Knjiga Judite — Del VIII.

Judita slabosrčne nagovarja na srčenost.

Včinjeno je pako kad bi ove reči bila čula Judit vdovica koja je bila Merariova kči, sina Idoksovoga, sina Jožefovoga, sina Ozijaševoga, sina Elajiševoga, sina Jamnorovoga, sina Gedeonovoga, sina Rafajimovoga, sina Akitebovoga, sina Melkijaševoga, sina Enanovoga, sina Natanijanovoga, sina Salatijelovoga, sina Simeonovoga, sina Rubenovoga.^*
Njejin pako muž je bil Manaseš koj je ob jačmenovi žetvi vumrl.
Ar kad bi on na polju priganjal one koji su vezali snope, je došel zvrhu njegve glave žar i vumrl je vu Betuliji, svojem varašu, i bil je onde pri svojeh ocih zakopan.
Judit pako je bila njegva ostavljena vdova vre tri leta i šest mesecov.
I ona si je na gornjoj strani svojega stanja priredila skrovnu hižu gde se je z svojemi deklami zaprta zadržavala
i ona je zvrhu svojeh bokov nosila pokornu opravu i postila je vse dneve svojeg živlenja^* zvun sobot, mlajov i svetkov^* hiže izraelske.
Bila je pako ona kruto lepoga lica i njejin muž je njoj ostavil veliko bogatstvo i obilnu družinu i ladanja z čredami volov i ovec napunjena.^*
I ona je bila pri vseh na dobrem glasu ar se je Boga kruto bojala, niti nikoga ni bilo koj bi od nje kaj zla bil govoril.
Ova, kad bi bila čula da je Ozijaš obečal da bude po dovršenem petem danu varaš predal, pošlje k Kabriji i Karmiji starešinam.
Kad bi pako ovi k njoj bili došli, reče njim ona: „Kakov je zrok da je Ozijaš privoljil varaš predati Asirijancom ako vam za pet danov ne dojde pomoč?
Pak gdo ste vi koji Gospona skušavate?^*
Ovo govorenje ni koje nagiblje na milosrdnost, dapače, koje obuđuje srditost i podžiže ljutost.
Vi ste Gosponovoj milosrdnosti vreme prepisali i njemu poleg vaše volje dan odredili.
Ali pokehdob da je Gospon trpljiven, tak se ravno zato spokoremo i za njegvo oproščenje suze roneč prosemo
ar se Bog ne nagraža kakti človek niti se na srditost ne vužiže kakti sin človečji.
Zato ponizujmo pred njim naše duše i z poniženem duhom služemo njemu
i recemo plačuč Gosponu da nam naj on svoju milosrdnost poleg svoje dopadnosti iskaže da kak goder je naše srce zbog njihove oholnosti rastuženo, tak se mi zbog našega poniženja dičemo^*
ar mi nesmo nasleduvali grehe našeh ocov koji su zapuščali svojega Boga ter se tuđem Bogom jesu vklanjali.
Zbog koje pregreške jesu oni na meč i na poroblenje i na osramočenje svojem neprijatelom bili predani. Mi pako ne spoznajemo drugoga Boga kak njega jedinoga.
Čakajmo vu poniznosti njegvo obatrivenje i on bude fantil našu krv nad našemi neprijateli koji nas stiskaju i ponizil vse narode koji se suprot nam podižeju i nje bude načmil prez poštenja Gospon, naš Bog.
I sada, bratja, pokehdob da ste vi med ljudstvom Božjem najstareši i od vas visi njihovo živlenje,^* tak podignite njihova srca z vašem nagovarjanjem da se spomeneju kak su naši oci zato bili skušavani da pokažeju je li oni prav častiju svojega Boga.
Oni se moraju spomenuti kak je bil naš otec Abraham skušavan i po vnogeh suprotivščinah skušan je postal Božji prijatel.
Ovak je Izak, ovak Jakop, ovak Mojžeš, ovak jesu vsi koji su se Bogu dopadali, vnoge suprotivščine podnesli i ostali su verni.
Oni pako koji skušavanje nesu prijeli vu Gosponovem strahu, nego su svoju netrpljivnost i sramotu svojega morguvanja suprot Gosponu izvustili,
oni su od skončitela bili skončani i od kač pogubljeni.^*
Mi se anda nečemo fantiti^* po netrpljivnosti nad tem kaj trpimo,
nego mislemo i verujmo da ove kaštige jesu menjše nego naši grehi i Gosponovi biči z kojemi se kakti sluge pokorimo, jesu na naše poboljšanje, a ne za naše pogublenje nadošli.“
Onda su njoj Ozijaš i najstareši rekli: „Vse kaj si govorila, je istinito, niti nikaj ni vu tvojem govorenju za kuditi.
Tak anda prosi za nas ar ti jesi jedna sveta žena i bojiš se Boga.“
I Judit reče njim: „Spodobno kak vi spoznajete da je iz Boga kaj sem ja mogla govoriti,
ravno tak zveđajte sada je li je takaj to iz Boga kaj sem ja dokončala včiniti i molete da Bog stalno včini moje nakanenje.^*
Postavete se ovu noč k vratam da ja z mojum službenicum morem van iziti i molete da se Gospon vu peteh danih, kak ste vi rekli, ogleda na svoj izraelski puk.^*
Ali ja neču da bi vi zveđali moj čin i doklam ja vam na znanje dam, naj se nikaj drugoga ne čini, nego da se za me Gospon, naš Bog, moli.“
I Ozijaš, poglavar Jude, reče njoj: „Hodi vu miru i Gospon naj bude z tobum na fantenje zvrhu našeh neprijatelov.“ I oni su se vrnuli i odišli.

