Pokažuje Pavel da je on Krištuša, i to raspetoga, z velikum čednostjum ter prostemi rečmi nazveščal Korintijancem premda zvršenem bi govoril takaj mudrost svetu zakritu koja se po samem božanskem Duhu spoznati more ar živinski človek ne zapopada koja božanska jesu.
- I ja, kada bi bil došel k vam, bratja, došel sem ne vu zvišenosti rečih ali mudrosti nazveščajuči vam svedočanstvo Krištuševo.
- Ar se nesem štimal da znam kaj drugoga med vami kak Ježuša Krištuša, i toga raspetoga.
- I ja sem vu slabosti i strahu i trepetanju vnogem bil pri vas
- i govorenje moje i nazveščanje moje ni bilo vu nedopovedljiveh mudrosti človečanske rečih, nego vu pokazanju duha i kreposti
- da vera vaša ne bude vu modrosti človečanskoj, nego vu kreposti božanskoj.
- Mudrost pako govorimo med zvršenemi, ali mudrost né sveta ovoga niti poglavarov sveta ovoga koji se na nikaj spraviju,
- nego govorimo mudrost božansku vu skrovnosti koja zakrita je, koju preodlučil je Bog pred veki na diku našu.
- Koju nigdo zmed poglavarov ni spoznal ar da bi ju bili spoznali, nigdar ne bi bili Gospona dike raspeli.
- Nego kak pisano je: „Da oko ni videlo niti vuho čulo niti vu srce človečansko stupilo koja pripravil je Bog onem koji ljubiju njega.“
- Nam pako očituval je Bog po Duhu svojem ar Duh vsa zveđa takaj glibljinu božansku.
- Ar gdo zmed ljudih zna koja su vu človeku, nego duh človeka koj vu njem je? Tak i koja su božanska nigdo ni spoznal nego Duh božanski.
- Mi pako nesmo duha sveta ovoga dobili, nego Duha koj iz Boga je da znamo koja od Boga nam prikazana jesu,
- koja i govorimo, ne vu vučeneh mudrosti človečanske rečih, nego vu navuku Duha, k duhovnem duhovna prispodabljajuči.
- Živinski pako človek ne zapopada ona koja su Duha božjega ar bedastoča je njemu i ne more razmeti kajti se duhovno zveđa.
- Duhovni pako sudi vsa, a on se od nikoga ne sudi.
- Ar gdo je spoznal misel Gosponovu koj bi vučil njega? Mi pako imamo misel Krištuševu.
