Opravičenje zadobiva se ne po delih Zakona, nego po veri, koje Abrahamu služilo je k pravičnosti pred danem njemu obrezavanjem koje potlam je dobil buduči ne po Zakonu, nego po pravičnosti vere otec vseh koji bi veru njegovu nasleduvali, veruval je pako Bogu da bude on otec vnogeh narodov po obečanem sebi semenu premda tak on kak tovarušica njegova Sara bi bili ispunili leta za rođenje prikladna.
- Kaj anda rečemo da je Abraham, otec naš, našel poleg tela pravičnost?
- Ar ako je Abraham po delih opravičen bil, ima diku, ali ne pri Bogu.
- Ar kaj veli Pismo: „Veruval je Abraham Bogu i računano je njemu za pravicu.“
- Onomu pako koj dela, plača ne računa se poleg milošče, nego poleg dužnosti.
- Onomu pako koj ne dela, verujučemu pako vu onoga koj opravičuje nepobožnoga, računa se vera njegova k pravičnosti poleg namenenja milošče božanske.
- Kak i David veli da je blaženstvo človeka kojemu Bog priračuna pravičnost prez delih:
- „Blaženi kojem otpuščene jesu krivičnosti i kojeh grehi jesu pokriti.
- Blaženi človek kojemu ne računa Gospon greha.“
- Blaženost anda ova vu obrezavanju lestor ostaje ali takaj vu neobrezanju? Ar velimo da se je Abrahamu vera k pravici priračunala.
- Kak je anda priračunana? V obrezavanju ali vu neobrezavanju? Ne vu obrezavanju, nego vu neobrezavanju.
- I znamenje dobil je obrezavanja, pečat pravice od vere koja je vu neobrezavanju da bi bil otec vseh verujučeh vu neobrezavanju, da se i njim priračuna k pravici.
- I da bi bil otec obrezavanja, ne lestor onem koji su iz obrezavanja, nego i oneh koji hodiju po sledih vere koja je vu neobrezavanju oca našega Abrahama.
- Ar ni po Zakonu dano obečanje Abrahamu ali semenu njegovomu da bi bil odvetnik sveta, nego po pravici vere.
- Ar ako su oni koji su iz Zakona odvetniki, ispraznjena je vera, zatreno je obečanje.
- Ar Zakon srditost opravlja. Ar gde ni Zakona, niti ni prekršenja.
- Zato iz vere je odvečtvo da poleg milošče bude tvrdno obečanje vsakomu semenu, ne lestor onomu koj je iz Zakona, nego i onomu koj je iz vere Abrahamove, koj je vseh nas otec.
- Kak pisano je: „Kajti sem te za oca vnogeh narodov postavil.“ Pred Bogom kojemu je veruval, koj oživljuje mrtve i zove ona koja nesu kak ona koja jesu,
- koj suprot ufanju vu ufanje je veruval da bi postal otec vnogeh narodov, kak bilo je rečeno njemu: „Tak bude seme tvoje.“
- I ni oslabel vu veri niti ni premišljaval telo svoje vre mrtvo, premda je bil skoro sto let star, i mrtvu vutrobu Sare.
- Niti ni vu obečanju Božjem dvojil z nezaufanostjum, nego je potvrđen vu veri, dajuči diku Bogu,
- potpunoma znajuči da kaj je obečal, mogučen je takaj činiti.
- I zato zaračunano je njemu k pravici.
- Neje pako pisano lestor zbog njega da je zaračunano njemu k pravici,
- nego takaj zbog nas kojem se zaračunalo bude, verujučem vu onoga koj prebudil je od mrtveh Ježuša Krištuša, Gospona našega.
- Koj izdan je zbog grehov našeh i gore stal zbog opravičenja našega.
