Podalšenje ovoga Gorskoga prodečtva. Almuštvo, molitva, post. Kinč vu Nebu. Prostoča oka. Služba Božja. Odvrženje vsake prekoredne skrbi za vremenita. Zaufanost vu providnost.
- „Pazete da vi vašu pravicu ne včinite pred ljudmi da se od njih vidite, drugač ne budete imali plaču pri vašem Ocu koj je na Nebesih.
- Kada anda činiš almuštvo, ne trubentaj pred sobum kak činiju skazlivci vu sinagogah i na putih da se poštuju od ljudih. Stanovito velim vam: oni su prijeli svoju plaču.
- Kada pako ti činiš almuštvo, tak naj ne zna tvoja leva ruka kaj čini tvoja desna
- da bude tvoje almuštvo na skrovnom i tvoj Otec, koj vidi vu skrovnom, on ti povrne.
- I kada molite, tak ne budite kakti skazlivci koji radi vu sinagogah i na vuglih vulic stoječi moliju da se vidiju od ljudih. Stanovito velim vam: oni su prijeli svoju plaču.
- Ti pako, kada moliš, pojdi vu tvoju hižu, zapri vrata i moli tvojega na skrovnom i tvoj Otec, koj vidi vu skrovnom, povrne tebi.
- Kada pako molite, najte vnogo govoriti kakti poganini ar oni štimaju da se vu svojem vnogem govorenju posluhneju.
- Ne postanite anda njim jednaki ar vaš Otec zna kaj je vam potrebno predi nego njega prosite.
- Vi pako ovak molete: ʻOtec naš, koj jesi na Nebesih, sveti se ime tvoje.
- Dojdi Kraljestvo tvoje. Budi volja tvoja, kak na Nebu i na Zemlji.
- Kruha našega vsagdašnjega daj nam denes.
- I otpusti nam duge naše kak i mi otpuščamo dužnikom našem.
- I ne vpeljaj nas vu skušavanje, nego oslobodi nas od zla. Amen.ʼ
- Ar ako vi otpustite ljudem njihove grehe, tak bude takaj vam vaš Otec nebeski otpustil vaše pregreške.
- Ako pako vi ne otpustite ljudem, tak niti vam ne otpusti vaš Otec vaše grehe.
- Kada se pako vi postite, tak ne postajajte žalosni kakti skazlivci ar oni pogrđuju svoje obraze da se vidiju od ljudih da se postiju. Stanovito velim vam da su prijeli svoju plaču.
- Kada se pako ti postiš, namasti tvoju glavu i vmi tvoj obraz
- da se ne bude ljudem videlo da se postiš, nego tvojemu Ocu koj je na skrovnom. I Otec tvoj, koj na skrovnom vidi, povrne tebi.
- Ne spravljajte si kinče na Zemlji gde nje hrđa i mol zatira i gde nje tati potkapaju i pokradeju,
- nego spravljajte si kinče vu Nebu gde nje niti hrđa niti mol ne pokvari i gde nje tati ne potkapaju niti ne pokradeju.
- Ar gde je tvoj kinč, onde je takaj tvoje srce.
- Posvet tvojega tela je tvoje oko: ako li je tvoje oko priprosto, tak bude tvoje celo telo svetlo.
- Ako li je pako tvoje oko hudobno, tak bude tvoje celo telo tmično. Ako li je anda svetlost koja je vu tebi tmica, tak ista tmica kulika bude?
- Nigdo ne more dvem gosponom služiti ar ali jednoga bude odurjaval, a drugoga ljubil ali se jednomu bude podlagal, a drugoga zanemar držal. Vi ne morete Bogu služiti i Mamonu.
- Zato velim vam: ne skrbete se za vaše živlenje, kaj budete jeli, niti za vaše telo, kaj budete oblačili. Je li ni živlenje več nego je jelo i telo več nego je oprava?
- Poglejte na ptice nebeske ar one niti ne sejeju niti ne ženjeju niti ne spravljaju vu škednje ter vendar Otec vaš nebeski hrani nje. Je li neste vi vnogo više od njih?
- Gdo pako zmed vas more z svojum skrbljivostjum nadostaviti jeden laket k svojoj višini?
- I za opravu kaj se skrbite? Premislete poljske lilijume kak rasteju: oni ne delaju ni ne predeju,
- ter vendar velim vam da niti isti Šalomon vu vsoj svojoj diki ni bil tak opravljen kak jeden zmed oveh.
- Ako pako Bog poljsku travu, koja je danas, a vre zutra hiti se vu peč, tak opravlja, kuliko bolje bude vas, vi male vere ljudi!
- Najte anda skrbljivi biti govoreči: ʻKaj budemo jeli?ʼ, ali: ʻKaj budemo pili?ʼ, ali: ʻKaj budemo oblačili?ʼ
- Ar vsa ova iščeju poganini. Vaš pako nebeski Otec zna da vi vsa ova potrebujete.
- Iščite anda prvič Kraljestvo Božje i pravicu njegvu i vsa ova pridaju se vam.
- Ne skrbete se anda za zutrašnji dan ar zutrašnji dan bude se sam za se skrbel. Vsakomu dnevu je zadosta svoja lastovita zloba.“
