Ježuš prenazvešča svojem vučenikom pregone i žalost, ponavlja obečanje Duha Svetoga i buduče blaženosti apoštolov. Vera apoštolov vu Ježuša i prenazveščenje njihovoga bežanja.
- „Ova jesem vam govoril da se ne spačite.
- Oni vas budu iz sinagog izganjali, dapače, dojde vura da vsaki koj vas vmori, bude štimal da Bogu čini službu.
- I ova vam včine kajti oni niti Oca niti mene ne poznaju.
- Ali ja vam ova jesem povedal da, kada vura dojde, spomenete se iz toga da vam ja to jesem povedal.
- Ja vam toga spočetka nesem povedal kajti sem bil pri vas. A sada othađam k onomu koj je mene poslal i nigdo zmed vas ne pita mene: ‛Kam ideš?’
- Nego kajti vam ova jesem povedal, žalost je napunila vaše srce.
- Ali ja vam istinu govorim: hasnovito je vam da ja othađam ar ako ne odidem, tak Razveselitel ne dojde k vam, ako pak odidem, tak ga ja k vam pošljem.
- I kada ov dojde, bude opsvedočuval sveta od greha i od pravice i od Suda.
- Ter od greha kajti nesu vu me veruvali,
- od pravice pako kajti othađam k Ocu i več me ne budete videli,
- a od Suda kajti poglavar ovoga sveta je vre suđen.
- Ja vam jošče vnoga imam povedati, ali vi to sada ne morete nositi.
- Kad pako dojde on Duh Istine, on vas bude vsu istinu vučil ar on ne bude od samoga sebe govoril, nego koja čuje, bude on govoril i koja nadojdeju, bude vam nazveščal.
- On bude mene odičil kajti on bude od mojega vzel i vam nazveščal.
- Vsa koja goder ima Otec, jesu moja zato sem ja rekel: ‛On bude od mojega vzel i vam nazveščal.’
- Jošče jedno malo i vre ne budete videli mene, a ipak jedno malo i budete videli mene ar ja othađam k Ocu.“
- Rekli su anda nekoji zmed njegveh vučenikov med sobum: „Kaj je to da nam on veli: ‛Jedno malo i ne budete videli mene, a ipak jedno malo i budete videli mene’ i: ‛Ar ja othađam k Ocu’?“
- Oni su anda rekli: „Kaj je to da on veli: ‛Jošče jedno malo’? Mi ne znamo kaj on govori.“
- Ježuš pako je spoznal da su ga hoteli pitati i reče njim: „Od toga se med sobum spitavate kajti sem rekel: ‛Jošče jedno malo i vre ne budete mene videli, a ipak jedno malo i budete mene videli.’?
- Stanovito, stanovito velim vam: vi se budete plakali i javkali, svet se pako bude veselil. Vi se budete žalostili, ali vaša žalost obrne se na veselje.
- Žena kada rodi je žalosna kajti je njejina vura došla, kad je pako porodila dete, tak se več ne spomina iz stiske zaradi veselja da se je človek narodil na svet.
- I vi sada zadnjič imate žalost ali ja vas ipak budem videl i vaše srce bude se veselilo i vaše veselje nigdo ne vzeme od vas.
- Vu onem dnevu več me za nikaj ne budete pitali, stanovito, stanovito velim vam: ako Oca za kaj vu mojem imenu budete prosili, tak vam bude dal. Mat 7,7; 21,22; Mark 11,14; Luk 11,9; gore 14,13; Jak 1,5.
- Do vezda neste nikaj vu mojem imenu prosili.Prosete i dobite da vaše veselje bude zvršeno.
- Ova jesem vam vu prirečjah govoril, ali dojde vreme kad vam več ne budem vu prirečjah govoril, nego vam budem otprto od Oca nazveščal.
- Vu onem dnevu budete vi vu mojem imenu prosili i ja ne velim vam da ja budem za vas Oca prosil
- ar sam Otec ljubi vas kajti i vi jeste mene ljubili i veruvali da ja od Boga jesem izišel.
- Ja jesem od Oca izišel i došel na svet, ja ipak ostavljam svet ter othađam k Ocu.“
- Onda rečeju njemu njegvi vučeniki: „Nut, vezda očivesno govoriš niti nikakvo prirečje ne povedaš.
- Vezda znamo da ti vsa znaš niti ti ni potrebno da te gdo pita, mi zato verujemo da ti od Boga jesi izišel.“
- Ježuš odgovori njim: „Je li sada verujete?
- Nut, dohađa vura i ona je vre došla da se vsaki vu svoja lastovita rastepete i mene samoga ostavite, ali ja nesem sam ar pri meni je Otec. Mat 26,31; Mark 14,27.
- Ova jesem vam govoril da vi vu meni mir imate. Na svetu budete vi imali stiske, ali se zaufajte, ja jesem svet obladal.“
