Šoltar CXVIII.

Aleluja

CXVIII.

Alef^*

Blaženi nevtepeni na putu koji poleg Zakona hode Gosponovoga.
Blaženi koji razmišljavaju svedočanstva Gosponova i njega iz celoga srca iščeju.

3.^* Ar koji zlo delaju, ne hodiju po puteh njegoveh.

Ti si zapovedal zapovedi tvoje zevsema čuvati.
O, da bi se puti moji tak ravnali da bi pravice tvoje obdržaval.
Onda ne budem opšanjen kada budem imel vse zapovedi tvoje pred očmi mojemi.
Zahvalil budem tebi vu pravednosti srca pokehdob sem se tvoje tak pravične zapovedi navčil.
Čuval budem opravdenja tvoja, ne zapusti me zevsemvsega.

Bet

Vu čem popravi mladenec puta svojega? Po obdržavanju rečih tvojeh.
Iz celoga srca mojega iskal sem tebe, ne pusti me od zapovedih tvojeh odstupiti.
Vu srcu mojem skril sem govorenja tvoja da ne zagrešim proti tebi.
Blagoslovljen jesi, Gospone, navči me opravdenja tvoja.
Z vusnicami mojemi nazvestil budem vse zapovedi vust tvojeh.
Na putu svedočanstvih tvojeh jesem se veselil bolje kakti nad vsem bogatstvom.
Vu zapovedih tvojeh budem se privučal i premišljaval pute tvoje.
Opravdenja tvoja budem (z veseljem) razmišljaval ter iz rečih tvojeh ne budem se spozabil.

Gimel

Podelji slugi tvojemu da dugo živem i reči tvoje držim.
Otrpi oči moje i premišljaval budem čudnovita vu zapovedi tvojoj.
Ja sem prihodnik na Zemlji, ne skrivaj pred menum zapovedi tvoje.
Poželela je duša moja hlepeti za zapovedjami tvojemi vsako vreme.
Pokaral si gizdave, prokleti koji od zapovedih tvojeh odstupljuju.
Odvrni od mene opšanost i zametavanje pokehdob sem svedočanstva tvoja iziskaval.
Ar poglavari vseli su se skupa i proti meni govorili, sluga pako tvoj privučal se je k opravdenjam tvojem.
^*Ar i svedočanstva tvoja jesu razmišljavanje moje i opravdenja tvoja moj tolnač.

Dalet

Prilepila se je duša moja k zemlji, oživi me poleg reči tvoje.
Obznanil sem tebi pute moje i posluhnul si mene: vuči me opravdenja tvoja.
Vuči me puta opravdenjih tvojeh i privučal se budem k čudam tvojem.
Dremala je duša moja pred dodihavanjem, objači me vu rečih tvojeh.
Puta^* nepravičnosti odvrni od mene i^* smiluj se meni poleg zapovedi tvoje.
Izebral sem puta istine i na zapovedi tvoje nesem pozabil.
Gospone, svedočanstvih tvojeh se držim, naj me osramotiti.
Po putu zapovedih tvojeh tekel sem pohekdob si rasprostranil srce moje.

Postavi meni, Gospone, zapoved tvoju, puta opravdenjih tvojeh i budem ga vsigdar iziskaval.
Podelji mi razuma i premišljaval budem zapoved tvoju i obdržaval ju budem iz celoga srca mojega.
Zapeljaj me na stezu zapovedih tvojeh ar se[m] nju želel.
Nagni srce moje k svedočanstvam tvojem, a ne k skuposti.
Odvrni oči moje da ne vide čalarnost, oživi me na putu tvojem.

38.^* Potvrdi reč tvoju pri slugi tvojem po strahu tvojem.

Vzemi od mene opšanost koje se bojal jesem ar sudi tvoji jesu vugodni.
Nut zaželel sem zapovedi tvoje, oživi me z pravicum tvojum.

Vav

Gospone, pusti dojti zvrhu mene milosrdnost tvoju i pomoč tvoju poleg reči tvoje.
Da budem kaj odgovoriti imel onem koji mi spočitavaju da se na govorenja tvoja zanašam.
Nikak ne vzemi zevsemvsega reč istine od vust mojeh ar se na odluke tvoje ves zanesel jesem.
I čuval budem zapovedi tvoje vsigdar, i naveke i na veke vekov.
(Tak) budem ja prez skrbi hodil pokehdob zapovedi tvoje (ispuniti) iskal jesem.
I govoril sem od svedočanstvih tvojeh vu nazočnosti kraljev i nisem se sramuval.
I z veseljem premišljaval sem zapovedi tvoje koje sem ljubil.
I zdigal sem ruke moje proti zapovedjam tvojem, koje sem ljubil, i opravdenjam tvojem.

