Molitva Gosponova. Proštenje, iskanje i kučenje. Zganjanje nemoga vraga. Blaznenje farizejušev. Prilika od jakšega. Povraček Šatanov. Mati Ježuševa oziva se blažena. Znamenje Jonaševo. Prostoča oka. Čisti vrč, a gnjusno srce. Jaj farizejušem.
- I včinjeno je kad bi na nekojem mestu bil molil, kak je prestal, reče njemu nekoj zmed njegveh vučenikov: „Gospone, vuči nas moliti kak je i Ivan svoje vučenike vučil!“
- I reče njim: „Kada molite, recite: ʻOtec, sveti se ime tvoje! Dojdi kraljestvo tvoje!
- Kruha našega vsagdašnjega daj nam denes!
- I otpusti nam naše grehe pokehdob da i mi otpuščamo vsakomu koj je nam dužen! I ne vpeljaj nas vu skušavanje!ʼ“
- I reče njim: „Ako bi gdo zmed vas imal prijatela, pak bi on k njemu ob pol noči došel i rekel njemu: ʻPrijatel, posudi mi tri hlebe
- ar je moj prijatel došel iz puta k meni i nemam kaj bi pred njega postavilʼ,
- pak bi on iznutra odgovoril i rekel: ʻNaj mi biti nepriličen, vrata su vre zaprta i moja deca su z menum vu spalnici, ne morem se stati i tebi datiʼ,
- i ako on ne prestane kučiti, tak velim vam: akoprem se on ne bi gore stal i njemu zato dal kajti je njegov prijatel, ništar manje zbog njegvoga zabavlanja stane se i da njemu kuliko mu ih goder je potrebno.
- I ja velim vam: prosete i da se vam, iščite i najdete, kučete i otpre se vam.
- Ar vsaki koj prosi, dobiva i koj išče, najde i koj kuči, onomu se otpre.
- Gdo pako zmed vas prosi oca za kruh, je li mu bude dal kamen? Ali za ribu, je li mu bude mesto ribe dal kaču?
- Ali ako bude prosil za jajce, je li mu bude podal škorpiona?
- Ako anda vi, premda ste hudobni, znate vašoj deci dobre dare davati, kuliko vnogo bolje podelji vaš Otec iz Neba dobroga duha onem koji ga za njega prosiju!“
- I izganjal je vraga i ov je bil nem. I kad bi bil izegnal vraga, pregovoril je nemi i začudilo se je ljudstvo.
- Nekoji pako zmed njih rekli su: „Po Belzebubu, peklenskeh duhov poglavniku, izganja vrage.“
- A drugi su ga skušavali i potrebuvali od njega znamenje iz Neba.
- On pako kad je videl njihova mišlenja, reče njim: „Vsako kraljestvo koje je samo vu sebi razdeljeno opuste i hiža na hižu zruši se.
- Ako je pako i Šatan sam vu sebi razdeljen, kak bude stalo njegvo kraljestvo? Pokehdob velite da ja po Belzebubu izganjam vrage?
- Ako pako ja po Belzebubu izganjam vrage, po kom nje izganjaju vaši sini? Zato oni budu vaši suci.
- Nadalje, ako ja z Božjem prstom izganjam vrage, tak je stanovito k vam došlo Kraljestvo Božje.
- Kada jaki, oboružen, čuva svoj dvor, tak su pri miru vsa koja lada.
- Ako pako koj jakši od njega nadojde i njega oblada, tak mu odnese vse njegvo oružje vu koje se je ufal i razdelji njegve plene.
- Koj ni z menum, on je proti meni i koj z menum ne spravlja, on rasipava.
- Kada nečisti duh izide iz človeka, ophađa suha mesta i išče si pokoj i kad ga ne najde, veli: ʻHoču se povrnuti vu mû hižu, otkud sem van izišel.ʼ
- I kada dojde, najde nju z metlami očiščenu i nakinčenu.
