Knjiga Judite — Del V.

Akior odgovarja Holoferneša da ne bi na izraelske sine navalil, ali si po tom neprijatele pribavlja.

I Holofernešu, asirijanskoga šerega poglavaru, je bilo povedano da se izraelski sini na branenje pripravljaju i da su po gorah pute zaprli.
I on se je z nemernum ljutostjum vužgal vu velikoj srditosti i pozval je vse poglavare Moabitancev i vojvode Amonitancev^*
i reče njim: „Poveđte mi, kakov je to narod koj gore opseđa, koje i kakve ter kulike ima varaše? Vu čem stoji njihova^* moč i kuliko ih je na broju? I gdo je ravnitel njihovoga šerega?^*
Zakaj med vsemi koji od istoka^* stanuju, ravno ovi nas zametavaju ter nesu nam naproti izišli da bi nas vu miru prijeli?“
Onda Akior, vođa vseh Amona sinov, odgovori i reče: „Moj gospone, ako se dostojaš posluhnuti, hoču pred tvojem obličajem istinu povedati od ovoga ljudstva koje na gorah žive, niti nikakva lažljiva reč ne izide iz mojeh vust.
Ovo ljudstvo je kaldejanskoga pokolenja.^*
Ovo je prvič vu Mezopotamiji^* stanuvalo i kajti oni bogom njihoveh ocov, koji su vu zemlji Kaldejancov bili, nesu hoteli služiti,
zato su zapustili šege svojeh ocov koje se vu vnožini bogov jesu zadržavale
i služili su jedinomu Bogu Nebes koj je njim takaj zapovedal da moraju otud iziti i stanuvati vu Karanu.^* Poklamkam bi pako po vsoj zemlji^* bil nastal glad, odišli su dole vu Egiptuš i onde su se vu četireh stotin letih^* natuliko povnožili da se njihova vojska ni mogla prebrojiti.
I poklamkam bi nje egiptonski kralj bil optršuval i nje z zidanjem svojeh varašev iz ilovače i opekih bil trl, kričali su k svojemu Gosponu i on je vsu egiptonsku zemlju z razlučnemi traplenji vudril.
Kad bi pako Egiptonci nje od sebe bili odegnali i traplenje zvrhu njih bi bilo prestalo i oni bi nje ipak vlovili ter pod svoje sužanstvo nazad spraviti bili hoteli,
otprl je njim Bog Nebes vu bežanju morje tak da je voda iz obodveh stran kakti zid stala i oni su z suhum nogum po dnu morja hodili i prek prešli.
Kad bi na ovem mestu nje neizbrojena Egiptoncev vojska bila potirala, je od vode tak bila pokrita da niti jeden ni ostal koj bi neg ov dogođaj poslednikom bil nazvestil.
Kad bi pako iz Črlenoga morja bili izišli, jesu se vu puščinah gore Sinaj nastanili vu kojeh nigdar nijeden človek ni mogel stanuvati niti kakov sin človečji počinuti.
Onda su gorki zviranjki za pitje slatki postali i četrdeset dugo let jesu hranu iz Neba prijemali.
Kam goder su vlezli prez luka i strelice, prez ščita i meča je mesto njih njihov Bog vojuval i obladal.^*
I nikoga ni bilo koj bi se ovomu ljudstvu bil mogel suprotstaviti, zvun ako je od službe Gospona Boga svojega odstupilo.^*
Kuliko goder pako puti jesu oni zvun svojega Boga jošče kakvoga drugoga poštuvali, jesu bili na porob, meč i osramočenje predani.
Kuliko goder pako puti je njim bilo žal da su od službe svojega Boga odstupili, je njim Bog Nebes podeljil moč suprotstaviti se.
Zadnjič jesu kralja Kananejancov i Jebuzejancov i Ferezijancov i Hevejancov i Amorejancov i vse moguče vu Hezebonu potukli i njihove zemlje i njihove varaše posvojili.
I doklam oni pred obličajem svojega Boga nesu zagrešili, je se njim dobro godilo ar njihov Bog odurjava krivičnost.
Ar takaj pred temi letmi, kad su bili odstupili od puta kojega je njim Bog dal da bi po njem hodili, jesu bili od vnogeh narodov vu bojih pomorjeni i prevnogi zmed njih vlovljeni jesu vu tuđu zemlju bili otpeljani.^*
Onomadne pako, poklamkam bi se k Gosponu, svojemu Bogu nazad bili povrnuli, jesu se iz raspršenja vu koje su bili raspršani znovič skup zjedinili, izišli na ove gore ter ipak imaju vu svojoj oblasti Jeruzalem gde je njihovo svetišče.^*
Sada anda, moj gospone, izveđaj! Ako su oni kakvu hudobnost včinili na pogled svojega Boga, tak hodmo gore k njim ar njihov Bog bude nje tebi segurno predal i oni budu došli pod jarem tvoje oblasti.
Ako pako ovo ljudstvo ni zbantuvalo svojega Boga, tak se mi njim ne budemo mogli suprotstaviti ar nje bude njihov Bog branil i mi budemo pred vsem svetom osramočeni.“
I včinjeno je. Kad bi Akior ove reči bil izvustil, jesu se vsi Holoferneševi velikaši rasrdili i nakanili su ga vmoriti i govorili su med sobum:
„Gdo je taj koj sme reči da se sini izraelski moreju Nabukodonozoru kralju i njegvem vojskam suprotstaviti pokehdob su ljudi prez oružja, prez moči i prez veščnosti vu vojskuvanju?
Da anda spozna Akior da nas vkanjuje, izidimo na gore i kada budu njihovi mogučni vlovljeni, onda bude on z njimi skupa z mečom prebođen
da vsaki narod spozna da Nabukodonozor je bog zemlje i da zvun njega ni nikakvoga drugoga.“