Zain

Spomeni se iz tvoje slugi tvojemu (dane) reči z kojum si meni ufanje dal.
Ova je mene vu poniženju mojem obatrivela ar reč tvoja je mene oživela.

51.^* Gizdavci su vsevdilj krivo (z menum) baratali, od tvoje pako zapovedi nesem odstupil.

Spomenul sem se iz negdašnjeh sudov tvojeh i obatriven sem.
Omiljavica je mene popadala zaradi grešnikov koji zapoved tvoju zapuščaju.
Opravdenja tvoja bila su pesme moje, vu mestu putuvanja mojega.
Gospone, po noči spomenul sem se iz imena tvojega i zapoved tvoju jesem čuval.
To se je meni zgodilo kada sem^* zapovedi tvoje (obdržavati) iskal.

Het

Gospone, ja sem rekel: „Moj del je zapovedi tvoje čuvati.“
Pred licem tvojem molil sem iz celoga srca mojega: „Smiluj se meni poleg reči tvoje.“
Premislil sem pute mojei noge moje obrnul sem (na put) svedočanstvih tvojeh.

60.^* Pripraven sem i ne plašim se da zapovedi tvoje čuvam.

Vužinci grešnikov zapleli su mene ter vendar nesem zapoved tvoju pozabil.
Ob pol noči stajal sem se tebe zaradi sudov opravdenja tvojega hvaliti.
Ja sem delnik vseh oneh koji se tebe boje i koji zapovedi tvoje obdržavaju.
Milosrdnosti tvoje, Gospone, puna je Zemlja, vuči me opravdenja tvoja.

Tet

Včinil si, Gospone, slugi tvojemu dobro poleg reči tvoje.
Navči me dobrotu, v redu držanje i mudrost ar sem veruval zapovedjam tvojem.
Predi nego sem bil ponižen, grešil sem, sada pako obdržavam zapovedi tvoje.
Ti si dober i poleg dobrote tvoje vučil me budeš opravdenja tvoja.
Povnožala se je suprot meni nepravednost gizdavcev, ja pako iz celoga srca mojega pretresal budem zapovedi tvoje.
Vsirilo se je kakti mleko srce njihovo, ja pako zapoved tvoju premišljaval jesem.
Dobro je za me da si me ponizil da se navčim opravdenja tvoja.
Zapoved vust tvojeh je za me bolša kak jezera zlata i srebra.

Jod

Ruke tvoje jesu me načinile i izdelale: daj^* mi razuma i navčil se budem zapovedi tvoje.
Koji se tebe boje, budu mene videli i budu veseli pokehdob se na reči tvoje zanesel jesem.
Spoznal sem, Gospone, da sudi tvoji pravedni jesu ter da si me vu istini tvojoj ponizil.
Naj mi bude na batrivost milosrdnost tvoja, kak si slugi tvojemu obečal.
Naj dojdu zvrhu mene pomiluvanja tvoja i živel budem ar zapoved tvoja je premišljavanje moje.
Naj se osramotiju gizdavci ar su mi po krivici zlo včinili, ja se pako izvučal budem k zapovedjam tvojem.
Koji se boje tebe i koji poznaju svedočanstva tvoja, naj se k meni obrneju.
Naj bude srce moje čisto vu opravdenjih tvojeh da se ne opšanim.

Kaf

Pogibala je duša moja (od želje) za zveličenjem tvojem i na reč tvoju jesem se zevsema zaufal.
Omegluvale su oči moje za (ispunjenjem) reči tvoje govoreče: „Kada me budeš obatrivel?“
Ar sem postal kakti meh mrazu, iz opravdenj tvojeh nesem se spozabil.
Kuliko je jošče dnevov sluge tvojega kada budeš zvrhu pregonitelov mojeh suda držal?

85.^* Krivični jesu (si med sobum) od mene lažljive pripovesti povedali, ali ove nesu kak zapoved tvoja.

Vse zapovedi tvoje jesu istina, oni su me krivično preganjali: pomozi meni!
Skorom jesu mene na Zemlji skončali, ja pako zapovedi tvoje nesem zapustil.
Oživi me poleg milosrdnosti tvoje i obdržaval budem svedočanstva vust tvojeh.

