Pošilanje apoštolov. Herodeš želi videti Ježuša. Povraček apoštolov. Nahranenje pet jezer ljudih. Petrovo valuvanje. Križ i zatajenje. Preobraženje Krištuševo i oslobođenje nekojega vragometnoga. Ježuš prenazvešča svoje muke, pokaruje oholnost, nazlobnost i prekorednu zažganost svojeh vučenikov i daje naput od svojega nasleduvanja.
- Kad bi pako skup zezval bil dvanajst apoštolov, dal im je moč i oblast zvrhu vseg vragov i da bi betege vračili.
- I poslal je nje nazveščat Kraljestvo Božje i vračit betežne.
- I reče njim: „Nikaj ne jemljite z sobum na put: niti palice niti torbe niti kruha niti penez niti dveh halj nimajte.
- I vu koju goder hižu zajdete, onde ostanite i odonud ne ishađajte.
- I koji goder vas ne primeju, izidite iz onoga varaša i stepite prah iz vašeh nog na svedočanstvo zvrhu njih.“
- Izišli su anda i hodili okolo po trgoviščah i nazveščali su Evangelijum i vračili povsud.
- Čul je pako Herodeš, četrtostrančni oblasnik, vsa koja su po njem včinjena i bil je vu skrbi kajti su govorili
- nekoji da se je Ivan od mrtvih gore stal, a nekoji da se je Elijaš iskazal, drugi pako da se je neki zmed starinskeh prorokov gore stal.
- I reče Herodeš: „Ivanu sem ja glavu odsekel, gdo je pako ov od kojega ja takva čujem?“ I iskal ga je videti.
- I kad bi se apoštoli bili povrnuli, povedali su njemu koja goder jesu včinili i vzeme nje i odide poseb vu pusto mesto koje se imenuje Betšajida.
- Kaj kad bi vnožine bile zeznale, jesu ga nasleduvale i prijel je nje k sebi i govoril je njim od Kraljestva Božjega, one pako koji su bili potrebni vračenja, je zvračil.
- Dan se je pako počel dokančati. I pristupiju dvanajst ter mu rečeju: „Otpusti vnožinu, naj idu vu okolo ležeča trgovišča i sela da se nastaniju i najdeju hranu kajti smo ovde v pustem mestu.“
- Reče pako njim: „Dajte vi njim jesti!“ A oni su rekli: „Mi nemamo več kak pet hlebov kruha i dve ribe, zvun ako idemo ter kupimo hranu za vsu ovu vnožinu.“
- Bilo je pako okolo pet jezer mužov. Reče pako svojem vučenikom: „Dajte im na društva po pedeset posesti.“
- I včinili su tak. I vse su dole posadili.
- On pako vzeme pet hlebov kruha i dve ribe, pogleda gore vu nebo ter je blagoslovi i prelomi i da vučenikom da bi pred vnožinu postavili.
- I vsi su jeli i zasitili se. I bilo je pobrano kaj je njim preostalo, dvanajst košar falatcev.
- I dogodilo se je kad bi sam bil i molil, bili su z njim takaj vučeniki i pital je nje govoreči: „Koga me vele vnožine da ja jesem?“
- A oni odgovoriju i rečeju: „Nekoji Ivana Krstitela, a drugi Elijaša, drugi pako da se je nekoj zmed stareh prorokov gore stal.“
- Reče pako njim: „Vi pako za koga me držite?“ Odgovori Šimun Peter i reče: „Za Krištuša Božjega.“
- On je nje pako pokaral i zapovedal da to nikomu ne bi povedali
- ar reče: „Sin Človečji mora vnoga trpeti i zavrči se od starešin i aldovničkeh poglavarov i piscov ter vmoriti se i tretji se dan gore stati.“
- Rekel je pako vsem: „Ako gdo hoče za menum iti, naj zataji samoga sebe i naj nosi svoj križ vsaki dan ter me naj nasleduje.
- Ar koj bude hotel svoje živlenje opčuvati, pogubi nje, koj pako pogubi svoje živlenje zaradi mene, opčuva nje.
- Ar kaj hasni človeku ako li ves ov svet dobi, a samoga sebe pogubi ter sam sebi škodu načini?
- Ar koj se sramuje mene i mojeh govorenj, njega se bude Sin Človečji sramuval kad bude došel vu svojem veličanstvu i svojega Oca i sveteh angelov.
- Velim pako vam istinski: jesu nekoji zmed oneh koji ovde stojiju koji ne budu kušali smrti doklam ne budu videli Kraljestvo Božje.
- Včinjeno je pako po oveh rečih skoro za osem danov i vzel je k sebi Petra i Jakova i Januša i išel je na goru da bi molil.
- I dok bi molil, včinjena je spodoba njegvoga obraza druga, njegva pako oprava bela i svetla.
