Knjiga Judite — Del VI.

Akior predaje se Izraelcom, oni postiju i moliju.

Včinjeno je pako, kad bi govoriti bili prestali, Holoferneš je se kruto jako razljutil i reče Akioru:
„Pokehdob da si ti nam prorokuval i rekel da se izraelski puk brani od svojega Boga, da ti pokažem da ni boga zvun Nabukodonozora,^*
kada nje vse potučemo kakti jednoga človeka, onda budeš takaj ti z njimi skupa z asirijanskem mečom vmorjen. I ves Izrael bude z tobum poginul.
Onda budeš ti spoznal da Nabukodonozor je vse zemlje gospon. Onda prejde meč mojeh vojnikov čez tvoje boke i prebođen budeš opal med ranjene Izraelce i več ne budeš dehnul dok se z njimi ne skončaš.
Sada pako, ako misliš da je tvoje prorokuvanje istinsko, tak tvoj obraz naj ne spade i prebledenje koje je tvoje lice prevzelo naj odstupi od tebe ako sudiš da se ove moje reči ne moreju spuniti.
Da ti pako budeš znal da ti ovo z njimi skupa budeš spoznal, nut od ove vure budeš k njihovomu puku pridružen da, kada budu mojega meča zaslužene kaštige prijeli, takaj ti z njimi skupa budeš mojemu fantenju podvržen.“
Onda zapove Holoferneš svojem službenikom da bi pograbili Akiora i njega vu Betuliju^* otpeljali i vu ruke izraelskeh sinov predali.
Onda su njega Holofernešovi službeniki popali i pošli su čez ravnicu. Ali kad bi se bili približavali k goram, izišli su proti njim prečari.
Oni pako jesu odvinuli od strani gore ter su Akiora k drevu za ruke i noge privezali i tak z vužinci zvezanoga jesu ga ostavili ter se k svojemu gosponu povrnuli.
Ali izraelski sini jesu se dole iz Betulije spustili i došli su k njemu i njega su razvezali i otpeljali vu Betuliju i njega posred ljudstva postavili i ispitavali kaj bi to bilo da su njega Asirijanci zvezanoga ostavili.
Vu oneh dnevih bili su onde poglavari Ozijaš, Mikašev sin iz Simeonovoga pokolenja, i Karmi koj se je takaj Gotonijel zval.
Anda oposred starešin i vu nazočnosti vseh^* je Akior povedal vsa koja je on od Holferneša opitan govoril i kak je njega Holofernešovo ljudstvo zbog oveh rečih hotelo vmoriti
i kak se je isti Holoferneš rasrdil i njega iz ovoga zroka zapovedal Izraelcom predati da kada bude on izraelske sine obladal, bi takaj istoga Akiora med razlučnemi mukami zapovedal pogubiti zbog toga da je rekel: „Bog Nebes je njihov branitel.“
I kad bi Akior vsa ova bil povedal, je vse ljudstvo na svoje lice dole opalo i vklanjalo se Gosponu i med opčinskem javkanjem i plakanjem vsi skupa složno jesu svoje prošnje pred Gosponom zlevali
govoreči: „Gospodine, Bog Neba i Zemlje, poglej na njihovu oholnost i oglej se na našu poniznost,^* pazi na obraz tvojeh sveteh^* i pokaži da ne zapuščaš one koji se vu te ufaju i da ti ponizuješ one koji se vu se ufaju ter se dičiju z svojum jakostjum.“
Kad bi se pako bili prestali plakati i svoju celdašnju molitvu bili dokončali, batriveli su Akiora
govoreči: „Bog našeh ocov, kojega mogučnost ti jesi nazveščal, on bude tebe zato naplatil i tak ravnal dugovanje da ti, dapače, budeš videl njihovo pogublenje.
Kada pako bude Gospon, naš Bog, svoje službenike na ov način oslobodil, naj bude Bog takaj z tobum oposred nas da, kak se tebi bude dopalo, tak z vsemi tvojemi prebivaš med nami.“^*
Kad bi pako tolnač bil dovršen, onda ga je Ozijaš prijel vu svoju hižu i njemu naredil veliku večerju.
I na nju je on vse starešine pozval i oni se po dokončanem postu^* jesu skupa okrepili.
Potlam pako je bilo vse ljudstvo skupzezvano i vu zboru^* jesu celu noč molili i izraelskoga Boga za pomoč prosili.^*

Objašnjenje

*
V. gore 3, 13. Prisp. Dan 6,7; Čin. Ap. 12,22. ↩︎
*
Betulija je bila od Židovov, koji se nazad jesu bili povrnuli, zezidana gorska tvrđava pri Dotajinu i Ezdrelonu koja je k negdašnjem Isakarovomu pokolenju spadala (D. 7, 3; 8, 3 primerom grčkoga prenašanja). Vu Galileju, k kojoj je bilo pribrojeno Isakarovo pokolenje, prestavlja nju takaj vusno Istoka predavanje. ↩︎
*
Vsega ljudstva. ↩︎
*
I našu nevolju. ↩︎
*
Obrni tvoje oči na tvoj puk kojega ti jesi odebral i na svetost pozval. ↩︎
*
Kad zadobimo sloboščinu, onda naš Bog, kojega ti jesi dičil, naj bude takaj tvoje med nami delničtvo: ti primeš našu veru i budeš mogel med nami stanuvati. ↩︎
*
Post je trpel od večera jednoga dana do večera drugoga dana zdržavanjem od vseh jestvin. Kad bi noč bila nastala, onda je Ozijaš dal Akioru mertučljivi obrok i na njega je vse varaša starešine pozval. ↩︎
*
Na mestu zbora. Vre počemši od prvešeh vremen jesu imali Židovi vu mestih koja su od Jeruzalema odalečena ležala stanovite molitvih i zborov hiže koje se jesu sinagoge i prožeučen zvale. V. Čin. ap.16, 13. ↩︎
*
Za postom i molitvum je sledel mertučljivi obrok, za njim ipak hvalenje Boga i nočna molitva. Ov živlenja način jesu takaj prveh vremen krščeniki obdržavali, kak svedoči Tertulijan. Duša, veli on, je se krepila z molitvum predi nego bi se telu bila dala hrana i da se je samo zato jelo da se naravski potreboči zadovolji. Vsaki se je čuval več piti, nego se čisteh i redneh osob dostoji koje se spomenuju da se obnoč moraju na hvalenje Boga stajati. I kad se je takaj večerja dokončala z molitvum, onda se je z vsum poštenostjum odstupilo tak kak da bi se vu skrbljivosti bilo da se duša ravno tak kak telo krepi z svetem zadržavanjem koje se je obdržavalo pri jelu. ↩︎