Židove kara koji zbog danoga sebi Zakona poganine opsuđuvali jesu ona isti sami čineči pokehdob Bog vsakomu naplačal bude poleg činov njegoveh natuliko da takaj poganini ona koja Zakona jesu, po naravskoj svetlosti izvršavajuči, za obrezane držani budu i nje sudili koji zbog samoga Zakona spoznanja i tela obrezavanja dičiju se suprotivna Zakonu izbavljajuči.
- Zato nimaš nikakovoga izgovora, o, človek, gdo goder si ti ki sudiš. Ar vu čem sudiš drugoga, vu tem sam sebe opsuđuješ ar ti ona ista delaš koja sudiš.
- Ar znamo da sud božanski je poleg istine nad onemi koja takova delaju.
- Štimaš li pako ti, o, človek, koj sudiš one koji takova činiju i sam takaj činiš ona, da ti vujdeš sudu božanskomu?
- Ali zamečeš bogatstvo njegove dobrotivnosti i trpljivnosti i dugotrpnosti? Je li ne znaš da te božanska dobrota napeljuje na pokoru?
- Ti pako po tvojoj tvrdokornosti i nespokorjenem srcem spravljaš tebi srditost za dan srditosti i očituvanja pravičnoga suda božanskoga,
- koj vsakomu povrne poleg njegoveh del:
- onem zadnjič koji poleg trpljivnosti dobrog dela diku i poštenje i nesprhljivost iščeju, žitek vekivečni,
- onem pako koji svađe delaju i pri istini ne ostajeju, veruju pako krivičnosti, srditost i ljutost.
- Traplenje i stiska vsakoj duši človeka delajučega zlo, Židova prvič i grka,
- dika pako i poštenje i mir vsakomu dobro delajučemu, Židovu prvič i grku,
- ar ni prijemanje osob pri Bogu.
- Ar koji su goder prez Zakona grešili, prez Zakona pogineju i koji su goder vu Zakonu grešili, po Zakonu budu suđeni.
- Ar ne poslušavci Zakona jesu pravični pri Bogu, nego spuniteli Zakona budu opravičeni.
- Ar pokehdob poganini koji Zakona nemaju po naravi ona koja su Zakona, činiju, tak su ovakovi Zakona neimajuči sami sebi Zakon,
- koji pokažuju da su dela Zakona v srcah njihoveh zapisana pokehdob njim svedočanstvo daje dušnavest njihova i misli koja jedna drugu med sobum tuži ali takaj zagovarja,
- na dan kada bude Bog sudil skrovna ljudih, poleg Evangelijuma mojega, po Ježušu Krištušu.
- Ako se pako ti Židov imenuješ ter se na Zakon zanašaš i dičiš vu Bogu
- i znaš volju njegovu i kušaš hasnoviteša podvučen po Zakonu
- i podufaš se ti sam vođa slepcev i svetlost oneh biti koji su v tmici,
- podvučitel nespametneh, navučitel dece koj ima način znanja i istine vu Zakonu.
- Koj anda drugoga vučiš, samoga tebe ne vučiš? Koj prodekuješ da se naj ne krade, pak kradeš?
- Koj veliš da se nema praznuvati, praznuješ? Koj odurjavaš bolvane, a sveta oskrunuješ?
- Koj se vu Zakonu dičiš, po prestupljenju Zakona Boga ne opoštenuješ
- (ar se ime Božje po vas blazni med poganini, kak pisano je).
- Obrezavanje zadnjič hasne ako Zakon obdržavaš, ako si pako prekršitel Zakona, obrezavanje tvoje je neobrezavanje postalo.
- Ako anda neobrezavanje pravičnosti Zakon obdržava, je li ne bude neobrezavanje njegovo za obrezavanje začuvano?
- I sudilo bude ono kaj od narave je neobrezano, Zakona spunjavajuče, tebe koj po slovi i obrezavanju prekršitel Zakona jesi?
- Ar ni Židov koj je zvana takov i očivesni niti ni obrezavanje koje je zvana i očivesno na telu.
- Nego koj je naskrovnem, on je Židov i obrezavanje srca je vu Duhu, a ne vu slovi, kojega hvala ni od ljudih, nego od Boga.
