Prilika od krivičnoga špana. Dvem gosponom ni moči služiti. Farizejuši osmehavaju Ježušev navuk. Nerazdružljivost hižnoga zakona. Prilika od bogatuša i Lazara.
- Reče pako takaj svojem vučenikom: „Bil je nekoj bogat človek koj je imal špana i ov je bil pri njem optužen kak da bi rasprudil bil njegov imetek.
- I dozove njega i reče njemu: ʻKaj to čujem od tebe? Daj račun od tvojega španuvanja ar ti več ne budeš mogel španuvati.ʼ
- Reče pako špan sam vu sebi: ʻKaj sem čineči pokehdob moj gospon od mene jemlje španiju? Kopati ne morem, a prositi me je sram.
- Ja znam kaj včinim da kada budem zvržen iz španije, primeju mene vu svoje hiže.ʼ
- Skup zezove anda vse dužnike svojega gospona i reče prvomu: ʻTi, kuliko si dužen mojemu gosponu?ʼ
- A on reče: ʻSto lagvic olja.ʼ I reče njemu: ʻVzemi tvoj valuvaš i sedi brzo ter zapiši pedeset.ʼ
- Onda reče drugomu: ʻA ti, kuliko si dužen?ʼ On reče: ʻSto kebličev pšenice.ʼ I reče njemu: ʻVzemi tvoje pismo pak zapiši osemdeset.ʼ
- I pohvalil je gospon krivičnoga špana da je spametno včinil ar sini ovoga sveta jesu spametneši od sinov svetlosti vu svojem pokolenju.
- I ja velim vam: činete si prijatele iz krivičnoga blaga da kada pomenjkate, primeju vas vu vekivečna prebivališča.
- Koj je veren vu najmenjšem, i vu najvekšem je veren i koj je vu malem krivičen, i vu vekšem je krivičen.
- Ako anda vi vu krivičnem blagu neste bili verni, gdo vam bude zaufal to istinsko dobro?
- I ako vi vu tuđem neste bili verni, gdo vam bude dal kaj je vaše?
- Nijeden sluga ne more dvem gosponom služiti ar ali bude jednoga odurjaval, a drugoga ljubil ali se bude jednoga držal, a drugoga zametaval. Vi ne morete Bogu služiti i bogatstvu.“
- Čuli su pako vsa ova farizejuši, koji su bili skupi, i zesmehavali su se iz njega.
- I reče njim: „Vi jeste koji se opravičujete pred ljudmi, Bog pako pozna vaša srca kajti kaj je ljudem visoko, to je pred Bogom odurnost.
- Zakon i proroki dosižu tja do Ivana, odonda počemši nazvešča se Kraljestvo Božje i vsaki se bi rad z silum vu nje vrinuti.
- Lekše je pako da Nebo i Zemlja prejdu kak da od Zakona neg jedna piknja otpade.
- Vsaki koj od sebe otpusti svoju ženu ter drugu vzeme, lotruje i koj od muža otpuščenu ženu vzeme, lotruje.
- Bil je nekoj bogat človek koj se je oblačil vu škrljat i tenko platno ter se je vsaki dan zmožno gostil.
- I bil je nekoj bogec, imenom Lazar, koj je ležal pred njegvemi vratmi pun mozolov
- i želel je zasititi se z droptinjem koje je opadalo od stola bogatuša i nigdo mu ni dal, ali i psi su dohađali i lizali njegve mozole.
- Pripetilo se je pako da bi vumrl bogec i odnešen je od angelov vu Abrahamov naručaj. Vumrl je pako i bogatuš i pokopan je vu peklu.
- I kad bi svoje oči bil zdignul, buduči vu mukah, videl je Abraham[a] izdaleka i Lazara vu njegvem naručaju
- i kričal je i rekel: ʻOtec Abraham, smiluj mi se i pošlji Lazara da omoči kraj svojega prsta i prehladi moj jezik ar trpim velike muke vu ovem plamnu.ʼ
- Abraham pako reče njemu: ʻSinko, spomeni se da si ti prijel dobra vu tvojem živlenju, Lazar pako spodobno zla, vezda se pako on ovde batrive, ti pako mučiš.
- I zvun vsega toga je med nami i vami velika prepast postavljena da oni koji hočeju prek iti otud k vam, ne moreju niti odonud k nam prek prejti ne moreju.ʼ
- I reče: ʻProsim te anda, otec, da ga pošlješ vu hižu mojega oca
- ar imam pet bratov, naj im posvedoči da i oni ne dojdeju vu ovo muk mesto.ʼ
- Abraham pako reče njemu: ʻImaju Mojžeša i proroka, naj nje poslušaju.ʼ
- On pako reče: ʻNe, otec Abraham, če gdo zmed mrtveh bude išel k njim, budu činili pokoru.ʼ
- On pako reče njemu: ʻAko Mojžeša i proroke ne poslušaju, ne budeju veruvali ako se gdo i od mrtveh gore stane.ʼ“
