- K koncu za one koji premenjeni budu, šoltar Davidov
LXVIII.
- Pomozi mi, Bože, ar su dotekle vode tja do duše moje.
- Vgreznul sem v gluboko blato gde ni nikakovoga dna. Došel sem v glublinu morja i viher me je zatopil.
- Zatrudil sem se kričeč, ohrebavilo je grlo moje, oči moje potemnele su kada čakam.
- Oneh koji me zahman odurjavaju, je se več povnožalo kak je lasih na glavi moji. Neprijateli moji koji su me krivično preganjali, jesu se objačili, koja nesem pograbil, onda sem splačal.
- Bože, tebi je znana nespametnost moja i pregreške moje nesu pred tobum skrite.
- Ne prepusti, Gospone, ti Gospon šeregov, da bi se oni koji se vu te ufaju, zaradi mene osramotili.
Ne prepusti da bi se oni koji te, Bog izraelski, iščeju, nad menum opšanili.
- Ar zaradi tebe podnašal sem opšanost, (zaradi tebe) pokrila je sramota lice moje.
- Tuđina postal sem bratom mojem i sinom matere moje postal sem nepoznan.
- Ar goruča skrb za hižu tvoju je mene jela i pšanenje oponašajučeh tebi je zvrhu mene opalo.
- I pokril sem dušu moju z postom i to mi je bilo na opšanost.
- I oblekel sem vuneni žakelj i oni su se iz mene norca delali.
- Koji su pri sudu sedeli, govorili su proti meni i pri vinu popevali su proti meni.
- Ja pako molil sem k tebi, Gospone! Vreme je da mi milost iskažeš, Bože! Posluhni me poleg vnožine milosrdnosti tvoje i poleg istinosti pomoči tvoje.
- Izvleči me iz blata da ne vgreznem, oslobodi me od oneh koji me odurjavaju i od glubokih vod.
- Naj me vodeni slapi ne vtope niti me glublina naj ne požere i da se lukna jame nad menum ne zapre.
- Posluhni me, Gospone, ar milosrdnost tvoja je dobrotivna, oglej se na me poleg vnožine smiluvanj tvojeh.
- Odvrni lica tvojega od sluge tvojega ar se trapim, posluhni me skoro.
- Približaj se na dušu moju i oslobodi ju, zaradi neprijatelov mojeh brani me.
- Ti znaš moje opšanenje, moju sramotu i moju sramežljivost.
- Pred očmi tvojemi jesu vsi koji me trapiju, (od njih) ni drugoga srce moje čakalo kak opšanenje i nevolja. I čekal sem je li bude gdo z menum pomiluvanje imel i nikoga ni bilo, i je li me gdo obatrivel bude, i ni jednoga nesem našel.
- I dali su mi za hranu moju žuč, a v žeđi moji napajali su me z octom.
- Naj im bude stol njihov na zanjku i na povračanje i na spačku.
- Oči njihove naj potemneju da ne vide i hrpta njihovoga ogrbavi za vsigdar.
- Izlej čez nje srditost tvoju i ljutost srditosti tvoje naj je pograbi.
- Prebivališče njihovo naj postane pusto i vu šatorih njihoveh naj nigdo ne prebiva.
- Pokehdob su onoga kojega ti vudril jesi, preganjali i bol ran mojeh povekšavali.
- Pusti je iz pregreške v pregrešku opadati i naj ne dojdu v pravicu tvoju.
- Naj se zbrišeju iz knjige živučeh i z pravičnemi naj se ne zapišeju.
- Ja sem vbogi i mukotrpen, pomoč tvoja, Bože, je me obdržala.
- Hvalil budem ime Božje z pesmami i velikodičil budem njega hvaleči.
- To bude Bogu dopadneše kak tele mlado kojemu rožički i parklji rasti začimlju.
- To naj vide vbogi i naj se vesele: iščite Boga i i duša vaša živela bude.
- Ar Bog posluhnul je siromake i vuznike ni zahitil.
- Naj ga hvali Nebo i Zemlja, morje i vsa koja se vu njem giblju.
- Ar Bog bude opčuval Siona i varaši Jude budu se zidali. I budu stanuvali tam i nje za odvečtvo dobili.
- I seme slugov njegoveh bude nje ladalo i koji ljubiju ime njegovo, budu vu njem stanuvali.