Objašnjenje

*
Namesto Rubenovoga bi moralo stajati Jakopovoga ali Izraelovoga, kak stoji vu grčkem i sirijanskem i pri svetem Fulgencijušu, kajti odzdol 9,2 Judit imenuje otprto svojega velikoga deda Simeona koj je bil sin Jakopov. ↩︎
*
Ona je bila z jednem obrokom navečer zadovoljna kak su to tugujuči i pokoru čineči bili navadni včiniti (2Kralj 1,12; 3,35). Ovo oštro živlenje ni ona iz žalosti za svojem pokojnem mužom sprevađala ar to bi nespametno bilo (Cirkv 38,17–23), nego za pokoru. ↩︎
*
Ostale svetečne dane. ↩︎
*
Dobrovoljno siromaštvo i vživanje ovoga sveta sebi skratiti vu obilnosti je zvrhunaravska krepost koju neg samo oni moreju zvršavati koji se od božanskoga duha vodiju. Na peldu Judite jesu takaj druge vdovice živele. Blažena Angela od Foligny je svoj veliki imetek razdeljila med siromake i je sprevađala siromaško, vu Bogu skrovno i pokorno živlenje. Akoprem se na to ne zavežuju vse vdovice, tak su vendar dužne čedno i Bogu podložno živlenje voditi. Ar vdovica koja vu nasladnosti žive, veli sveti Pavel, je živuča mrtva. ↩︎
*
Po tom da odlučujete vreme vu kojem naj bi on vam pomogel. ↩︎
*
To je: „Recemo Gosponu da naj on nad nami pokaže svoju milosrdnost po našem rešenju da ovak priliku dobimo ravno tak veseliti se zvrhu našega poniženja koje je opravilo ono rešenje kak se sada rastužujemo po onoj Asirijancev oholnosti koja je zrok naše vezdašnje nevolje.“ ↩︎
*
Natuliko, najmre, nakuliko su oni moguči obdržati Betuliju koja je ključ cele zemlje. Ako oni predaju tvrđavu, tak se onda bude neprijatel prez vsake prečke rashađal i napuni vsu zemlju z mrtvemi telmi. ↩︎
*
Ovde se smrt imenuje skončitel. Prisp. 1 Kor10, 10; Žid 11, 28. ↩︎
*
Po netrpljivnosti. ↩︎
*
Da me Bog vu njem objači i nje ispelja. Kak ste goder vi opsvedočeni da to kaj sem ja rekla je iz Boga, ravno tak morate biti opsvedočeni da takaj ono kaj sem nakanila včiniti, od njegvoga duha ishađa i da je opravek njegvoga nadehnenja. ↩︎
*
Pokehdob anda najstareši vre jeden put jesu obečali ljudstvu za petemi dnevi, ako nikakva pomoč ne nadojde, varaš predati, smeli su oni za predsebnost prošnje načiniti da bi se Bog vu teh dnevih dostojal pomoči. ↩︎