Zvračenje nekojega vodenobetežnoga v sobotni dan; Ježuš vuči da se pozvani naj sedeju na zadnje mesto i da se naj siromaki pozivaju. Prilika od velike večerje. Zatajenje i križ.
- I dogodilo se je kad bi Ježuš vu hižu nekojega farizejuškoga poglavara bil zašel v sobotu kruha jest i oni su pazili na njega.
- I, nut, nekoj vodenobetežni človek je bil pred njim.
- I odgovori Ježuš i reče pravdoznancem i farizejušem govoreči: „Je li je slobodno v sobotu vračiti?“
- A oni su mučali. On pako prime njega, zvrači ga i otpusti.
- I odgovori i reče njim: „Gdo zmed vas kojega osel ali vol v zdenec opade ne bude njega taki v sobotni dan van izvlekel?“ Mat 12,11.
- I nesu mu mogli na to odgovoriti.
- Rekel je pako takaj pozvanem, kad je spazil kak si zbiraju prva sedališča, govoreči njim:
- „Kada budeš pozvan na svadbu, tak se ne posadi na prvo mesto da ako bi morebiti koj preštimaneši kak ti od njega bil pozvan,
- ne dojde on koj je tebe i njega pozval i reče tebi: ʻDaj ovomu mesto!ʼ ter bi onda z sramom zadnje mesto vzeti moral.
- Nego kad budeš pozvan, hodi ter se sedi na zadnje mesto da kad on dojde koj te je pozval, reče tebi: ʻPrijatel, hodi gore više!ʼ Onda bude tebi dika pred onemi koji su z tobum pri stolu.“ Prir 25,7.
- Ar vsaki koj se izvišuje, ponizi se i koj se ponizuje, izvisi se.“ Mat 23,12; dole niže 18,14.
- Rekel je pako takaj onomu koj ga je bil pozval: „Kad pripraviš obed ali večerju, tak ne pozivaj tvoje prijatele niti tvoje brate niti rođake niti bogate susede da te morebiti i oni nazad ne pozoveju ter se tebi povraček včini.
- Nego kada pripraviš goščenje, pozovi vboge, gingave, šantave i slepe. Tob 4,7; Prir 3,9; Cirk 4,1.
- I blažen budeš kajti ti nemaju z čem povrnuti ar ti se povrne ob gorestajanju pravičneh.“
- Ova, kad bi nekoj zmed skup sedečeh bil čul, reče njemu: „Blažen koj bude jel kruha vu Kraljestvu Božjem!“
- On pako reče njemu: „Nekoj človek je pripravil veliku večerju i vnoge na nju pozval. Knj skr viđ 19,9.
- I poslal je svojega slugu ob vuri večerje povedat zvanem da bi došli ar su vre vsa pripravljena.
- I počeli su se vsi do jednoga spričavati. Prvi reče njemu: ʻKupil sem si selo i potrebno mi je iziti ter nje pogledati, prosim te, imaj me spričanoga.ʼ
- Drugi pako reče: ʻKupil sem si pet jarmov volov ter je idem skusuvat, prosim te, imaj me spričanoga.ʼ
- A drugi reče: ʻOženil sem se i zato nemrem dojti.ʼ
- I kad bi se bil povrnul sluga, nazvestil je ova svojemu gosponu. Onda se rasrdi gospodar i reče svojemu slugi: ʻIzidi brzo van na ceste i vuljice varaša i dopeljaj sim vboge i gingave i slepe i šantave.ʼ
- I reče sluga: ʻGospone, včinjeno je kak si zapovedal i jošče je mesta.ʼ
- I reče gospon slugi: ʻIzidi van na pute i za plote i prisili je nuter iti da se napuni moja hiža.ʼ
- Velim pako vam da nijeden zmed oneh ljudih koji su bili pozvani ne bude kušal moje večerje.“
- Išla je pako z njim vnožina ljudstva i obrne se i reče njim:
- „Ako gdo k meni dojde i ne oduri svojega oca i mater i ženu i decu i brate i sestre, dapače takaj svoju dušu, nemre biti moj vučenik.
- I koj ne nosi svoj križ i ne hodi za menum, nemre biti moj vučenik. Mat 10,38;16,24; Mark 8,34.
- Ar gdo zmed vas koj hoče turen zidati, ne bude si predi vsel i zračunal stroške koji su potrebni, je li ima tuliko da ga zgotovi
- da ga ne bi morebiti, kad postavi temelj i ne more zgotoviti, vsi koji vidiju, pričeli osmehavati
- govoreči: ʻOv človek je počel zidati, pak ni mogel dokončatiʼ?
- Ali koj kralj bude išel podigati tabor proti drugomu kralju da se ne bi predi vsel i premislil je li more z desetemi jezermi iziti proti onomu koj ide na njega z dvadesetemi jezermi?
- Ako to nemre, tak doklam on jošče dalko je, pošlje poslenike i prosi za mir.
- Ovak anda nijeden zmed vas koj se ne odreče vsemu kaj lada, ne more biti moj vučenik.
- Dobra je sol. Ako pako sol stešča, z čem se bude solilo?
- Niti vu zemlju niti vu gnjoj ni hasnovita, nego se van hiti. Gdo ima vuha na poslušanje, naj posluša!“ Mat 13,9.13.