Lamed

Gospone, reč tvoja ostane vu Nebesih naveke.
Istina tvoja je od pokolenja do pokolenja, ti si Zemlju osnoval i ostane.
Po naređenju^* tvojem opstaje dan ar vsa služiju.
Da zapoved tvoja ne bi bila premišljavanje^* moje, (morebiti) vre bi bil poginul vu nevolji mojoj.
Nigdar ne budem na opravdenja tvoja pozabil ar me po njih oživel jesi.
Ja sem tvoj, pomagaj meni kada opravdenja tvoja (spuniti) iščem.
Grešniki čekaju mene da bi me pogubili, ja pako razmišljaval sem svedočanstva tvoja.
Videl sem da kaj nazvršenešega je, konec svoj ima, tvoja pako zapoved je nedokončana.

Mem

O, Gospone, kak jako ljubim zapoved tvoju, ves den je ona premišljavanje moje!
Ti si mene po zapovedi tvojoj mudrešega včinil kak neprijatele moje ar ona je vekom pred menum.
Ja sem vučeneši kak vsi navučiteli moji postal pokehdob svedočanstva tvoja jesu premišljavanje moje.
Ja več razmem kak starci kajti zapovedi tvoje iskal sem.
Od vsakoga zločestoga puta čuval sem noge moje da reči tvoje obdržim.
Od sudov tvojeh nesem odstupil pokehdob si mi ti zapoved postavil.
O, kak slatke su meni reči tvoje, one su slajše kak med vustam mojem.
Ja sem po zapovedih tvojeh razumen postal, zato sem oduril vse pute krivične.

Nun

Reč tvoja je svetnica nogam mojem i luč stezam mojem.
Prisegel sem i postavil sem si naprv sude pravice tvoje obdržavati.
Ponižen sem zevsemvsega, Gospone, oživi me poleg reči tvoje!
Včini, Gospone, da ti radovoljni aldov vust mojeh dopadne ter me vuči sude tvoje.
Duša moja je vsigdar vu rukah mojeh, ali na zapoved tvoju nesem pozabil.
Nastavili su meni grešniki zanjke ter vendar od zapovedih tvojeh nesem zabludil.
Svedočanstva tvoja prijel sem za odvečinu vekivečnu ar ona jesu obraduvanje srca mojega.
Vse zmir sem srce moje na ispunenje opravdenjih tvojeh nagibal zaradi naplačenja.

Sameh

Odurjaval sem krivične, zapoved pako tvoju jesem ljubil.
Ti si moj pomočnik i branitel, na tvoju reč zevsema se zanašam.
Odstupite od mene, hudobni, i budem zapovedi Boga mojega^* premišljaval.
Primi me^* poleg reči tvoje i živel budem; i ne dopusti da bi se opšanil vu čekanju mojem.
Pomozi me i opčuvan budem;^* i opravdenja tvoja vsigdar premišljaval budem.
Zavrgel si^* vse koji od sudov tvojeh odstupljuju ar mišlenje njihovo je nepravedno.
Vse grešnike na Zemlji držal sem za prekršitele zato ljubim svedočanstva tvoja.
Prebodi z strahom tvojem meso moje ar se bojim sudov tvojeh.

Ajn

Činil sem sud i pravicu, ne predaj me onem koji me krivo ogovarjaju.

122.^* Ravnaj slugu tvojega k dobromu da me gizdavci ne budu ogovarjali.

Oči moje jesu oslabele (pokehdob čekam) na pomoč tvoju i na spunenje pravice tvoje.
Včini z slugum tvojem poleg milosrdnosti tvoje ter me vuči opravdenja tvoja.
Ja sem sluga tvoj, podelji mi razuma da spoznam svedočanstva tvoja.
Gospone, vreme je vre da činiš ar su zapoved tvoju prekršili.
Zato ljubim zapovedi tvoje več kak zlato i drago kamenje.
Zato se ravnal jesem poleg vseh zapovedih tvojeh i vsaki krivični put oduril sem.

Čuda puna jesu svedočanstva tvoja zato nje duša moja^* razmišljava.
Rastolnačenje rečih tvojeh rasvečuje i daje malehnem razuma.
Otprl sem vusta moja i sapu povlekel pokehdob zapovedi tvoje želel sem.
Poglej na me i smiluj se meni kak činiš onem koji ime tvoje ljubiju.
Ravnaj koračaje moje poleg reči tvoje ter ne daj nikakvoj krivici zvrhu mene gospoduvati.
Oslobodi me od ogovorov ljudih da budem zapovedi tvoje obdržaval.
Rasveti obraz tvoj zvrhu sluge tvojega i navči me opravdenja tvoja.
Oči moje točile su potoke suz kajti (ljudi) nesu zapovedi tvoje obdržavali.

