Od kojeh pređov ishađa Krištuš primerom tela, angel podvuča Jožefa zvrhu Marije, svoje zaručnice, po Duhu Svetem prijetja i njejinega budučega rođenja.
- Knjiga pokolenja Ježuša Krištuša, sina Davidovoga, sina Abrahamoga.
- Abraham je rodil Izaka, a Izak je rodil Jakopa, Jakop pako je rodil Judaša i njegve brate.
- A Judaš je rodil Faresa i Zarama iz Tamare, Fares pako je rodil Ezrona, a Ezron je rodil Arama,
- a Aram je rodil Aminadaba, a Aminadab je rodil Nasona, a Nason je rodil Salmona,
- a Salmon je rodil Boza iz Rahabe, a Boz je rodil Obeda iz Rute, a Obed je rodil Jese, a Jese je rodil Davida kralja,
- a David kralj je rodil Šalomona iz one koja je bila Urijaševa. 2Knj Kral 12,24.
- A Šalomon je rodil Roboama, a Roboam je rodil Abijaša, a Abijaš je rodil Azu,
- a Aza je rodil Jozafata, a Jozafat je rodil Jorama, a Joram je rodil Ozijaša,
- a Ozijaš je rodil Joatama, a Joatam je rodil Akaza, a Akaz je rodil Ezekijaša,
- a Ezekijaš je rodil Manaseša, a Manaseš je rodil Amona, a Amon je rodil Jozijaša,
- a Jozijaš je rodil Jekomijaša i njegve brate za vreme babilonskoga sužanstva.
- A po babilonskem sužanstvu je rodil Jekomijaš Salatijela, a Salatijel je rodil Zorobabela,
- a Zorobabel je rodil Abijuda, a Abijud je rodil Elijacima, a Elijacim je rodil Arona,
- a Aron je rodil Sadoka, a Sadok je rodil Akima, a Akim je rodil Elijuda.
- A Elijud je rodil Elejazara, a Elejazar je rodil Matana, a Matan je rodil Jakopa.
- A Jakop je rodil Jožefa, muža Marije od koje se je narodil Ježuš koj se zove Krištuš.
- Vseh anda pokolenj od Abrahama tja do Davida je četrnajst pokolenj, a od Davida tja do babilonskoga sužanstva je četrnajst pokolenj, a od babilonskoga sužanstva tja do Krištuša je četrnajst pokolenj.
- Krištuševo pako rođenje je ovak bilo: kad je zaručena bila mati njegva Marija z Jožefom, znašla se je, prvlje neg bi se skup zišli, noseča od Duha Svetoga.
- Jožef pako, nje muž, kajti je bil pravičen i ni nju htel razglasiti, namislil je nju otajno otpustiti.
- Kad bi pako on to vu sebi premišljaval, nut, iskazal se je njemu vu snu angel Gosponov govoreči: „Jožef, sin Davidov, ne boj se k sebi vzeti Mariju, tvoju tovarušicu, ar kaj se je vu njoj započelo, je od Duha Svetoga.
- Porodi pako sina i ozval ga budeš imenom Ježuš ar on oslobodi svoje ljudstvo od njihoveh grehov.“
- Vse pako to je včinjeno da bi se spunilo kaj je od Gospona rečeno po proroku govorečemu:
- „Nut, devica bude zanosila i porodi sina i zvali budu njegvo ime Emanuel, koje rastolnačeno znamenuje: ʻBog z nami!ʼ“
- Obuđen pako Jožef iz sna je včinil kak je njemu zapovedil angel Gosponov i vzel je k sebi svoju tovarušicu.
- I ni nju spoznal doklam je porodila svojega prvorođenoga sina i ozval je njega imenom Ježuš.
