Marija Magdalena ide k pokopališču ter Petru i Janušu nazvešča da je pokopališče prazno zbog česa i oni tam šetuju. Angel i Ježuš iskažuje se Magdaleni. Ježuš iskažuje se apoštolom i njim podeljuje Svetoga Duha. Ježuš se ipak iskažuje apoštolom. Tomaš vidi i veruje.
- Prvi pako dan tjedna dojde Marija Magdalena rano, dok je jošče tmica bila, k pokopališču i vidi kamen odvaljen od pokopališča.
- Onda odrči i dojde k Šimunu Petru i k onomu drugomu vučeniku kojega je ljubil Ježuš i reče njim: „Odnesli su Gospona iz pokopališča i ne znamo kam su ga deli.“
- Onda Peter i on drugi vučenik izidu van i dojdu k pokopališču.
- Obodva su pako skupa drčali i on drugi vučenik je jošče bržeše drčal nego Peter i dojde prvi k pokopališču.
- I kad bi se bil nagnul, vidi vilahne ovde ležati, medtemtoga nuter ni išel.
- Dojde anda Šimun Peter koj je njega sledel i zajde nuter vu pokopališče i vidi vilahne ležati
- i potnu peču koja je bila na njegvi glavi, koja vendar ni ležala poleg vilahnov, nego je bila osebe skup zvita na jednem mestu.
- Onda zajde nuter takaj on drugi vučenik koj je bil prvič došel k pokopališču i videl je i veruval
- ar oni jošče nisu znali Pismo da se on mora od mrtveh gore stati.
- Onda ipak odidu vučeniki domom.
- Marija pako je vani plačuča pri pokopališču stala. Kad bi se anda bila plakala i nagnuvša se nuter vu pokopališče naluknula,
- videla je dva angele vu beleh svitah sedeti onde gde je bilo Ježuševo telo položeno, jednoga pri glavi, a drugoga pri nogah.
- Ovi rečeju njoj: „Žena, kaj se plačeš?“ Ona reče njim: „Kajti su odnesli mojega Gospona i ja ne znam kam su ga deli.“
- Kad bi ona ovo bila izvustila, obrne se nazad i vidi Ježuša stati i ni znala da je Ježuš.
- Ježuš reče njoj: „Žena, kaj se plačeš? Koga iščeš?“ Ona pako je štimala da je vrtljar i reče njemu: „Gospone, ako si ti njega odnesel, tak mi poveđ kam si ga položil da ga ja vzemem.“
- Ježuš reče njoj: „Marija!“ Onda se ona obrne i reče njemu: „Rabboni (kaj se veli ‘mešter’)!“
- Ježuš reče njoj: „Naj me se doteknuti ar ja jošče nesem zastupil k mojemu Ocu, hodi pako k mojem bratom ter im poveđ: ja zastupljujem k mojemu Ocu i k vašemu Ocu, k mojemu Bogu i k vašemu Bogu.“ Šolt 21,23 i sl.
- Onda dojde Marija Magdalena ter je nazvestila vučenikom: „Ja jesem videla Gospona pak mi je ova rekel.“
- Kad bi anda on isti dan, koj je prvi po soboti, večer bil nastal i vrata (mesta) gde su bili vučeniki skup spravljeni zbog straha Židovov bila zaključena, dojde Ježuš, stane med nje v sredinu i reče njim: „Mir vam budi!“ Luk 24,36.
- I kad bi to bil rekel, pokaže njim ruke i prsa. Obraduvali su se anda vučeniki kaj su videli Gospona.
- Onda reče njim ipak: „Mir vam budi! Kak je mene poslal Otec, tak i ja vas pošiljam.“
- Ova kak bi on bil izvustil, hukne vu nje i reče njim: „Primite Svetoga Duha!
- Kojem otpustite grehe, budu njim otpuščeni i kojem je zadržite, budu zadržani.“
- Tomaš pako, jeden zmed dvanajsteh koj se zove Dvojek, ni bil z njimi kad je bil došel Ježuš.
- Rečeju anda njemu drugi vučeniki: „Videli smo Gospona.“ On pako reče: „Ako na njegveh rukah ne budem videl prebodke čavlov i ne postavim moj prst vu mesto čavlov i ne zanesem moju ruku vu njegva prsa, tak ne budem veruval.“
- I za osmemi dani bili su njegvi vučeniki ipak nutre i Tomaš z njimi. Dojde anda Ježuš čez zaprta vrata, stane vu sredinu med nje i reče: „Mir vam budi!“
- Zatem reče Tomašu: „Vnesi sim tvoj prst i poglej moje ruke i prinesi tvoju ruku ter ju postavi vu moja prsa i ne budi neveren, nego veren.“
- Tomaš odgovori i reče njemu: „Gospon moj i Bog moj!“
- Reče njemu Ježuš: „Kajti si me videl, Tomaš, jesi veruval: blaženi koji ne vidiju, pak vendar veruju.“
- Ježuš je zadnjič jošče vnoga druga znamenja včinil nazoči svojeh vučenikov koja nesu popisana vu ovoj knjigi.
- Ova pako jesu pisana da verujete da Ježuš je Krištuš, Sin Božji, i da verujuči imate žitek vu njegvem imenu.
