Aleluja
CXVII.
- Hvalete Gospona ar je dobrotiven, ar milosrdnost njegova je vekivečna.
- Naj reče sad Izrael da je dobrotiven, da milosrdnost njegova je vekivečna.
- Naj reče sada hiža Aronova da milosrdnost njegova je vekivečna.
- Naj rečeju sada vsi koji se Gospona boje da milosrdnost njegova je vekivečna.
- Vu traplenju zazival sem Gospona i posluhnul je mene i prostoga činil.
- Gospon je pomočnik moj, ne bojim se kaj bi meni človek činil.
- Gospon je pomočnik moj i budem moje (preobladane) neprijatele za nikaj držal.
- Bolje se je zaufati vu Gospona kak zanašati se na človeka.
- Bolje je ufati se vu Gospona, kak ufati se vu poglavare.
- Vsi narodi ophađali su mene, ali vu imenu Gosponevem fantil sem se nad njimi.
- Od vseh stran jesu me opkoljili, ali vu imenu Gosponovem fantil sem se nad njimi.
- Opstrli su me kakti pčele i plahnuli su kakti ogenj med trnjem, ali vu imenu Gosponovem fantil sem se nad njimi.
- Bil sem sunjen i porivan da bi opal, ali Gospon je mene zdržal.
- Gospon je jakost moja i hvalopesma moja, on je zveličitel moj postal.
- V šatorih pravičneh (razišel se je) glas veselja i zveličenja.
- Desnica Gosponova iskazala je moč svoju, desnica Gosponova izvisila je mene, desnica Gosponova iskazala je moč svoju.
- Ne budem vumrl, nego živel i dela Gosponova budem pripovedal.
- Zevsema jako kaštigal je mene Gospon, smrti vendar ni mene predal.
- Otprete meni vrata pravičnosti i vnuter zajduči zahvalil budem Gosponu.
- Ovo su vrata Gosponova, pravični budu čez nje prehađali.
- Ja ti budem zahvalil da si me posluhnul i zveličitel moj postal.
- Kamen kojega su zidari zahitili, ov postal je glava vugla.
- Od Gospona je to včinjeno i je čudnovito vu očih našeh.
- Ovo je den kojega Gospon je načinil, radujmo se i veselemo se vu njem.
- O, Gospone, pomagaj mene, o, Gospone, pusti po sreči iti!
- Blagoslovljen budi koj dohođa vu imenu Gosponovem. Blagoslovili smo vas iz hiže Gosponove,
- Bog je Gospon i iskazal se je nam. Naredite svetečni den z gustem kitjem tja do vuglov oltara.
- Ti si moj Bog i budem ti zahvalil, Ti si Bog moj i budem te izvišaval. Zahvalil budem tebi da si me posluhnul i zveličitel moj postal.
- Hvalte Gospona ar je dobrotiven, ar milosrdnost njegova je vekivečna.
