Apoštol ne potrebuje ljudih preporučanje pokehdob napredek prodekuvanja njegovoga preporuča njega ar vu vnogo vekšem poštenju biti moraju službeniki Novoga zakona i Duha kak Staroga zakona i slove ter da Židovi odev jošče imeli jesu zvrhu srca svojega vu čtejenju Svetoga pisma koj se po veri vu Krištuša odnaša.
- Začimamo opet sami sebe preporučati? Ali je li potrebujemo (kak nekoji) preporučne liste na vas ali od vas?
- List naš vi jeste, pisan vu srcah našeh, koj se zna i čteje od vseh ljudih
- pokehdob ste očitni postali da ste list Krištušev, po službi našoj pripravljeni i pisani, ne z črnilom, nego z Duhom Boga živoga, ne na kameniteh tablah, nego na tablah srca mesnatoga.
- Zaufanost pako takovu vu Bogu imamo po Krištušu,
- ne kajti smo mi sami ob sebi prikladni kaj misliti, nego naša prikladnost je iz Boga.
- Koj je nas takaj prikladne včinil da budemo službeniki Novoga zakona, ne po slovi, nego po Duhu ar slova vumarja, Duh pako oživljuje.
- Ako je pako služba smrtonosne slove koja je bila zdubljena vu kamenih, takovu diku je imala da sini izraelski nesu mogli pogledati vu lice Mojžeševo zbog svetlosti obličaja njegovoga koja vendar je bila preminljiva,
- kak ne bude vnogo bolje služba Duha imala diku?
- Ar ako služba skvarjenja ima diku, kuliko bolje ima diku služba opravičenja.
- Ar niti ni odičeno bilo, kaj odičeno je, vu ovoj stranki zaradi prevelike dike.
- Ar ako je to koj premine vu diki, vnogo bolje koj ostaje, vu diki je.
- Imajuči anda takovo ufanje, veliku zaufanost potrebujemo.
- I ne kak Mojžeš postavil je odevu čez obraz svoj da ne bi gledali sini izraelski vu obraz njegov koj premine,
- ali optvrđena jesu čutenja njihova. Ar tja do denešnjega dneva ona ista odeva vu čtejenju Staroga zakona ostaje neotkrita (pokehdob se vu Krištušu odgrinja),
- nego tja do denešnjega dneva, kada se Mojžeš čteje, odeva je postavljena zvrhu srca njihovoga.
- Kada se pako (Izrael) preobrnul bude k Gosponu, odneme se odeva.
- Gospon pako je Duh, gde pako je Duh Gosponov, onde je sloboščina.
- Mi pako vsi, z odgrnjenem licem, diku Gosponu kakti vu zrcalu gledajuči, vu on isti kip premenjamo se od svetlosti vu svetlost, kakti od Gosponovoga Duha.