Objašnjenje

*
Moabite i Amonite od istoka Palestine jesu se bili povdali. ↩︎
*
Ljudstva. ↩︎
*
Holoferneš ni ovo pitanje naprvo postavil da se vputi ar kakti vođa Asirijancev koji su vre višeputi vu izraelsku zemlju bili vpali, je njemu dobro znano bilo. On je više iz zametavanja pital, kak jednoč Nabal (1Kralj 25,10). ↩︎
*
Namesto „od istoka“ bi moralo stati „proti zahodu“, kak se vu grčkem i sirijanskem čteje. Židovska zemlja je Asiriji proti zahodu ležala. ↩︎
*
Abraham i njegov otec Tare jesu vu Ur Kaldeje stanuvali. V. 1Moj 11,28. ↩︎
*
Gde je Ur ležal. ↩︎
*
Karan je takaj jošče vu Mezopotamiji ležal zato hoče Akior reči da iz svojega prvoga stanuvanja izideju ter se nastaniju vu Karani. Stanuvanja vu Kananu Akior ne čini spomenek primerom našega dijačkoga prenašanja, ali vu grčkem i sirijanskem namesto Karan stoji Kanan. ↩︎
*
Po Kananu kam je Abraham iz Karana odišel. ↩︎
*
Tuliko je let minulo počemši od Jakopovoga došestja vu Egiptuš tja do ishađanja Izraelcev. Od Jožefovoga došestja, koj je predi došel vu Egiptuš, tja do Izraelcev ishađanja je 430 let bilo minulo. V. 2Moj 12,41. Akior kaže se kakti vučen človek vu židovski dogodovščini. ↩︎
*
Oni su zadnjič potrebuvali oružje, ali višeputi je Bog prez vsakoga njihovoga pripomaganja obladal njihove neprijatele, kak sam Bog veli po Jožue. Jož 2412. ↩︎
*
Takaj mi krščeniki objačujemo po našeh grehih naše neprijatele proti nam i koji na nas navaljuju, obladaju nas jedino zbog našeh grehov. Z božanskum pomočjum bi mi vsamoguči bili, ali Bog nas zapušča i predaje nas našem neprijatelom kajti smo mi njega zapuščali. ↩︎
*
Ne dugo predi toga je bilo deset pokolenj po Salmanasaru vu asirijansko sužanstvo otpeljano, nekuliko pako prvlje je moral Manaseš kralj (4Kralj 17,3,6 ; Par 33,11) putuvati vu Babilon i to z velikum vnožinum Židovov. Oni koji hočeju dokazati da se pripečenje vu ovoj knjigi popisano je dogodilo po babilonskem sužanstvu, pretežeju ovoga reda reči na ovo sužanstvo i štimaju k tomu jošče više segurnosti imati, pokehdob da je vu grčkem pridano da je takaj Cirkva za to nog (sic) bila včinjena, po čem se neg samo njejine porušenje pred onem sužanstvom more razmevati. Ništarmanje ovo pridavanje more se razmeti i vzeti za oskrunenje kakvo se je bilo za Manaseša dogodilo. Z tem časom i to takaj slaže se da ih je neg vnogo bilo vu sužanstvo otpeljano pokehdob vendar vu babilonsko sužanstvo je bil ves puk otpeljan. ↩︎
*
Jošče predi nego bi se Manaseš iz sužanstva bil povrnul (2Par 33,13), je moglo više vlovljeneh Židovov kak takaj više stanovnikov židovskoga kraljestva dopuščenje dobiti, povrnuti se i gorske strani, gde bi se bolje mogli braniti i več segurnosti nadejati, za svoje prebivališče zebrati. ↩︎