Šoltar LXVII.

K koncu

šoltar pesmeni istomu Davidu

LXVII.

Naj se vstane Bog i neprijateli njegovi naj se rasprše i oni koji ga odurjavanju naj pred licem njegovem pobegneju.
Kak nestaje dima, tak naj njih nestane, kak se tali vojsk pred licem ognja, tak naj poginu grešniki pred licem božanskem.
Pravični pako naj se vesele i raduju pred Bogom i naj se nasladuju v veselju.
Spevajte Bogu, recite pesem imenu njegovomu, pripravite puta onomu koj se nad zahodom gore zdiže: Gospon je ime njegovo. Radujte se vu nazočnosti njegovoj, (oni se pak) budu prestrašili pred licem njegovem,
koj je otec sirot i sudec vdovic. Bog je vu svojem svetem prebivališču.
Bog je koj čini da ljudi jedne misli v jedni hiži prebivaju, koj okovane z jakostjum van ispelja, spodobno one koji ga razdražuju, koji stanuju v grobih.
Bože, kada si vu nazočnosti puka tvojega ishađal, kada si čez puščinu prehađal,
zemlja se je tresla i nebesa su dežđila pred obličajem Boga sionskoga, pred obličajem Boga izraelskoga.
Dal budeš, Bože, dežđa vugodnoga odvečini tvoji: ona je (od suše) oslabela, ali ti si ju oživel.
Živina tvoja bude vu njoj prebivala, Bože, ti si nju po dobroti tvojoj siromaku pripravil.

12.^* Gospon dal bude reč onem koji ju veselo nazveščali budu z velikom močjum (i rekli).

13.^* Kralji šeregov jesu povsud bežali i žene koje su doma ostale, budu plene razdeljuvale.

Akoprem budete vi med ognjenemi kameni bežali (budete se vendar svetili kakti) perje posrebrnjenoga^* goluba koj ima kruto pozlačene peruti.
Kada bude Vsamoguči od nje (odvečine) kralje (koji su Sion opkoljili) odegnal, bude (gora ova) tak bela kakti od snega pokrita gora Selmon,
gora Božja, gora rodna, gora visoka, gora rodna.
Zakaj gledite zesirene gore? Čez goru na kojoj se Bogu prebivati dopada, Bog bude takaj ovde vsevdilj prebival.
Kola Božja jesu zveč kak z desetemi jezermi (angeli opstrti), z jezermi koji se vesele. Gospon je v sredi med njimi, v svetem mestu kak negda na gori Sinaj.
Zastupil si na višinu, oslobodil si vlovljene i dare za ljudi prijel. Takaj za one koji nesu veruvali da Gospon Bog (v Sionu) prebiva.
Blagoslovljen budi, Gospon, vsaki dan; Bog zveličenja našega bude nam srečnoga puta dal.
Bog naš je Bog koj nas zveličiti more i Gospon je Gospon čez vsaku smrt.
Ništar menje vendar bude Bog glave neprijatelov svojeh i oveh isteh teme z lasmi skupa strl, koji v pregreškah svojeh vsevdilj živeju.
Rekel je Gospon: „Budem (ljudstvo moje) iz Bazana ispeljal, budem ga ispeljal iz glubline morske.
Da se noga tvoja v krvi neprijatelov omoči i jeziki psov tvojeh naj ju ližeju.“
Videli su, kak ti, Bože, vnuter ideš, kak Bog moj i kralj moj koj v svetem mestu prebiva, vnuter ide.
Poglavniki išli su naprvo z popevači, v sredini mladeh bubnjaric.
Blagoslivljajte v spraviščih Boga Gospona, vi, koji ste od izraelskoga roda.
Onde^* je mladič Benjamin, v duhu zameknjen.

(Onde) su poglavari od Jude, vođe njihovi, poglavari od Zabulona, poglavari od Neftali.

Skaži (nam), Bože, (nadalje jošče) mogučnost tvoju, potvrdi, Bože, to kaj si nad nami činil.
Zaradi cirkve tvoje v Jeruzalemu budu ti kralji dare alduvali.
Vkroti zverine med trstinum koje su se skup spravile z ljudstvom svojem kakti biki med kravami da prebiraju one koji su kakti srebro očiščeni. Rasprši narode koji boje hočeju.
Došli budu iz Egiptuša posleniki, harapska zemlja bude hitela ruke svoje k Bogu stegnuti.
Kraljestva Zemlje, spevajte Bogu, spevajte hvalu Gosponu, spevajte hvalu Bogu!
Koj proti ishodu zvrhu neba nebesih je zastupil. Nut, on bude dal glasu svojemu glasa mogučnosti.
Dajte diku Bogu, v Izraelu kaže on veličanstvo svoje, a vu oblakih moč svoju.
Čudnovit je Bog v sveteh svojeh, Bog izraelski bude sam puku svojemu moč i jakost dal. Blagoslovljen budi Bog!

Objašnjenje

*
Žid. Onde gospoduje čez nje mladič Benjamin itd.