Sade

Gospone, ti si pravičen i pravičen je sud tvoj.
Ti si oštro zapovedal zapovedi tvoje koje su sama pravica i istinu (obdržavati).
Od goruče želje jesem sehnul pokehdob su neprijateli moji na reči tvoje pozabili.
Govorenje tvoje je po ognju očiščeno (kakti zlato) zato nje ljubi sluga tvoj.
Malehen sem ter zametavan ali, na zapovedi tvoje vendar nesem pozabil.
Pravica tvoja je vekivečna pravica i zapoved tvoja istom istina.
Traplenja i stiske jesu me stigle, ali zapovedi tvoje jesu^* premišljavanje moje.
Svedočanstva tvoja jesu pravednost vekivečna: podelji mi razuma i budem živel.

Kof

Kričal sem iz vsega srca mojega: „Gospone, posluhni me, opravdenja tvoja budem zveđal!“
Kričal sem k tebi, pomagaj mene da zapovedi tvoje opčuvam.
Stajal sem se z svitom i kričal pokehdob se na reči tvoje zevsema zanašam.
Predi nego se den začimlje, gledaju oči moje proti tebi da bi zapovedi tvoje razmišljaval.
Gospone, vusliši glasa mojega poleg milosrdnosti tvoje i poleg pravice tvoje obdrži me pri živlenju.
Približavali su se k krivičnosti oni koji su mene preganjali, od zapovedi pako tvoje dalko su odstupili.^*
Blizu jesi ti, Gospone, i vsi puti tvoji jesu sama istina.
Taki iz početka spoznal sem od svedočanstvih tvojeh da si je zanaveke napravil.

Reš

Poglej na poniznost moju ter me oslobodi ar zapoved tvoju nesem pozabil.
Sudi pravdu moju ter me oslobodi i opčuvaj me pri živlenju poleg reči tvoje.
Daleko je od grešnikov zveličenje kajti opravdenja tvoja nesu ziskavali.
Gospone, milosrdnostih tvojeh je vnogo, poleg suda tvojega oživi mene!
Vnogi su koji me preganjaju i trape, od svedočanstvih tvojeh vendar nesem odstupil.
Videl sem prekršitele i (od žalosti) vsehnuval kajti reči tvoje nesu čuvali.
Viđ, Gospone, pokehdob sem zapovedi tvoje ljubil, oživi me poleg milosrdnosti tvoje!
Početek rečih tvojeh je istina i vse odluke pravice tvoje ostaju naveke.

Šin

Poglavari preganjali su me prek zroka i srce moje boji se od rečih tvojeh.
Veselil se budem nad govorenji tvojemi kakti on koj velike plene najde.
Odurjaval sem krivičnost i mrzil sem na nju, zapoved pako tvoju ljubil sem.
Sedemkrat na dan hvalil sem tebe zaradi sudov pravice tvoje.
Oni koji ljubiju zapoved tvoju, imaju velik mir i nikaj im ni na spačku.
Čakal sem, Gospone, na zveličenje tvoje i zapovedi tvoje^* ljubil sem.
Čuvala je duša moja svedočanstva tvoja ter nje kruto jako ljubila.
Obdržaval sem zapovedi tvoje i svedočanstva tvoja kajti vsi puti moji jesu pred očmi tvojemi.

Tau

Pusti, Gospone, prošnju moju pred nazočnost tvoju dojti ter mi podelji razuma poleg reči tvoje.
Pusti prošenje moje pred nazočnost tvoju dojti, poleg reči tvoje oslobodi mene.
Vusnice moje ne budu prestale (tebi) hvalu spevati kada me vu opravdenjih tvojeh podvučiš.
Jezik moj bude reči tvoje pripovedal kajti vse zapovedi tvoje jesu sama pravednost.
Naj bude meni ruka tvoja na pomoč pokehdob sem si zapovedi tvoje izebral.
Gospone, želim zveličenje tvoje i zapoved tvoja je^* premišljavanje moje.
Živela bude duša moja i tebe hvalila i sudi tvoji budu meni pomagali.
Bludil sem kakti ovca koja je zginula: išči (mene) slugu tvojega ar na zapovedi tvoje nesem pozabil.

Objašnjenje

*
Žid. r. 174. veselje moje.