Gde na pobiranje za krščenike, koji vu Jeruzalemu stanuju, almuštva bi bil opomenul, preporuča njim Timotejuša i Štefana družbu, zatem pozdravlenja pridaje.
- Od zbranja pako koje biva za svete, kak sem odredil vu cirkvah vu Galaciji, tak i vi včinete.
- Prvi dan tjedna vsaki zmed vas naj pri sebi na stran dene, spravivši kaj se njemu prav videlo bude, da se ne budu onda kada dojdem zbranja držala.
- Kada pako nazočen budem, koje goder budete za vredne spoznali po listih, ove pošeljem da odneseju milošču vašu vu Jeruzalem.
- Ako pako vredno bude da i ja idem, z menum pojdeju.
- Dojdem pako k vam kada budem po Macedoniji prešel ar po Macedoniji pojdem.
- Pri vas pako morebiti ostanem ali takaj zimuval budem da mi sprevodite kam goder pojdem.
- Ar neču vas sada vu prehođanju videti ar se ufam da ja nekuliko vremena ostanem pri vas ako Gospon dopusti.
- Ostanem pako v Efezušu tja do Trojak.
- Ar se meni vrata otprla jesu velika i očita i suprotivnikov vnogo.
- Ako pako dojde Timotejuš, gledajte da prez straha bude pri vas ar delo Gosponovo opravlja kak i ja.
- Naj ga anda nigdo ne zameče: sprevodete ga pako vu miru da dojde k meni ar ga čekam z brati.
- Od Apola pako brata vam na znanje dajem da sem ga vnogo prosil da bi došel k vam z brati i čisto ni bila volja njegova da bi sada došel, dojde pako kada bude časa imal.
- Skoznujte, stojite vu veri, po muški baračete, objačete se.
- Vsa vaša vu ljubavi naj bivaju.
- Prosim vas pako, bratja, vi znate za hižu Štefane, Fortunata i Akajka ar su prvine vu Akaji i na službu sveteh povdali su se sami,
- da i vi podložni budete ovakovem i vsakomu pomagajučemu i delajučemu.
- Veselimo se pako nad nazočnostjum Štefane i Fortunata i Akajka pokehdob ono kaj je vam zmenjkalo bilo, oni su spunili
- ar okrepili jesu i moj i vaš duh. Spoznajte anda gdo su takovi.
- Pozdravljaju vas cirkve azijanske. Pozdravljaju vas vu Gosponu vnogo Akvila i Priscila z domačum Cirkvum svojum, pri kojeh takaj stanujem.
- Pozdravljaju vas vsi brati. Pozdravete jeden drugoga vu svetem kušcu.
- Pozdravlenje z mojum rukum Pavlovum.
- Ako gdo ne ljubi Gospona našega Ježuša Krištuša, naj bude proklet, maran atha (to je: doklam naš Gospon dojde).
- Milošča Gospona našega Ježuša Krištuša z vami.
- Ljubav moja z vsemi vami vu Krištušu Ježušu. Amen.
