Knjiga Judite — Del IV.

Izraelci pripravljaju se na suprotstavlanje i Boga prosiju za pomoč.

Onda su to čuli sini izraelski koji su stanuvali vu židovski zemlji^* i njega se kruto jako jesu bojali.
Strah i trepetanje je njihova čutenja prevzelo ar su se bojali da ne bi Jeruzalemu i Gosponovi Cirkvi to včinil kaj je včinil ostalem varašem i njihovem cirkvam.^*
I poslali su vu vsu Samariju^* naokol tja do Jerika i opseli su vse vrhe gor
i svoja sela jesu z zidmi opkolili i skupili žitek da bi na boj bili pripravljeni.
Takaj aldovnik^* Elijakim je pisal vsem koji su bili proti Ezdrelonu, koj suprot velikomu polju poleg Dotajina leži, i vsem kud bi mogel neprijatel prejti
da bi opstrli steze gor po kojeh bi se moglo vu Jeruzalem dojti i tam bi stražil gde bi tegnul biti vuzek put med gorami.
I izraelski sini jesu včinili kak je njim aldovnik Gosponov Elijakim zapovedal.
I ves puk je kričal k Gosponu z velikem nastojanjem i oni su skupa z ženami ponizavali svoje duše vu postih i molitvah.
I aldovniki jesu pokorne oprave oblačili i mala deca jesu bila dole položena pred Gosponov oltar i Gosponov oltar je bil pokrit z pokornem ogrinjalom.^*
I vsi skupa jesu kričali proti Gosponu, izraelskomu Bogu, da se ne bi njihova deca njim z silum otimala i njihove žene ne bi bile zarobljene i njihovi varaši razrušeni i njihovo svetotajstvo ognjušeno i niti oni ne bi narodom na osramočenje postali.^*
Onda je Elijakim, veliki aldovnik Gosponov, ves Izrael ophađal i nje nagovarjal
i rekel: „Znajte da bude Gospon vaše prošnje posluhnul ako li budete stalni opstali vu postih i molitvah pred Gosponovem licem.^*
Spomenite se iz Mojžeša, Gosponovoga službenika, koj je Amaleka, kad se je on vu svoju moč i svoju mogučnost i vu svoj šereg i vu svoje ščite i vu svoje voze i vu svoje konjanike zaufal, ne vu borenju z mečom, nego po svojeh sveteh prošnjah vu molenju obladal.
Ravno tak se bude vsem Izraela neprijatelom događalo ako li stalni opstojite vu tem delu koje ste započeli.
Na ovo njegvo opominanje jesu pred licem Gosponovem opstajali moleči Gospona
tak da su takaj oni^* koji su Bogu ognjoaldove donašali, z pokornemi opravami oblečeni i z pepelom po glavi potrušeni svoje aldove Gosponu zvršavali.
I vsi su iz svojega celoga srca Boga prosili da bi se on na svoj izraelski puk milostivno ogledati hotel.

Objašnjenje

*
Vu židovskem kraljestvu. ↩︎
*
Grčko prenašanje pridaje k tomu da se Židovi malo predi toga jesu povrnuli iz sužanstva i Cirkvu, koju je Manaseš kralj po svojem bolvanomolstvu oskrunil, znovič očistili. Po ovem zaroblenju ne mora se razmevati ono sedemdestletno babilonsko, kaj očivesto otud sledi, pokehdob vu grčkem prenašanju nikakov spomenek ne biva od nazadzezidanja Cirkve, nego samo od novoga posvečenja predi ognjušene. Vre pako razmeva se sužanstvo vu koje je bil nepobožni Manaseš (vidi Vpelj.) z višemi Židovmi otpeljan. Iz ovoga sužanstva jesu se Židovi vre predi povrnuli nego bi Holoferneš vu židovsku zemlju bil vpal, akoprem njihov kralj Manaseš je bil obdržan vu babilonski vuzi iz koje on stoprv kesneše je bil ispuščen. Oni Židovi koji se jesu povrnuli, jesu očistili Cirkvu, kaj isto je kesneše takaj Manaseš včinil. V. 2Par 33, 11–16. ↩︎
*
Koju po Senakeribovem potučenju je pod se bil spravil židovski kralj. ↩︎
*
Veliki aldovnik. ↩︎
*
Da se pokaže da mora opčinsko tuguvanje i pokorenje biti na odvrnenje nastajuče pogibeli (red 10.). ↩︎
*
Ostali narodi i knezi jesu se povdali pod Holoferneševu oblast, puk pako izraelski je se pod mogučnum rukum Božjum ponizil (1Pet 5,6) i po ovem svojem poniženju je zaslužil oholnosti i nevernosti obladavec postati. ↩︎
*
Neg samo stalnosti je bilo obečano obladanje. Luk 11,9.10. ↩︎
*
Aldovniki. Vu opčinskeh orsaga traplenjih jesu se isti aldovniki vu oštro iz kuštrov napravljene oprave vu cirkvi oblačili. V. Joel 1,13. ↩︎