Pokažuje Pavel nakuliko ljubi Korintijance i kuliko iz popravljenoga njihovoga živlenja vu vnogeh svojeh nevoljah veselje je prijel i kuliko dobro je zrokuvala žalost koju iz lista njegovoga jesu dobili.
- Ova anda imajuči obečanja, najljubljeneši, očistemo nas od vsake nesnage tela i duha, zvršavajuči posvečenje vu strahu Božjem.
- Poprimete nas. Nikoga nesmo vrazili, nikoga pokvarili, nikoga vkanili.
- Ne velim na skvarjenje vaše ar smo prenazvestili da ste vu srcah našeh, pripravni z vami vumreti i živeti.
- Veliku imam zaufanost proti vam, ja se zaradi vas vnogo dičim, napunjen sem z obraduvanjem, jako obiljujem vu veselju vu vsoj nevolji našoj.
- Ar i kada bi bili došli vu Macedoniju, nikakovoga pokoja ni imelo telo naše, nego smo vse traplenje trpeli: zvana vojuvanja, znutra strahe.
- Ali Bog, koj batrive ponizne, obatrivel je nas vu došestku Tituša.
- Ne lestor pako vu došestku njegovem, nego takaj vu obatrivenju z kojem obatriven je med vami, obznanivši nam želju vašu, plač vaš i zažganost za me, tak da bi se jošče bolje veselil.
- Ar akoprem vas ražalostil jesem po listu, ni mi žal premda mi bi žal bilo videči da list on (premda za jednu vuru) vas je ražalostil.
- Sada se veselim, ne kajti ste ražalosteni bili, nego kajti ražalosteni jeste na pokoru. Ar ste ražalosteni poleg Boga tak da nikakove škode ne trpite po nas.
- Ar koja poleg Boga žalost je, pokoru na zveličenje stalno opravlja, sveta pako žalost smrt opravlja.
- Ar, nut, to isto, da ste poleg Boga žalosni bili, kuliku vu vas opravlja skrbljivost ali obrambu ali zlovoljnost ali straha ali želju ali zažganost ali fančenje, vu vseh se iskazali jeste da ste neoskrunjeni vu delu.
- Anda akoprem sem pisal vam, vendar nesem zarad onoga koj včinil je krivicu niti zarad onoga koj trpel je, nego za očituvati skrbljivost našu koju imamo za vas.
- Pred Bogom zato smo obatriveni. Vu obatrivenju pako našem vnogo obilneše veselili se jesmo nad veseljem Tituševem pokehdob okrepljen je duh njegov od vseh vas.
- I ako se vu čem pred njim zbog vas dičil jesem, ni me sram, nego kak smo vam vsa vu istini govorili, tak i dičenje naše proti Titušu, istinsko postalo
- i srce njegovo je obilneše k vam kada se spomene iz vseh vas pokornosti, kak ga z strahom i drhtanjem prijeli jeste.
- Radujem se da se vu vseh na vas zanašam.
