Na spodobu žene koje muž vumrl je, mi se po Krištušu oslobađamo od Zakona, po kojem grešnikov nagnenja bivala jesu siloviteša, da služimo Krištušu vu novine duha, vu priliki pako Zakona greh sudečega bolje se je iskazal i zrasel greh premda bi bil Zakon svet i duhovni, dapače, i sada po suprotstavljajučem se tela podnetku vabimo se, akoprem krateči se, k onem koja poleg razuma odurjavamo ter Zakonu jesu suprotivna.
- Je li ne znate bratja (ar znajučem Zakona govorim) da Zakon vu človeku gospoduje doklam žive?
- Ar žena, koja je pod oblastjum muža, doklam žive muž, privezana je Zakonu, ako pako vumre muž njejin, oslobođena je od zakona muža.
- Anda doklam žive muž, bude se zvala lotrica ako bude z drugem mužom, ako pako vumre muž njejin, oslobođena je od zakona muža da ne bude lotrica ako bude z drugem mužom.
- Tak anda, bratja moja, i vi ste odmrli Zakonu po telu Krištuševem da budete drugoga koj se je od mrtveh gore stal, da sad doprinesemo Bogu.
- Ar kada bi bili v telu pohotnosti grehov koje su bile po Zakonu, opravljale su vu kotrigih našeh da bi sad doprinesli smrti.
- Sada pako oslobođeni jesmo od Zakona smrti vu kojem smo zadržani bili tak da služemo vu novine Duha, a ne vu starosti slove.
- Kaj anda rečemo? Da je Zakon greh? Zevsema ne. Ali greha nesem spoznal, nego po Zakonu ar za poželenje nesem znal da je greh da ne bi Zakon rekel: „Ne poželi!“
- Priliku pako dobivši, greh po zapovedi opravljal je vu meni vse poželenje. Ar prez Zakona greh je bil mrtev.
- Ja pako živel sem negda prez zapovedi, ali kada bi bila došla zapoved, greh se je oživel.
- Ja pako mrtev jesem i najđeno je da zapoved koja je bila na živlenje meni bila je na smrt.
- Ar greh, priliku vzemši po zapovedi, napeljal je mene i po njoj vmoril.
- Anda Zakon zadnjič je svet i zapoved je sveta i pravična i dobra.
- Kaj anda dobro je, postalo je meni smrt? Zevsema ne. Nego greh, da se skaže kakti greh, po dobrom opravil je meni smrt da postane zvrhu mere grešen greh po zapovedi.
- Ar znamo da je Zakon duhovni, ja pako telovni jesem prodan pod greh.
- Ar kaj delam, ne razmem. Ar ne delam to dobro koje hoču, nego koje odurjavam zlo, to činim.
- Ako pako kaj neču, to činim, privoljujem k Zakonu da dober je.
- Sada pako vre ne delam ja ono, nego koj vu meni prebiva greh.
- Ar znam da ne prebiva vu meni, to je vu telu mojem, dobro. Ar hoteti dano je meni, zvršiti pako dobro, k tomu moči vu meni ne nahađam.
- Ar ne koje hoču dobro, to včinim, nego koje neču zlo, to činim.
- Ako pako kaj neču, to činim, vre ja ne opravljam ono, nego koj vu meni prebiva greh.
- Nahađam anda vu meni zakona da kada hoču kaj dobroga činiti, da se mene zlo drži
- ar se veselim vu zakonu Božjem poleg nuternjega človeka,
- vidim pako drugi zakon vu kotrigih mojeh koj se bori proti zakonu pameti moje i mene vlovljenoga drži vu zakonu greha koj je vu kotrigih mojeh.
- Ja nevoljni človek, gdo me oslobodi iz tela smrti ove?
- Milošča božanska po Ježušu Krištušu, Gosponu našem. Anda ja sam z pametjum služim zakonu Božjem, z telom pako zakonu greha.
