Iz stalnoga ufanja buduče dike želiju apoštoli odrešiti se od tela pokehdob se nje drugač vžiti ne moreju, vsigdar pako želejuči Krištušu, vseh pravičnomu sucu, dopasti se, daju priliku vučenikom zbog njih dičiti se pred suprotivniki i poselstvo za Krištuša obnašajuči, niti istoga zadnjič Krištuša kojega nazveščaju i po kojega smrti pomiren je z Bogom svet vre poleg tela nesu poznali.
- Ar znamo da ako se zemeljska hiža naša prebivališča ovoga razmeče, da zidanje iz Boga imamo, hižu ne z rukami napravljenu, vekivečnu vu Nebesih.
- Ar i zbog toga zdihavamo, stanuvanje naše, koje iz Neba je, gore obleči želujuči
- ako se lestor oblečeni, ne goli najdemo.
- Ar i koji jesmo vu prebivališču ovem, zdihavamo optršeni zato kajti se nečemo opleniti, nego gore obleči da se požere kaj vmrtelno je od živlenja.
- Koj nas je pako spravil na to isto, je Bog koj nam je dal za dar Duha.
- Ufajuči se anda vsigdar, znajuči da doklam jesmo vu telu, jesmo jošče daleko od Gospona.
- (Ar po veri hodimo, a ne po viđenju.)
- Ufamo se pako i dobru volju imamo rajši se zeseliti iz tela i nazočni biti pri Gosponu.
- I zato trsemo se, ali nenazočni ali nazočni, dopasti se njemu.
- Ar se je nam vsem potrebno očituvati pred sudbenum stolicum Krištuševum da prime vsaki lastovita tela kak je delal, ali dobro ali zlo.
- Znajuči anda strah Gosponov, ljudem svetujemo, Bogu pako očivesti jesmo. Ufam se pako da smo i vu vašeh dušnovestih očitni.
- Ne preporučamo se opet mi vam, nego priliku dajemo vam dičiti se zbog nas da imate kaj proti onem koji se vu licu hvaliju, a ne vu srcu.
- Ar ali iz pameti izidemo, tak zaradi Boga, ali pak trezni jesmo, tak zaradi vas.
- Ar ljubav Krišuševa nas priganja štimajuči to da ako jeden za vse vumrl, tak su anda vsi vumrli
- i za vse je vumrl Krištuš da i koji živeju, vre ne živeju sebi, nego onomu koj za nje je vumrl i gore se stal.
- Zato mi od sada nikoga ne poznamo poleg tela. I ako smo poznali poleg tela Krištuša, ali sada vre ne poznamo.
- Ako anda je gdo vu Krištušu, novo stvorjenje je, stara su prešla, nut, vsa su nova postala.
- Vsa pako jesu iz Boga koj nas je z sobum pomiril po Krištušu i dal je nam službu pomirenja.
- Ar zadnjič Bog bil je vu Krištušu sveta pomirujuči z sobum, neračunajuči njim pregreške njihove i položil je vu nas reč pomirenja.
- Za Krištuša anda poselstvo obnašamo kak da bi Bog opominal po nas. Prosimo za Krištuša, pomirete se z Bogom!
- Ar onoga koj ni poznal greha, je za nas k grehu načinil da bi mi postali pravica Božja po njem.
