gospon je vsem dobrotiven i smiluvanje njegovo pruža se zvrhu vseh del njegoveh.
- Naj te hvaliju, Gospone, vsa dela tvoja i sveci tvoji naj te blagoslivljaju!
- Povedali budu diku kraljestva tvojega i od mogučnosti tvoje govorili!
- Da znanu včine sinom človečanskem mogučnost tvoju i diku veličanstva kraljevstva tvojega.
- Kraljestvo tvoje je kraljestvo vseh vekov i gospodstvo tvoje preteže se od pokolenja do pokolenja.
Veren je Gospon vu vseh rečih svojeh i svet vu vseh delih svojeh.
- Gospon vpira vse koji opadaju i vzdiguje vse koji su opali.
- Vseh oči čekaju na te, Gospone, i ti njim daješ hranu njihovu ob vremenu prigodnem.
- Ti otpiraš ruku tvoju i zasitiš vse kaj žive z blagoslovom tvojem.
- Gospon je pravičen vu vseh putih svojih i svet vu vseh delih svojeh.
- Gospon je blizu vseh koji ga zazivaju, blizu vseh koji ga vu istinitosti zazivaju.
- On bude onem koji se ga boje, volju njihovu ispunil i prošnje njihove posluhnul ter njim pomagal.
- Gospon čuva vse koji ga ljubiju, vse pako grešnike bude skončal.
- Vusta moja budu hvalu Gosponovu govorila i vse meso naj sveto ime njegovo hvali vsigdar i na veke vekov.
