Knjiga Rute — Del IV.

Booz vzimlje Rutu.

I Booz je išel gore k vratam^* i onde si je vsel. I kad bi on bil videl mimo prehađati rođaka od kojega je bilo poprej govorenje, rekel je njemu poklamkam bi njega po njegvem imenu bil zval: „Zavrni se jedno malo sim i sedi se ovde.“ I on se je navrnul ter si je vsel.
Booz pako je vzel deset ljudih zmed starešeh varaša i reče njim: „Sedite si sim!“
Poklamkam bi se ovi bili vseli, reče rođaku: „Noemi, koja se je iz moabitske države povrnula, bude jednu stran njive našega brata Elimeleka prodala.
To ja jesem hotel tebi nazvestiti i povedati pred vsemi koji ovde sediju i pred starešemi mojega ljudstva. Je li hočeš nju rodbinstva pravici primerno^* ladati, tak kupi nju i ladaj. Ako se pako tebi ne dopada, tak meni poveđ da znam kaj imam včiniti. Ar nikoga ni rođaka kak ti, koj jesi prvi, i ja, koj jesem drugi.“ On pako odgovori: „Ja njivu hoču kupiti!“
Booz pako reče njemu: „Kada kupiš njivu iz ruk ove žene, moraš takaj Rut Moabitkinju, ženu pokojnjega vzeti^* da ime tvojega rođaka vu njegvi odvečini obudiš.“^*
Onda reče on: „Ja odstupljujem od rodbinstva pravice ar ja ne smem odvetek mojega plemena zatrgnuti.^* Ti si posluži z mojum pravicum od koje da ja dragovoljno odstupljujem, očitujem.“
Bila je pako vu Izraelu od starine ova navada med rođaki da kada je jeden svoju pravicu drugomu hotel prepustiti, jeden^* na prepuščanja potvrđenje je zezul nožnu obuču i nju drugomu predal.^* Ovo je bilo vu Izraelu prepuščanja^* svedočanstvo.
Zato je rekel Booz svojemu rođaku: „Zezuj tvoju obuču.“^* I on je nju sproti zezul iz svojeh nog.
I Booz reče starešinam i svemu ljudstvu: „Vi jeste denes svedoki da ja iz ruk iste Noemi jesem vu oblast prijel vsa koja jesu bila Elimelekova, i Kelionova, i Mahalonova,
i da ja Rut Moabitkinju, Mahalonovu ženu, jesem vzel za ženu da vu njegvem odvečtvu obudim ime pokojnjega, da se ne izbriše ime od njegvoga plemena, od njegveh bratov i njegvoga ljudstva. Ovoga jeste vi, velim, svedoki!“
Na to je odgovorilo sve ljudstvo, koje je bilo pri vratih, i stareši: „Mi jesmo svedoki. Gospon naj načini ovu ženu koja vu tvoju hižu dojde kak Rakelu i Liju, koje jesu izraelsku hižu zezidale, da bude pelda kreposti vu Efrata i da ima glasovito ime vu Betlehemu.
I kak hiža Fareza,^* kojega je Tamar Judašu porodila, ovak naj postane tvoja hiža od roda kojega tebi bude dal Gospon iz ovoga dekljiča.“
Booz je anda vzel Rutu i z njum se je oženil. I on je k njoj zašel i Gospon je njoj dal da je zanosila i porodila sina.
Onda jesu rekle žene Noemi: „Blagoslovljen budi Gospon koj ni dopustil da bi vu tvojem plemenu menjkal odvetek kojega ime bi se vu Izraelu imenuvalo.
Tak da bi takaj ti imala koga koj bi batrivel tvoju dušu i tebe vu tvojoj starosti prehranil ar on je rođen od tvoje snehe koja tebe ljubi i ona je tebi boljša, nego da bi ti sedem sinov imela.“
I Noemi je vzela dete i nje položila vu svoje krilo i bila je njemu kakti dojka i pestinja.
I susede jesu njoj željele sreču i rekle: „Noemi je se narodil sin.“ I one jesu njega ozvale imenom Obed: ov je otec Izaija, Davidovoga oca.
Ovo jesu Farezova pokolenja: Farez je rodil Ezrona, 1Par 2,5; 4,1; Mat 1,3,
Ezron je rodil Arama, Aram je rodil Aminadaba,
Aminadab je rodil Nahasona, Nahason je rodil Salmona,
Salmon je rodil Booza, Booz je rodil Obeda,
Obed je rodil Izaija, Izaija je rodil Davida.^*

Objašnjenje

*
Mesto gde se posli opčinski jesu opravljali. ↩︎
*
Kajti nju ona sama ne more obdelavati. Ona nju ponuđa najbližešemu rodbinčetu da se vu plemenu obdrži niti stranjskomu ne more prodati. ↩︎
*
Tak takaj imaš dužnost odvečinu za pleme obdržati koju onda spuniš ako vzemeš Rutu i iz nje zadobiš sina koj bude nosil ime njejinega pokojnjega muža. ↩︎
*
Da z njum imaš sina koj primerom Zakona (5Moj 25,5) tvojega pokojnjega rođaka ime i odvečtvo prevzeme. ↩︎
*
Ja bi po ovi ženidbi svoj lastoviti odvetek zapustil i potom mojemu društvu (ženi i deci) na škodu bil. ↩︎
*
Koj je svoju pravicu prepuščal. ↩︎
*
Na znamenje da gdo svoju pravicu istom ono na čem stoji prepušča i od nje odstupljuje. Prisp. 5Moj 25,7.9. ↩︎
*
Prepuščanja svoje pravice. ↩︎
*
Vu židovskem: I rođak reče Boozu: „Kupi ti nju!“ ↩︎
*
V. r. 18. Prisp. 1Moj 38,29. ↩︎
*
Nekoja kolena vidiju se biti preskočena kaj vu istočneh narodih rodoslovu ni nikaj nenavadnoga kajti vu njih imena dedov višeputi vu sebi zadržavaju imena ocov. ↩︎