Knjiga Judite — Del VII.

Betulija opseđa se i njejinem stanovnikom presekava se voda po vodotoku vu varaš napuščena.

Drugi pako dan je zapovedal Holoferneš svojem vojskam gore iti proti Betuliji.
Bilo je pako pešcev vojnikov sto dvadeset jezer, a konjanikov dvadeset i dva jezera,^* zvun oneh na boj pripravljeneh ljudih koji su bili zavjeti i prez vseh znovič iz orsagov i varašev pripeljaneh mladeh junakov.
Vsi skupa jesu se na boj suprot izraelskem sinom pripravili ter su vuz strani gore^* došli do vrha koj gleda^* zvrhu Dotajina, od mesta koje se zove Belma tja do Kelmona koj leži Ezdrelonu naproti.
Kad bi izraleski sini bili opazili njihovu vnožinu, hitili su se dole na zemlju, svoje glave posipali z pepelom i vsi skupa molili da bi izraelski Bog iskazal svoju milosrdnost zvrhu svojega puka.^*
I oni su vzeli svoje bojno oružje, opseli mesta koja po vuskoga puta stezi peljaju čez goru i nje su dan i noč stražili.
Poklamkam bi pako Holoferneš okolo bil ophađal, našel je proti poldnevni strani zvun varaša zviranjek koj je bil po vodotoku nuter napeljan. I ov vodotok je on zapovedal prekopati.
Ništarmanje nedaleko od zidov bili su zviranjki kam su se videli skrovce po vodu hoditi: više za žeđu vkrotiti, nego za nju vgasiti.^*
Vre pako sini Amona i Moaba pristupili su k Holofernešu i rekli: „Izraelski sini ne zanašaju na se kopje i strelicu, nego nje braniju gore i strme brdine jesu njihova jakost.^*
Da nje anda moreš prez harcuvanja obladati, tak k zviranjkom postavi straže da iz njih ne budu mogli vodu zajimati i onda budeš ti nje prez meča vmoril, ali se končemar vtrudiju i predaju svoj varaš od kojega misliju da je nepredobitljiv pokehdob leži na gorah.“
Ove reči jesu se dopale Holofernešu i njegvem službenikom i on je okolo vsakoga zviranjka sto ljudih postavil.
I poklamkam bi ova straža dvadeset danov bila stala, jesu vse kapnice i vodne jame vu Betuliji zmenjkale natuliko da vu varašu niti tuliko vode ni bilo da bi se neg samo jeden dan z njum zasitili ar se je voda vsaki dan na meru davala.
Onda su se k Ozijašu skup zebrali vsi muži i žene i mladenci i deca ter su vsi z jednem glasom
rekli: „Med nami i med tobum naj sudi Bog ar ti jesi ovu nesreču na nas nakopal kajti nesi hotel Asirijancom mir ponuditi i zato je nas Bog vu njihove ruke predal.
I zaradi toga ni nikoga koj bi nam pomogel akoprem mi pred njihovemi očmi dole padamo od žeđe i nevoljno pogibljemo.
I sada skup zeberite vse koji su vu varašu da se mi vsi Holoferneševomu ljudstvu dobrovoljno predamo.
Ar bolje je da mi zavjeti ostanemo pri živlenju i hvalimo Gospona, nego da vumremo i budemo vsem ljudem na osramočenje kada budemo naše žene i našu decu pred našemi očmi videli vumreti.
Mi denes za svedoka zazivamo Nebo i Zemlju i Boga našeh ocov, koj se nad nami fanti primerom našeh grehov, da vi sada varaš predate vu ruke vojske Holoferneša da bude po oštrini meča naš konec kratek koj je od silne žeđe dug.“
I kad bi to bili rekli, nastal je vu zboru pri vseh veliki plač i javkanje ter su vnogo vur z jednem glasom k Bogu kričali govoreči:
„Zagrešili smo kak naši oci, včinili smo krivičnost i zvršili hudobnost.
Ti pokehdob da si milostiven, smiluj se nam ali ti sam nas zaradi naše krivičnosti kaštiguj z tvojem bičom i nas, koji tebe valujemo, ne predaj narodu koj ne pozna Tebe
da ne rečeju med narodi: ʻGde je njihov Bog?ʼ“
I kad bi od ovoga kriča zamorjeni i od ovoga plača zatruđeni bili zamuknuli,
stane se Ozijaš z suzami oblejan i reče: „Bratja, budite dobre volje i čakajmo jošče oveh pet danov od Gospona milosrdnost^*
ar morebiti prikrati on svoju srditost i da diku svojemu imenu.
Ako li pako po dokončaneh peteh danih ne dojde pomoč, tak hočemo včiniti primerom oveh rečih koje ste govorili.“

Objašnjenje

*
Pri othađanju (gore 2, 7) je Holoferneš samo dvanajst jezer konjanikov imal, on je anda ovo povnoženje moral dobiti iz orsagov asirijanskoga kraljestva. ↩︎
*
Blizu Betulije. ↩︎
*
Koj nad Dotajinom leži. ↩︎
*
Izraelci nesu kazali onu lažljivu vojničku srčenost koja zakriva pogibel gde bi zaisto bila, dapače oni si jesu vsu njejinu strahovitost naprvo stavljali, ali zato vendar nesu zdvojili, nego po vernoj molitvi jesu se zaufali na božansku pomoč. ↩︎
*
Oni su z njimi svoju žeđu pomenjšati, ali ne vgasiti mogli. ↩︎
*
Varaš Betulija je imal visoke zide k kojem se približati ni bilo moguče z opsednem orudeljem pokehdob da su na strmeh nadoljih bili postavljeni. ↩︎
*
Morebiti se je Ozijaš vu oveh peteh danih nadejal dežđa. ↩︎