Gorestajanje. Ježuš se iskažuje dvem vučenikom idučem vu Emaus i apoštolom. Dokažuje svoje gorestajanje i obeča Duha Svetoga poslati. Zastuplenje vu Nebo.
- Prvi pako dan po soboti, kruto rano, dojdu k grobu i donesu začimbe koje su bile pripravile. Mat 28,1; Mark 16,1; Jan 20,1.
- I našle su kamen od groba odvaljen.
- I kad bi nuter bile zašle, nesu našle telo Gospona Ježuša.
- I dogodilo se je kad bi nad tem vu srcu kruto žalosne bile, nut, dva človeki stali su kraj njih vu jasneh svitah.
- Kajti se pako jesu prestrašile i svoj obličaj k zemlji nagnule, rečeju njim oni: „Kaj iščete živoga med mrtvemi?
- Ne ga ovde, neg se je gore stal. Spomenite se kak je vam govoril buduči jošče vu Galileji
- kad je rekel: ʻSin Človečji mora se vu ruke grešneh ljudih izdati i raspeti i tretji dan se gore stati.ʼ“ Mat 16,21; 17,21.
- I one se jesu spomenule iz njegveh rečih.
- I povrnule su se od groba i vsa ova nazvestile onem jedenajstem i vsem ostalem.
- Bila je pako Marija Magdalena i Ivana i Marija, Jakopova mati, i ostale koje su z njimi bile, koje su ova povedale apoštolom.
- I videle su se njim ove reči kakti bedastoča i nesu im veruvali.
- Peter pako podigne se, odrči k grobu, nagne se i vidi samo vilahne ležati i odide čudeči sam vu sebi nad tem kaj se je bilo dogodilo.
- I, nut, dva zmed njih išli su on isti dan vu gradišče koje je bilo šezdeset tečajeh daleko od Jeruzalema, imenom Emaus. Mark 16,12.
- I oni su se med sobum razgovarjali od vseh oveh koja se jesu dogodila.
- I včinjeno je kad bi se med sobum razgovarjali i spitavali, približal se je sam Ježuš i išel z njimi.
- Njihove pako oči bile su zadržane da ga ne bi prepoznali.
- I on reče njim: „Kakvi su to spomenki koje hodeč med sobum vodite ter ste žalosni?“
- I jeden, kojemu je bilo ime Kleofaš, odgovori i reče njemu: „Ti li si jedini prihodnik vu Jeruzalemu koj nesi zeznal koja su vu njem včinjena ove dane?“
- A on reče njim: „Koja?“ Oni pako rečeju: „Od Ježuša Nazarenskoga, koj je bil prorok, zmožen človek vu činenju i govorenju pred Bogom i vsem ljudstvom,
- i kak su njega aldovnički poglavari i naši oblasniki predali na smrtno opsuđenje ter njega raspeli.
- Mi se pako jesmo ufali da bude on otkupil Izraela. I sada zvrhu vseh oveh je danas tretji dan kaj su ova včinjena.
- Ali takaj nekoje žene zmed našeh jesu nas prestrašile, koje su pred videlom bile pri grobu
- i pokehdob nesu našle njegvo telo, jesu došle i povedale da su takaj videle skazanje angelov koji povedaju da on žive.
- I nekoji zmed našeh jesu odišli k grobu i onak našli kak su povedale žene, njega pako nesu našli.“
- A on reče njim: „O, vi nespametni i kesnoga srca na veruvanje vsega onoga kaj su govorili proroki!
- Je li ni moral Krištuš ova trpeti ter tak vu svoju diku vlesti?“ Šolt 109,7.
- I počme od Mojžeša i vseh prorokov i razložil je njim koja se vu celem Pismu od njega nahađaju napisana.
- I približavali su se k gradišču kam su išli, a on se je včinil kak da bi dalje hotel iti.
- Oni pako jesu njega silili govoreči: „Ostani z nami ar se zamračuje i dan se je vre nagnul.“ I zašel je z njimi nuter.
- I včinjeno je kad bi z njimi pri stolu sedel, vzeme kruh, blagoslovi ga, prelomi ga i da ga njim.
- I otprle su se njihove oči i oni su njega prepoznali, on pako znikne spred njihoveh očih.
- I reče jeden drugom: „Je li ni bilo naše srce goruče vu nas kad je putem govoril i nam Pisma očituval?“
- I podigli su se onu istu vuru i povrnuli vu Jeruzalem i našli su skup spravljene one jedenajst i one koji su z njimi bili,
- koji su povedali da se je Gospon istinito gore stal i iskazal Šimunu!
- I oni su njim povedali koja su včinjena putem i kak su ga oni vu lamanju kruha prepoznali.
- Dok bi pako oni ova govorili, stane Ježuš oposred med njimi i reče njim: „Mir vam budi, ja jesem, najte se bojati!“ Mark 16,14; Jan 20,19.
- Oni se pako jesu zbojali i prestrašili i štimali su da vidiju duha.
- I on reče njim: „Kaj ste se prestrašili i zakaj takva mišlenja ophađaju vaša srca?
- Poglejte moje ruke i moje noge, ja sem on isti, tipljite i glejte ar duh nema mesa i kostih, kak vidite da ja imam.“
- I kad bi to bil rekel, pokazal je njim ruke i noge. Jan 20,27.
- Kajti pako oni jošče nesu veruvali od veselja i čudili se, reče on: „Imate li ovde kaj za jesti?“
- I oni su mu ponudili falat pečene ribe i setinu meda.
- I poklamkam bi on pred njimi bil jel, vzeme ostanke i da je njim.
- I on reče njim: „Ovo su reči koje sem vam govoril dok sem jošče z vami bil da se moraju ispuniti vsa koja su od mene pisana vu Mojžeševem zakonu i vu prorokih i šoltarih.“
- Onda je njim otprl čut da bi razmeli Pisma.
- I reče njim: „Ar tak je pisano i tak je moral Krištuš trpeti i tretji dan od mrtveh gore stati, Šolt 18,6,
- i da se vu njegvem imenu pokora i otpuščanje greha nazvešča med vsemi narodi, počemši od Jeruzalema. Čin ap 5,31.
- Vi pako jeste svedoki vseh oveh. Čin ap 1,8.
- I ja pošljem obečanje mojega Oca zvrhu vas, vi pako ostanite vu varašu doklam budete obdani z močjum iz visine.“
- I ispelja nje van vu Betaniju i zdigne svoje ruke ter nje blagoslovi.
- I včinjeno je dok bi je blagoslavljal, odluči se od njih ter se podigne vu Nebo.
- Oni pako jesu se njemu vklanjali i povrnuli vu Jeruzalem z velikem veseljem.
- I bili su vsevdilj vu Cirkvi ter Boga hvalili i dičili. Amen.