- Onda ide ter vzeme z sobum sedem drugeh duhov goršeh od sebe i zajdu nuter ter stanuju onde. I poslednja onoga človeka bivaju gorša od prveh.“
- Dogodilo se je pako kad bi ova govoril, podigne nekoja žena zmed ljudstva svoj glas i reče njemu: „Blažena vutroba koja je tebe nosila i prsa koja si sesnul!“
- On pako reče: „Dapače, blaženi koji poslušaju reč Božju i nju obdržavaju.“
- Kad bi se pako vnožine bile skup spravile, počel je govoriti: „Ovo pokolenje je hmanje pokolenje, ono išče znamenje i ne bude mu se dalo znamenje kak znamenje Jonaša proroka.
- Ar kak je bil Jonaš znamenje Ninivitancom, ovak bude i Sin Človečji ovomu pokolenju.
- Kralica od Juga stane se gore na Sudu z ljudmi ovoga pokolenja i bude nje opsudila kajti je ona od krajov zemlje došla poslušat Šalamonovu mudrost i, nut, ovde je več kak Šalomon.
- Ljudi Ninivitanci staneju se gore na Sudu z ovem pokolenjem i budu nje opsudili kajti su ovi na prodekuvanje Jonaševo pokoru včinili i, nut, ovde je več kak Jonaš.
- Nigdo ne vužiže svetnice da ju postavi na skrovno mesto ali pod drevenku, nego na svečnjak da oni koji nuter dohađaju, vide svetlost.
- Svetnica tvojega tela je tvoje oko. Ako tvoje oko bude prosto, tak bude tvoje celo telo svetlo, ako pak bude hmanje, bude takaj tvoje telo tmično.
- Gledaj anda da svetlost koja je vu tebi ne bude tmica.
- Ako anda bude tvoje celo telo svetlo niti nikakve tmične strani ne bude imalo, tak bude celo svetlo i bude te kakti svetenje bliskavice rasvečuvalo.
- Dok bi pako jošče govoril, prosil ga je nekoj farizejuš da bi pri njem obedval. I on je nuter išel i sel si je k stolu.
- Farizejuš pako je počel sam vu sebi misliti i govoriti: „Zakaj se ni vmil pred obedom?“
- I reče njemu Gospon: „Sada vi farizejuši ono zvunešnje, pehare i zdele očiščujete, vaše pako nuternje je puno zgrabljivosti i krivice.
- Vi, bedaki, je li ni on koj je načinil zvunešnje, takaj načinil znutrešnje?
- Ništermanje, dajte rajši od onoga kaj je vam zvišega, almuštvo i, nut, vsa su vam čista!
- Ali, jaj vam farizejušom koji desetinite meticu i ruticu i vsako povrtelje, a pravicu i ljubav Božju zapuščate: ova je potrebno včiniti, a ona ne zapuščati.
- Jaj vam farizejušom koji ljubite prva sedališča vu sinagogah i pozdravlanja na trgih.
- Jaj vam ar ste kakti pokopališča koja se ne vidiju i za koja ljudi koji po njih hodiju ne znaju.“
- Nekoj pako zmed pravdoznancev odgovori i reče njemu: „Mešter, pokehdob ti ova govoriš, takaj nas pšaniš.“
- On pako reče: „I vam pravdoznancem jaj ar optršujete ljudi z bremeni koja nemreju podnašati, vi pako sami ne dotikavate se oveh bremeniti z jednem vašem prstom.
- Jaj vam kajti ziđete pokopališča prorokov, vaši pako oci su je vmorili.
- Zaisto, vi svedočite potom da privoljujete činom vašeh ocev ar oni su je doisto vmorili, vi pako ziđete njihove grobe.
- Zato i je mudrost božanska rekla: ʻPošljem k njim proroke i apoštole i zmed njih nekoje budu vmorili i preganjali
- da se vseh prorokov krv koja je od postanka sveta bila prelejana od ovoga pokolenja van izišče:
- od krvi Abela tja do krvi Zakarijaša koj je bil vmorjen med oltarom i hižum.ʼ Zaisto velim vam: ona bu terjana od ovoga pokolenja.
- Jaj vam pravdoznancem ar ste ključ znanja proč vzeli, sami neste nuter išli, a onem koji hočeju nuter iti, prepovedate.“
- Kad bi pako njim ova bil govoril, začeli su se farizejuši i pravdoznanci močno suprotstavljati da bi mu po vnogeh pitanjih njegva vusta zatisnuli
- i delali su mu zasede i iskali kak bi mogli kaj iz njegveh vust vloviti da bi ga optužili.
