Pavel od stotnika Julijuša vodi se proti Rimu brodeči po razlučneh mestah, zbog suprotivnoga pako njim vetra, komaj dojdu na nekoje vu Kreti mesto iz kojega, premda bi bil prenazvestil Pavel da je pogibelno brodenje, iziduči, trpiju silnoga vihra ter zadnjič po obatrivenju Pavlovem, koj pripovedajuči da načinjeno je njemu zbog oslobođenja očituvanje, opomina nje na jeđenje; pretrpevši ladjoteru, izišli su vsi zdravi.
- Kak pako odsuđeno je bilo da se brodil bude on vu lašku zemlju ter da se naj preda Pavel z ostalemi vuzniki stotniku z imenom Julijušu čete cesarove,
- stupivši pako vu ladju adrumetinsku, počemši broditi vuz kraje Azije, odrinuli smo, ostal je pako z nami Aristarkuš, Macedonec iz Tesalonike.
- Buduči pako dan došli smo v Sidon. Človečno pako zadržavajuči se Julijuš proti Pavlu, pustil ga je k prijatelom iti ter za se skrbeti.
- I kada smo odonud odrinuli, brodili smo spod Cipra zato kajti su nam vetri suprotivni bili.
- I morje proti Ciliciji i Pamfiliji prebrodivši, došli smo v Lištru koja je vu Liciji.
- I onde najduči stotnik ladju aleksandrinsku, brodeču vu lašku zemlju, prestavil je na nju.
- I kada bi vnoge dane mudno se brodili ter komaj bi bili došli naproti Gnidu pokehdob nam je branil veter, pribrodili smo k Kreti poleg Salmone
- i komaj smo se mimo prepeljali, došli smo vu mesto nekoje koje se zove Dober Brod poleg kojega bil je varaš Talasa.
- Pokehdob pako vnogo vremena bi bilo prešlo i kada vre ne bi bilo segurno brodenje zato da vre i post bi bil minul, batrivel je nje Pavel
- govoreči njim: „Ljudi, vidim da z škodum i velikem kvarom ne lestor bremena i ladje, nego takaj živlenja našega počimlje biti brodenje.“
- Stotnik pako ravnitelu i gospodaru ladje več je veruval kak onem koja se od Pavla rekla jesu.
- I pokehdob prikladna brodostaja ne bi bila za ostati čez zimu, vekša stran svetuvala odbroditi odonud ako bi kak mogli dojduči vu Feniciju čez zimu ostati, koja je brodostaja vu Kreti gledeča k poldnevu i večeru.
- Kada bi pako jug počel puhati, nameneči naprvovzetje svoje stignuti, kada bi bili od Asona odrinuli, brodili su se mimo Krete.
- Nedugo potlam pako podignul se je čez nju veter silni koj se zove bura.
- I kada bi se bila ladja od vetra pograbila i ne bi mogla suprot vetru stati, pustili smo ju vetrom i tak smo se nosili.
- Vu međimorje pako nekoje dobežeči, koje se zove Kauda*Klauda, komaj smo obdržali čuna.
- Kojega gore potegnuvši, pomagače potrebuvali jesu privezavši ladju, boječi se da ne bi na školjk zadeli, isputivši jadre, tak su se nosili.
- Pokehdob pako jako se od slapov gonili jesmo, drugi dan su izmetanje načinili.
- A tretji dan z svojemi rukami vekše orudelje ladje van hitali jesu.
- Pokehdob se pako čez više dnevov niti Sunce niti zvezde skazale nesu i viher nemali opet nastajal, vre pogubili jesmo vse ufanje zdržavanja našega.
- I poklamkak je veliko stradanje nastalo, onda stoječi Pavel na sredi med njimi rekel je: „Potrebno je bilo zadnjič, o, ljudi, da posluhnuvši mene ne bi bili od Krete proč odišli ter tak ovu škodu i zgubiček namesto dobička imeti.
- I sada svetujem vam da dobre volje budete ar nijednoga zmed vas živlenje ne pogubi se zvun ladje.
- Ar pristupil je k meni ovu noč angel Božji, čiji jesem i kojemu služim,
- govoreči: ʻNe boj se Pavel, pred cesara je potrebno tebi dojti i, nut, daruval ti je Bog vse koji s tobum brodiju.ʼ
- Zaradi česa dobre volje budete, ljudi, ar verujem Bogu da tak bude kak mi je povedano.
- Na nekoje pako međimorje potrebno je nam dojti.“
- Ali kada bi četrnajsta noč nadošla, brodečem nam na Adrijanskem morju okolo pol noči sumljili su ladjari da se njim približava nekakva država.
- Koji takaj ispustivši olovnicu, našli su dvadeset sežnov i malo dalje iduči odonud, našli su petnajst sežnov.
- Boječi se pako da se ne bi na kamenita mesta zadeli, z karme vrguči četiri mačke, želeli su da bi dan nastal.
- Kada bi pako ladjari hoteli pobeči iz ladje, poklamkak bi bili spustili čuna vu morje pod izlikum da bi hoteli iz sprednjega ladje kraja dole spuščati,
- rekel je Pavel stotniku i vojniki: „Ako ovi na ladji ne ostaneju, tak vi oslobođeni postati ne morete.“
- Onda su odrezali vojniki vuža čuna i puščali su da je van ispal.
- I kada bi svetlost počimala nastajati, prosil je Pavel vse da bi hranu vzeli govoreči: „Denes je četrnajsti dan kak vi čakajuči tešči ostajete nikaj k sebi ne vzemši.
- Zbog česa prosim vas da vzemete hranu za zdržavanje vaše ar nijednomu zmed vas niti las iz glave ne spadne.“
- I kada bi bil ova zgovoril, vzemši kruha, hvalu dal je Bogu vu nazočnosti vseh i kada bi bil prelomil, počel je jesti.
- Srčeneši pako včinjeni vsi i oni su k sebi vzeli hranu.
- Bilo je pako nas vseh skupa duš na ladji dvesto sedemdeset i šest.
- Nasičeni pako z hranum zlehkotili su ladju, hitajuči pšenicu vu morje.
- Kada pako bi bil dan nastal, zemlju nesu poznali, nekojega pako morskoga zatoka jesu v pamet vzeli imajučega obrežje na koje su mislili ako bi mogli izvleči ladju.
- I kada su mačke gore zdignuli, predali su se morju, skupa raspustivši vuzle zadnjeh jadrih i podigši malu jadru proti vetru, držali su se k obrežju.
- Kad bi se pako namerli bili na mesto dvojega morja, zadeli su ladju na pučinu i sprednji kraj ladje zadnjič nateknjen je negenjen ostal, zadnji pako kraj raspucaval se je od sile morja.
- Vojnikov pako tolnač je bil da bi se vuzniki pomorili, da ne bi koj, kada bi bil ispitaval, vušel.
- Stotnik pako hotejuči obdržati Pavla, prepovedal je to činiti i zapovedal onem koji bi znali plavati da bi se v morje spustili najprvi i van splavali ter na suho izišli,
- a ostale druge ke na deskah su van nosili, ke pako na kakovem ostanku od boke vtrgnjenem. I tak je včinjeno da su vse duše žive izišle na suho.
Objašnjenje
- *Klauda ↩︎
