Pavel vu Korintušu svoje tira rukotvorstvo pri Akvili i premda proti prodekuvanju njegovomu bi blaznili Židovi, čuje vendar vu viđenju [da] se onde vnogo ljudstva na veru obrne, ali po poldrugem letu tuži se od Židovov pred Galijonem, velikovečnika namesniku, i za vnogemi dnevi dojde vu Efežuš ter vu razlučeneh državah bratju objačuje; Apolo žestoko Židove z rečmi oblađuje pokazuči z Pismih da Ježuš je krištuš premda lestor Ivanov krst bi mu bil znan.
- Zatem iziduči iz Atene, došel je vu Korint.
- I najduči nekojega Židova po imenu Akvila, z Pontikuša rodom, koj onomadne bil je došel iz Laške i Priscilu, ženu njegovu, (zato kajti je zapovedal Klaudijuš cesar iziti vsem Židovom z Rima) išel je k njim.
- I kajti one iste meštrije je bil, ostal je pri njih i delal, bila je pako meštrija njihova da su šatore delali.
- I pregovarjal se je vu sinagogi po vsakoj soboti medpostavljajuči ime Gospona Ježuša i nagovarjal je Židove i Grke.
- Kad bi pako došli bili iz Macedonije Silaš i Timotejuš, nastojal je z rečjum Pavel svedočeči Židovom da krištuš je Ježuš.
- Kada su pako suprot govorili njim i blaznili, stepivši opravu svoju, rekel je njim: „Krv vaša naj bude zvrhu glave vaše, ja sem čist. Od vezda k poganinom pojdem.“
- I odiduči odonud, vleznul je vu hižu nekojega po imenu Tituša Justuša, klanjajučega se Bogu, kojega hiža držala se je sinagoge.
- Krišpuš pako, poglavar sinagoge, veruval je Gosponu z vsum hižum svojum i vnogi zmed Korintijancov čujuči veruvali jesu i bili su krščeni.
- Rekel je pako Gospon v noči po viđenju Pavlu: „Naj se bojati, nego govori i ne muči
- ar ja jesem z tobum i nigdo se ne stane proti tebi da bi ti naškodel ar ja imam vnogo ljudstva vu varašu ovem.“
- Ostal je pako tam jedno leto i šest mesecov vučeči med njimi reč Božju.
- Kad bi pako Galijon namesnik velikovečnika bil vu Akaji, podignuli su se složno Židovi proti Pavlu i dopeljali su ga pred sudnji stol
- govoreči da proti Zakonu ov vpučuje ljudi častiti Boga.
- Kad je pako Pavel začel govoriti, rekel je Galijo Židovom: „Da bi bila kakova krivičnost ali zločesto delo, o, ljudi Židovi, pravedno bi vas poslušal.
- Ako je pako pitanje od rečih i imen i Zakona vašega, vi sami viđte, ja neču toga sudec biti.“
- I odegnal ih je od sudnjega stola.
- Pograbivši pako vsi Sosteneša, poglavara sinagoge, tukli su ga pred sudbenem stolom ali Galijon nikaj ni za to maral.
- Pavel pako pokehdob jošče vnogo dnevov tam bi bil sprevodil, spričavši se bratom, odbrodil je vu Siriju (i z njim Priscila i Akvila), koj si je bil obril glavu vu Cenkri ar imel je zagovor.
- I došel je vu Efezuš i nje onde ostavil. On pako vleznuvši vu sinagogu, pregovarjal se je z Židovi.
- Poklamkak su ga prosili oni da bi duže vremena ostal, ni privoljil,
- nego spričavši se i govoreči: „Opet se povrnem k vam z Božjum voljum“, odišel je z Efezuša.
- I dole dojduči v Cezareju, išel je gore vu Jeruzalem i pozdravil Cirkvu ter odišel dole vu Antiokiju.
- I sprevodivši onde nekoje vreme, odišel je ophađajuči po redu galatijansku državu i Frigiju, potvrđavajuči vse vučenike.
- Židov pako nekoj, Apolo z imenom, Aleksandrinec rodom, človek blagorečljiv, došel je vu Efezuš, moguč vu Pismih.
- Ov bil je podvučen v putu Gosponovem i buduči zažganoga duha, govoril je i vučil marljivo ona koja su od Ježuša znajuči lestor Ivanov krst.
- Ov anda počel je srčeno govoriti vu sinagogi. Kojega kad bi bila čula Priscila i Akvila, vzeli su ga k sebi i bolje rastolnačili su njemu puta Gosponovoga.
- Kada je pako hotel iti vu Akaju, opomenjeni brati pisali su vučenikom da bi ga prijeli. Koj kad bi bil došel, vnogo je pripomogel onem koji su bili veruvali.
- Ar silno je Židove premagal, očivesto pokazuči po Pismih da Ježuš je obečani krištuš.