- I, nut, dva človeki jesu z njim govorili. Bili su pako Mojžeš i Elijaš
- koji su se skazali vu veličanstvu i govorili su od njegvoga othotka kojega je imel spuniti vu Jeruzalemu.
- Peter pako i koji su z njim bili, bili su od sna optršeni. I kad bi se bili prebudili, videli su njegvo veličanstvo i dva človeka koji su z njim stali.
- I včinjeno je kad bi od njega othađali, reče Peter Ježušu: „Navučitel, dobro je nam ovde biti i načinemo tri šatore: jednoga tebi i jednoga Mojžešu, a jednoga Elijašu.“ I ni znal kaj bi rekel.
- Dok bi pako on ova bil govoril, načinil se je oblak ter je nje opsenčil i bojali su se kad su oni nuter išli v oblak.
- I včinjen je glas iz oblaka govoreči: „Ovo je moj ljubljeni Sin, njega poslušajte!“
- I kad se je glas čul, najđen je Ježuš sam. Oni su pako mučali i nikomu nikaj nesu povedali vu oneh dnevih od oneh koja su videli.
- Dogodilo se je pako buduči dan, kad su iz gore dole išli, došla je njim naproti velika vnožina.
- I, nut, nekoj človek zmed vnožine iskrikne govoreči: „Mešter, prosim te, oglej se na mojega sina ar je on moj jedini.
- I, nut, kad ga duh pograbi, taki kriči ter treska i rastrgava njega da se vse peni i komaj ga onda ostavlja kad ga vre stere.
- I prosil sem tvoje vučenike da bi ga izegnali, pak nesu mogli.“
- Odgovori pako Ježuš i reče: „O, neverno i spačljivo pokolenje! Kak dugo budem pri vas ter vas trpel? Dopeljaj sim tvojega sina!“
- I kad bi pristupil, tresnul je z njim vrag ter rastrgaval.
- I zagrozil se je Ježuš nečistomu duhu i zvračil je dečaka i dal je njega svojem ocu nazad.
- Osupnuli su se pako vsi nad velikočum Božjum, kad bi se pako vsi bili čuditi zvrhu vseh koja je včinil, reče svojem vučenikom: „Vzemite si k srcu vašemu ova govorenja! Ar Sin Človečji bude izdan vu ruke ljudih.“
- A oni nesu razmeli ovu reč i zakrita je bila pred njimi tak da ju ne bi razmeli i bojali su se njega zbog ove reči pitati.
- Došlo im je pako na pamet gdo bi zmed njih najvekši bil.
- Kad bi pako Ježuš bil videl mišlenja njihovoga srca, vzeme nekoje dete i postavi nje poleg sebe
- i reče njim: „Gdo goder prijemlje jedno takvo dete vu mojem imenu, mene prijemlje, a gdo goder mene prijemlje, prijemlje onoga koj je mene poslal. Ar koj je najmenjši med vami, taj je najvekši.“
- Odgovori pako Januš i reče: „Navučitel, videli jesmo nekojega koj vu tvojem imenu izganja vrage i prepovedali smo njemu ar te ne nasleduje z nami.“
- I reče njemu Ježuš: „Najte prepovedati ar koj ni suprot vam, on je za vas!“
- Včinjeno je pako kad bi se spunili dnevi njegvoga gorevzetja, tvrdno si je naprvo vzel da bi išel vu Jeruzalem.
- I pošlje poslenike pred sobum naprvo. I oni su išli i zašli su vu varaš samaritanski da bi njemu pripravili stan.
- I nesu ga prijeli ar su na njem videli da ide v Jeruzalem.
- Kad bi pako to bili videli njegvi vučeniki Jakop i Januš, rekli su: „Gospone, hočeš da rečemo naj ogenj iz neba dole pada i nje požge?“
- I obrne se i pokara nje govoreči: „Vi ne znate kakvoga duha jeste!
- Sin Človečji ni došel duše pogubiti, nego zveličiti.“ I odišli su vu drugo trgovišče.
- Včinjeno je pako kad bi oni bili putem išli, reče njemu nekoj: „Bum te nasleduval kam goder pojdeš.“
- Reče njemu Ježuš: „Lisice imaju jame i ptice nebeske gnjezda, Sin Človečji pako nema kam bi nagnul glavu.“
- Nekojemu pako drugomu reče: „Nasleduj mene!“ On pako reče: „Gospone, dopusti mi da idem i prvlje zakopam mojega oca.“
- I reče njemu Ježuš: „Puščaj naj mrtvi zakapaju svoje mrtvece, ti pako hodi i nazveščaj Kraljestvo Božje.“
- A drugi reče: „Budem te nasleduval, Gospone, nego mi dopusti predi odreči se onem koja su doma.
- Reče njemu Ježuš: „Nigdo koj svû ruku meče na plug ter se nazad ogleda, ni prikladen za Kraljestvo nebesko.“
